Seduzione mortale (film 1953)
|
C'l artìcul chè 'l è scrit in
Miranduléś |
 Angel Face | ||
| Seduzione mortale | ||
.png) La Simmons e Mitchum in na figùra dal film | ||
| Sedusiòṅ murtàla 1953 | ||
|---|---|---|
| Regìa: Otto Preminger | ||
| Scritōr: Frank S. Nugent • Oscar Millard Chester Erskine • Ben Hecht | ||
| Atōr: Robert Mitchum • Jean Simmons • Leon Ames Mona Freeman • Herbert Marshall • Barbara O'Neil Kenneth Tobey • Raymond Greenleaf • Robert Gist | ||
| Müsica: Dimitri Tiomkin | ||
| Léngua: Ingléś • Giapunéś | ||
| Dürä dal film: 91 minüt | ||
| Nasiōṅ: Stat Unî | ||
Seduzione mortale (Sedusiòṅ murtàla) 'l è 'n film noir americàṅ in biànc e négar dal 1953 'd Otto Preminger girâ in alóra c'n un budget 'd un migliòṅ ad dòlar a 'l incìrca.
Sunt
L'ambulànsa guidàda par Frank Jessup (Robert Mitchum) la riva a tuta bala in dla vila di Tremayne a Beverly Hills: la sgnōra Catherine (Barbara O'Neil), na dóna pîna 'd bèsi, l'è scampàda par miràcul a na fuga 'd gas in dla sò cambra da lèt. In cal mumènt lè in cà a gh'éra sò marè, al scritōr Charles Tremayne (Herbert Marshall), ch'l à spuśâ la migliardària in secóndi nòsi, e sò fiōla, la Diane (Jean Simmons), abùda da la sò prima mujēr prima 'd armàgnar véduv. Par la pulisìa 'l è stâ 'n incidènt, par furtùna finî bèṅ.
Quànd Frank al partìs par turnàr a 'l uśdàł, in du a lavóra cuma infarméra anc la sò muróśa Mary (Mona Freeman), cun la relasiòṅ fra i dū tacàda da pôc, la Diane la decìd 'd andàr-'g adrē ad nascòst in màchina par pò bcar-'l in un bar in dua 'l óm 'l éra andâ a magnàr quèl. La śōvna l'è piutòst sfaciàda e la taca a dascórar sèg, in na quàlc manéra la próa a mét'r-as fra lò e la sò muróśa, vlénd tōr al sò pòst. Anc Frank, da 'l cant suo, al taca a tgnir un pē in dó scarpi, specialmènt da quànd al mòla 'l sò lavōr p'r andàr a far l'autìsta par la famìja Tremayne, andànd anc a vìvar da lōr dòp ch'la Diane la gh'iva śibî cal pòst lè. La Mary, stufa dal sò bali, la s mét c'n al sò culéga Bill Crompton (Kenneth Tobey).
La Diane la cunfèsa a Frank ch'la n s è mai cumpatìda la sò madrìgna e che chi lē la s mitrév séns àtar cóntar la relasiòṅ fra i dū s'la vgnis a savēr-al. Na nòt adiritùra la ragàsa la s preśénta da Frank in dla sò cambra dgénd-ag che la Catherine l'iva péna pruâ a masàr-la c'n al gas ma Frank al n gh créd minga. 'L óm al la para via dgénd-ag ch'al gh'à intensiòṅ ad lasàr al sò lavōr da i Tremayne.
La matìna dòp, quànd Frank al n gh'è minga, la sgnōra Catherine la tōś la màchina p'r andàr a far na scapàda a Santa Bàrbara, a 'l ùltim la dà anc un pasàǵ a sò marè. Quànd la dóna la gira la ciàṿ p'r impisàr-la, la màchina la fà 'n scat a cûl indrē faghénd un vōl śò par na riva. I dū i mōran su 'l cōlp. La pulisìa la créd ch'a pòsa ès'r un caś ad sabutàǵ e la Diane la finìs a prucès. Al sò avucàt Fred Barrett (Leon Ames) al cunsìlia a la dóna, ch'la gh diś 'd èsar stada lē a far-al e tut da par lē, ad spuśàr-as cun Frank par na stategìa difensìva.