Serigrafìa

 Carpsàn

C'l artìcul chè 'l è scrit in Carpsàn

A:Inciòster • B:Śavàj • C:Figùra • D:Fotoemulsiòn • E:Schérum • F:Stampa

La Sérigrafìa l' è 'na manéra ed stampèr un quèlch motìv su 'na variété infinida ed materié, fènd pasèr l' inciòster a travèrs un sdàs apòsta ch' l' è sbusì sôl in du gh' à da gnìr la scrìta u al disègn.

Descrisiòun

Prìma ed tùt l' è fundamentèl al tlèr ed stàmpa (al sdàs), ch' al vìn preparè al dè d'incô cun dj sistéma dimòndi svélt e precìś: da 'na pelìcula preparèda fènd stampèr un foj trasparèint da un compùtèr, a' s' va a impresionèr al tlèr preparè prìma cun 'na gelatìna sensibla ala lûś: 'na spécie ed cotûra dal tlèr a la lûś in dùa an gh'è mìa la scrìta négra dàl disègn, la fa gnìr fòra, dòp un lavag, al tlèr finî, śbuśì sôl in dù a dév pasèr l'inciòster, pròunt per stampèr.

Dòp ch' a s' è preparé al tlèr, a s' pôl finalmèint andèr in stàmpa, cun 'na ràcla ch' la spàlma l'inciòster dèinter al tlèr cmandèndegh ed pasèr sôl a travérs j buś dal disègn.

L'inciòster al scènd dal tlèr int sul matérièl ch' a vlòm stampèr cun la fôrma prìma impresionèda int dal tlèr, al 's pògia lè in sìma, pò a bsògna però anca sughérèl cun dal chèld u a l'aria sùta. Cun j inciòster specié ch' a gh'è incô, el stàmpi in serigrafìa j gh' àn dimòndi tgnùda, a la luś, aj lavag', aj gràfi, etc.