Sogno olimpico
|
C'l artìcul chè 'l è scrit in
Miranduléś |
 42 segundos | ||
| Sogno olimpico | ||
 Tarik Filipovic in na figùra dal film | ||
| Sógn ulìmpig 2022 | ||
|---|---|---|
| Regìa: Àlex Murrull • Dani de la Orden | ||
| Scritōr: Carlos Franco | ||
| Atōr: Jaime Lorente • Álvaro Cervantes Tarik Filipovic • Òscar Muñoz • David Bagés Cristian Valencia • Joan Sentís • Pep Ambròs Germán Alcarazu • Alfons Nieto • Julia Lara | ||
| Müsica: Óscar Araujo | ||
| Léngua: Spagnōl • Itagliàṅ • Catalàṅ Cruàt • Ingléś • Francéś • Purtughéś | ||
| Dürä dal film: 106 minüt | ||
| Nasiōṅ: Spaggna • Prinsipâ 'd Andòra | ||
Sogno olimpico (Sógn ulìmpig) 'l è 'n film biugràfic e spurtìṿ dal 2022 'd Àlex Murrull e 'd Dani de la Orden ch'al cònta la stòria dla squàdra spagnōla 'd palanōd ch'l'à śugâ la finàł di Śōg ulìmpig ad Barcelóna dal 1992 cóntar l'Itàglia.
Soquànt nóm di persunàǵ druâ in dal film i èṅ stâ cambiâ parchè i prutagunìsta i n aṅ minga dâ 'l parmés ad druàr-i, cuma Ratko Rudić ch'l è dvintâ Igor Popović. In dla culòna sunóra dal film a s sènt al braṅ Run Boy Run ad Woodkid.
Sunt
Par réndar più fòrta la squàdra 'd palanōd spagnōla ch'la gh'à da far i Śōg dla XXV Ulimpìad a Barcelóna, al respunsàbil dal team Josep Perelló (Òscar Muñoz) al decìd ad numinàr alenadōr al cruàt Dragan Matutinović (Tarik Filipovic). Chi lò, ch'al s fà jutàr da 'l sò asistènt più bòṅ Joan Fisio (Artur Busquets), al ciàma subìt in squàdra anc di śugadōr madrilèṅ, cuma Javi Franco (Germán Alcarazu), śuntànd-i a 'l grup stòrig ad qvéi catalàṅ. Dragan 'l è però un sergìnt ad fèr dimóndi dûr c'n al grup esénd ch'al gh fà far anc di alenamènt dimóndi pēś a Andorra e i śugadōr ch'i n gh la càvan briśa i vìnan lasâ a cà.
Al stéli dla squàdra i èṅ Manel Estiarte (Álvaro Cervantes) e Pedro García Aguado (Jaime Lorente) ma i gh'aṅ tut dū di prubléma. Al prim 'l à patî al suicìdi 'd sò surèla Rosa ch'la s è butàda śò par na fnèstra, mént'r al secónd, ch'l à tacâ na stòria 'd sès a 'l vilàǵ ulìmpig cun la nudadōra Sara (Julia Lara), 'l è piutòst bric, sfaciâ, a gh piàś andàr in discutéca e 'l gh'à di prubléma cun la cucaìna. Par tgnir-al 'd òć Matutinović al i mét in cambra insém in manéra che Estiarte, numinâ capitàṅ, al pòsa cuntrulàr-al.
In dal turnèo la Spaggna la và fòrt baténd in dal giròṅ Ulànda, Grécia, Ungherìa e Cuba e pò i Stat Unî in semifinàł. Par vìnsar la mdaja 'd òr adès i spagnōi i gh'aṅ da bàtar gl'itagliàṅ alenâ da 'n tècnig sèrb, Igor Popović (Rolando Raimjanov), rivàł ad Matutinović anc par via dla guèra in Juguślàvia. L'Itàglia la partìs bèṅ armagnénd sèmp'r in tèsta a part vèrs la fîṅ quànd un rigōr 'd Estiarte al pòrta in vantàś par la prima vòlta i suo su 'l 7-6. I gh càlan però incóra 42 secónd da śugàr.