Carla Bruni

Artéccol in dialètt mudnés

Articul in Miranduleś

«

Mais qui est ce qui m'a dit que toujours tu m'aimais? Je ne me souviens plus, c'était tard dans la nuit, J'entend encore la voix mais je ne vois plus les traits, "Il vous aime, c'est secret, lui dites pas que j'vous l'ai dit", tu vois quelqu'un m'a dit que tu m'aimais encore, me l'a t'on vraiment dit, que tu m'aimais encore, serait-ce possible alors? On me dit que nos vies ne valent pas grand chose, elles passent en un instant comme fanent les roses, on me dit que le temps qui glisse est un salaud, que de nos tristesses il s'en fait des manteaux.»

(FR)(Quelqu'un M'a Dit, 2002)

«

Ma chi è'l ch'al m à dit che ta m vliv bèṅ sèmpar? A n m arcòrd piò, 'l éra tard ad nòt, a sènt incóra la vóś ma a n arcòrd piò la fàcia, "Lò al v vōl bèṅ, 'l è un segrét, minga dir-gh ch'a v 'l ò dit", véd-at qualchidòṅ al m à dit ch'at ma vliv bèṅ incóra, i m 'l aṅ dit dabòṅ, che tè ta m vliv bèṅ incóra, éra'l pusìbil alóra? I m aṅ dit ch'al nòstri viti i n vàlan briśa dimóndi, i pàsan in présia cuma al róśi i cródan, i m aṅ dit ch'al tèmp ch'al pasa 'l è un bastàrd, che di nòstar daspiaśér al s è fat di tabàr.»

(MUD)

La Carla Bruni tòlta śò in dal 2008

Carla Bruni, ([/kaʀ'la/ /bʀy'ni/], dita a la manéra tranśalpìna) l'è na mudèla, atóra e cantànta itagliàna dvintàda francéśa, nada a Turèṅ al 23 ad Dicémbar dal 1967. L'è la tèrsa mujér dal presidènt francéś Nicolas Sarkozy e sèg la gh'à abû anc na fiōla, Giulia, nada al 19 'd Utóbar dal 2011.

Biugrafìa

Carla Bruni la daśvèṅ da na famìja pîna ad bèsi piemuntéśa che in di sò avēr la gh'à anc al castèl ad Castagnē Po. A siē an la spatìna cun i sò genitōr ('l industriàŀ e cumpiśidōr Alberto Bruni Tedeschi e l'atóra e pitóra Marisa Borini) e la surèla Valeria Bruni Tedeschi (in séguit n'atóra dimóndi famóśa ch'la laurarà anc cun Claude Chabrol) a Parìś parchè i gh'ìvan timōr ch'al Brigàdi Rósi i i vlìsan rapìr. Sò nunòṅ, Virginio Bruni Tedeschi 'l ìva dat vita in di an Vint a la CEAT, la secónda indùstria dla guma itagliàna dòp la Pirelli, ma sò pàdar al l'iva vindùda in dal mèś di an Stanta p'r andàr a far al cumpuśidōr in tèra francéśa par pò dvintàr al diretōr artìstic dal teàtar règi ad Turèṅ.

Dòp èsar andàda in soquànti scōli privàdi in Śvisra, la tórna in Frància p'r iscrìv'r-as a l'università dla Surbòna tgnénd a drē a 'l indirìsi 'd architetùra. A daśnóṿ an la mòla incòsa par tacàr a dvintàr na mudèla a tèmp pîṅ. In di an Nuànta la gh la cava a sfundàr dabòṅ, dvintànd una ad quéli pagàdi da piò a 'l mónd, difàti la ciàpa 7,5 migliòṅ ad dòlar 'l an laurànd p'r al cà ad mòda più cgnusùdi e impurtànti cuma Christian Dior, Paco Rabanne, Sonia Rykiel, Christian Lacroix, Karl Lagerfeld, John Galliano, Yves Saint-Laurent, Chanel e Versace.

