Sonia Topazio

C'l artìcul chè 'l è scrit in Miranduléś

La Sonia Topazio, cgnusùda anc cuma Sonya Topazio (Puténsa, 8 ad Setémbar dal 1969, a s lèś [ˈsonja toˈpatt͡sjo] in itagliàṅ), l'è n'atōra e giurnalìsta itagliàna.

Biugrafìa

La Sonia in di an Utànta la fà dal gari spurtìvi in dal camp di juniores, pò la taca a impgnàr-'s a teàt'r e a 'l cìnema, eśurdénd a daśnóṿ an cun Mauro Bolognini faghénd la part dla Nina Ciampa in Berretto a sonagli ad Luigi Pirandello.

A 'l inìsi di an Nuànta la taca a recitàr anc a 'l cìnema, tulénd part insém a la Francesca Dellera e a Sergio Castellitto a la La carne (1991) ad Marco Ferreri, a 'l thriller Omicidio a luci blu (1992), faghénd la part dna rója, e a 'l śal La sindrome di Stendhal (1996) cun l'Asia Argento e Thomas Kretschmann, in dla part dna vitma masàda. 'L an dòp la fà n'infarméra in dla pelìcula ad scarésa M.D.C. - Maschera di cera (1997).

In cal méntar la lavóra anc in televiśiòṅ, tulénd part a la traśmisiòṅ Macao ad Gianni Boncompagni e a 'n prugràma regiunàł dal Lasi su 'l pudìśum.

La sò caréra a 'l cìnema la cuntìnua girànd al film eròtic Top Girl (1997) e 'n epiśòdi ad Corti Circuiti Erotici (1999) ad Tinto Brass. 'L an dòp la tōś part a 'l fotorumànś Quattro bambole per una rapina, publicâ su la rivìsta eròtica Blue, e a 'n calendàri par Playmen.

Fra i sò àtar film dal perìud a 'rcurdém la cumèdia Besame mucho, cun la Giuliana de Sio e Fabio Canino, al śal Il delitto di Via Monte Parioli, in dla part dla Gianna, Ogni lasciato è perso, dirèta par Piero Chiambretti, e Ti spiace se bacio mamma?, pelìcula cun Alessandro Benvenuti, la Natasha Stefanenko, Arnoldo Foà e la Marina Massironi.

In dal 2001 la s làurea in Létri e filuśufìa, cun indirìs Cìnema e spetàcul a l'università La Sapienza 'd Róma, e la fà 'n servìsi par Playboy da 'l tìtul Sonia Topazio la duturésa la s cava śò. Soquànt méś dòp l'è misa a cap d'l ufìsi stampa d'l Istitùt Nasiunàł ad Geufìśica e Vulcanulugìa (INGV).

In d'l Avrìl dal 2022 la lavóra cuma adéta stampa p'r al senadōr Nicola Morra, Presidènt dla Cumisiòṅ Parlamentàra ch'la gh'iva da indagàr su la màfia e su gl'asuciasiòṅ criminàli, anc furastéri. Da 'l Favràr dal 2023 l'è la respunsàbila par la regiòṅ Lucàgna dal Sèntar Demucràtic ad Bruno Tabacci.

Filmugrafìa

1990 - Una donna da guardare, regìa ad Michele Quaglieri
1991 - La carne, regìa ad Marco Ferreri
1991 - La villa del venerdì, regìa ad Mauro Bolognini
1991 - Omicidio a luci blu, regìa 'd Alfonso Brescia
1992 - Ultimi fuochi d'estate, regìa ad Mario Gariazzo
1995 - Il mago, regìa 'd Ezio Pascucci - Film TV
1996 - Club vacanze, regìa 'd Alfonso Brescia
1996 - La sindrome di Stendhal, regìa ad Dario Argento
1997 - M.D.C. - Maschera di cera, regìa ad Sergio Stivaletti
1997 - Stressati, regìa ad Mauro Cappelloni
1997 - Top Girl, regìa ad Joe D'Amato
1998 - Il delitto di Via Monte Parioli, regìa 'd Antonio Bonifacio
1998 - La madre inutile, regìa ad José María Sánchez - Film TV
1999 - A due passi dal cielo, regìa ad Sergio Martino - Film TV
1999 - Cornetti al miele, regìa ad Sergio Martino - Film TV
1999 - Corti circuiti erotici, regìa ad regìsta difarènt
1999 - Besame mucho, regìa ad Maurizio Ponzi
2000 - La stanza della fotografia, regìa 'd Antonio Bonifacio - Film TV
2000 - La donna del delitto, regìa ad Corrado Colombo
2001 - Ogni lasciato è perso, regìa ad Piero Chiambretti
2003 - Ti spiace se bacio mamma?, regìa 'd Alessandro Benvenuti
2004 - Part Time, regìa 'd Angelo Longoni - Film TV

Culegamènt estéran

(IT) Filmugrafìa in s'l IMDb