Crash - Contatto fisico

Da Wikipedia.

C'l artìcul chè 'l è scrit in Miranduléś Emiliàn

Crash
Crash - Contatto fisico

Terrence Howard in na figùra dal film
Scuntràr-as - Cuntàt fìśic
2004
Regìa: Paul Haggis
Scritōr: Paul Haggis • Bobby Moresco
Atōr: Matt DillonSandra BullockLudacris
Don CheadleRyan PhillippeBrendan Fraser
Terrence HowardLarenz TateMichael Peña
Jennifer EspositoNona GayeShaun Toub
Thandie NewtonLoretta DevineTony Danza
Müsica: Mark Isham
Léngua: IngléśPersiàṅ
SpagnōlCinéśCureàṅ
Dürä dal film: 112 minüt
Nasiōṅ: Stat UnîGermàgna


«
Quànd ta t mōṿ a la śveltésa dla vita... scuntràr-as 'l è 'n quèl sicûr.»
(Tagline dal film)


Crash - Contatto fisico (Scuntràr-as - Cuntàt fìśic) 'l è 'n film dramàtic americàṅ e tedésc dal 2004 ad Paul Haggis vinsidōr ad tri Prèmi Òscar su siē candidadùri: film, senegiadùra uriginàla e muntàǵ.

Custâ siē migliòṅ e mèś ad dòlar, al film al 'n à fat pò sù dagnóra sènt.

Sunt

Durànt un gir ad nòt in un quartēr “biànc” ad Los Angeles, al prucuradōr distretuàł Rick Cabot (Brendan Fraser) e sò mujēr Jean (Sandra Bullock), na śgnōra dimóndi burgheśòta, i vìvan rapinâ da dū śōv'n ad culōr, Anthony (Ludacris), ch'al và sèmp'r adrē cun la discriminasiòṅ di négar in dla sucietà americàna, e Peter (Larenz Tate), ch'i gh pòrtan via 'l sò gipòṅ. Turnàda a cà, la dóna la fà cambiàr subìt la ciavadùra dla sò vila ma quànd la véd ch'a far al lavōr a gh'è 'n ispànig śmudandâ e pîṅ 'd tatuàǵ, Daniel (Michael Peña), l'è sicùra che chi lò al gh'àppia in mènt ad dar pò na còpia dla ciàṿ a di delinquènt. La sgnōra la gh 'n à anc cun la dóna di fat, la Maria (Yomi Perry), parchè la n lava minga śò bèṅ ma pò quànd la strabùca śò p'r al scali a jutàr-la a gh'è sōl lē e minga la sò “amìga” dna vita, impgnàda tròp da 'l estetìsta.

Farhad (Shaun Toub), americàṅ cun di urìgini iraniàni ch'al gh'à 'n negòsi avèrt vint-quàt'r óri su vint-quàtar, al n s sènt minga tant sicûr e jutâ par sò fiōla, la Dorri (Bahar Soomekh), al próa a cumpràr na pistòla da tgnir in dal casét dal sò banc, pò al dmanda a Daniel ad giustàr la ciavadùra d'l us dal sò eśercìsi cumersiàł ma chi lò al gh diś ch'a n s pōl minga far parchè a gh sarév da cambiàr tuta la pòrta. Quànd Farhad al s cata 'l sò negòsi mis a gambi a l'élta dòp un furt, esénd ch'l à pardû incòsa e che l'asicurasiòṅ la n paga gnint parchè 'l è stâ tròp negligìnt, al s la tōś c'n al magnàṅ e 'l và in a risć ad cupàr sò fiōla pìcula ch'la s éra misa in mèś par difénd'r-al.

'L agìnt ad pulisìa John Ryan (Matt Dillon), un tisi minga tant gustóś ch'al gh'à di prubléma cun sò pàdar ch'al fà fadìga a pisàr e cun la Shaniqua Johnson (Loretta Devine) ch'la n gh pasa minga 'l curi giùsti ad qvéli quaciàdi da la sò asicurasiòṅ su la salùt, na sira al férma la màchina dal regìsta 'd culōr Cameron Thayer (Terrence Howard) e 'd sò mujēr un pôc imbariàga dòp na fèsta, la Christine (Thandie Newton), par far-i śmuntàr śò e umiliàr-i tastànd c'n al maṅ in na manéra pēśa la dóna méntar sò marè al n diś gnint. Al jutànt più śōvan dal pulisiòt ch'al gh'à na cusînsa, 'l ufisiàł Hanson (Ryan Phillippe), p'r a n lauràr piò sèg, 'l è custrét da 'l sò cmandànt, al tenènt Dixon (Keith David), a far-as pasàr p'r un scurśòṅ patintâ acsè da psēr armàgnar da par lò.

Anthony e Peter, mént'r i scàpan via c'n al gipòṅ di Cabot, i métan sóta 'n cureàṅ, pò i próan a fargàr-an 'n àtar, qvél ad Cameron, parchè al prim SUV a s fà fadìga a dar-al via su 'l marcâ négar parchè inspricâ tròp dal sànguv d'l aśiàtic, dascargâ a pēś mòrt davànti a 'l uśdàł. La màd'r ad Peter (Beverly Todd) la dmanda a sò fiōl agìnt ad pulisìa, Graham Waters (Don Cheadle), 'd andàr-'l a pascàr ma chi lò, ch'al fà còpia su 'l lavōr e a lèt cun la Ria (Jennifer Esposito), al s vargóggna 'd lē, drugàda, e 'd lò, delinquènt. Mèntar Hanson al dà 'n pasàǵ a Peter, ch'l éra scapâ via durànt la rapìna a Cameron parchè l'éra drē a rivàr la pulisìa, al sò èx culéga John al salva la vita a la Christine ch'l'iva abû 'n incidènt in màchina e ch'la risćiàva 'd saltàr p'r ària parchè a gh'éra na pérdida 'd benśìna.

Culegamènt estéran