P'r un perìud ad tèmp la Bruni la sa stablìs da Jean-Paul Enthoven, inamurànd-as ad sò fiōl, al profesōr ad filuśufìa Raphaël Enthoven e tacànd na relasiòṅ sèg. In alóra, Raphaël al n éra minga put ma spuśâ cun la scritōra ad rumànś Justine Lévy, fiōla dal filòśuf Bernard-Henri Lévy. Cal rapòrt chè, andâ in malóra, la dà ispirasiòṅ a la Lévy par scrìvar al lìbar Rien de grave (Gnint ad grav), in dua la dóna la cònta la vita 'd un persunàǵ da quàtar sòld, Paula, na mudèla dvintàda bèla faghénd di uperasiòṅ ch'la tōś via al marè a la prutagunìsta, figurànd-la cuma na mantìda e na sanguétula cun un surìś da Terminator. Carla la mét al mónd un putèṅ insém a Raphaël Enthoven in dal 2001 ciamâ Aurélien.

Carla Bruni la dascór cun la mujér ad Barack Obama, Michelle

In dal 1998 la dà un taj a 'l mónd dla mòda p'r impgnàr-as in dla mùśica. In dal 2000 la scriv i tèst ad soquànti cansòṅ d'l àlbum Si j'étais elle (S'a fus lē) ad Julien Clerc. In dal 2002 la taca na caréra da par lē faghénd gnir fóra al disc Quelqu'un m'a dit (Qualchidòṅ al m à dit), cun dèntar al braṅ Raphaël in unōr ad sò marè, ma in Itâglia ch'al lavōr lè al s pōl catàr in di negòsi sōl 'n an dòp. 'L àlbum al vénd dimóndi bèṅ, specialmènt in Frància e in Bélgi (prim pòst).

In dal 2003 la vèṅ invidàda a 'l Festival ad San Remo. Al 15 ad Śnar dal 2007 'l è la vòlta dal sò secónd disc No Promises (Briśa prumési, tut cantâ in ingléś).

Al 16 ad Dicémbar dal 2007 i giurnài francéś i faṅ savér ch'al presidènt dla repùblica, Nicolas Sarkozy, ch'l iva mulâ da pôc sò mujér, Cécilia Attias, al s véd cun la mudèla piemuntéśa. Dū méś dòp, al 2 ad Favràr dal 2008, a s tèṅ al matrimòni, cun l'atóra Marine Delterme a far da testimòni. La Bruni la taca acsè a far-as védar in di apuntamènt pulìtic in gir p'r al mónd insém a sò marè, avénd anc 'l incàrag ad lauràr par cumbàtar l'A.I.D.S. traśmìs da 'l màdar a i sò fiōi durànt i part (un sò fradèl, Virginio, 'l è mòrt in dal 2006 ad cal mâŀ lè).

'L 11 ad Luj dal 2008 la Bruni la fà gnir fóra al sò tèrs disc, Comme si de rien n'était, tut cantâ in francéś a part dū cover: la vècia You Belong to Me e Il Vecchio e il Bambino (Al vèć e al putèṅ) braṅ dal mudnéś Francesco Guccini.

Al 19 'd Utóbar dal 2011 Carla la parturìs na putìna, Giulia, fiōla ad Sarkozy. La Bruni, ch'l'iva sèmpar dit 'd èsar ad sinìstra par tradisiòṅ dla sò famìja, la fà savēr in dal Maǵ dal 2011 che adès lē l'è dvintàda na sarkozysta sfegatàda e che la n è piò ad sinìstra, par gnint.

Discugrafìa

• Quelqu'un m'a dit 2002
• No Promises 2007
• Comme si de rien n'était 2008

Cìnema

• Unzipped (Cun la sfésa śò), regìa ad Douglas Keeve 1995
• Paparazzi (id.) regìa 'd Alain Berbérian 1998
• Midnight in Paris (Meśanòt a Parìś) regìa ad Woody Allen 2011

Culegamènt estéran

• (IT) (FR) (EN) (DE) (ES) Al sò sit uficiàŀ, in soquànti léngui