Schiavo d'amore (film 1934)
|
C'l artìcul chè 'l è scrit in
Miranduléś |
 Of Human Bondage | ||
| Schiavo d'amore | ||
.png) La Bette Davis in na figùra dal film | ||
| Séruv 'd amōr 1934 | ||
|---|---|---|
| Regìa: John Cromwell | ||
| Scritōr: William Somerset Maugham Lester Cohen • Ann Coleman | ||
| Atōr: Bette Davis • Leslie Howard • Frances Dee Kay Johnson • Reginald Denny • Ray Atchley Reginald Sheffield • Reginald Owen • Harry Allen Desmond Roberts • Alan Hale • Charles Coleman Frank Baker • Pat Somerset • Evelyn Beresford | ||
| Müsica: Max Steiner | ||
| Léngua: Ingléś • Francéś | ||
| Dürä dal film: 78 minüt | ||
| Nasiōṅ: Stat Unî | ||
Schiavo d'amore (Séruv 'd amōr) 'l è 'n film dramàtic americàṅ dal 1934 ad John Cromwell trat da 'n rumànś dal 1915 ad William Somerset Maugham. Custâ quatarsènt-mila dòlar a 'l incìrca, al film al 'n à pò purtâ a cà dagnóra siesènt-mila.
Par la part dla prutagunìsta, la RKO Pictures la s è sintìda dir ad nò da la Katharine Hepburn, da l'Irene Dunne e da l'Ann Harding, ch'i gh'ìvan paùra par la sò caréra 'd far la part dna dunàsa. In séguit l'è stada ciamàda la Bette Davis, in prèst da la Warner Bros., ch'invéci la vliva cal rōl lè tant da studiàr 'l asènt Cockney lundinéś. Par cal rōl lè la Davis l'è stada candidàda a i Prèmi Òscar.
Sunt
[mudéfica la surzéia]Philip Carey (Leslie Howard) 'l è 'n śōvan ingléś che dòp avēr fat 'l artìsta a Parì al tórna a Lóndra quànd i gh dìśan ch'al n gh'à minga i nùmar. Druànd di bèsi ch'a gh ślunga 'n sò sîṅ, al s iscrìv a l'università par studiàr madśìna. Na sira a 'n risturànd al véd na camaréra ciamàda Mildred Rogers (Bette Davis) e a gh vîṅ n'usesiòṅ par lē tant ch'al l'invìda a 'ndàr fóra sèg na quàlc vòlta, a séna o a teàtar. La ragàsa la gh astà anc se pò la fà védar ad n èsar minga tant interesàda a lò, anc par via dal fat ch'l è sòp p'r un prubléma a 'l pē, tratànd-al mâł e fargànd-as di sò sentimènt.
'L óm però al gh'à 'l pinsēr fis par lē, tant da lasàr andàr in na quàlc manéra i sò studi, in fîṅ tant che la Mildred, quànd lò al gh admànda 'd spuśàr-al dand-ag 'l anèl, la 'l dascàrga in quàt'r e quàt'r òt dgénd ch'l'à bèla decìś ad mét'r-as c'n un negusiànt dimóndi più grand, Miller (Alan Hale). C'n al dulōr in dal cōr, Philip al gh'à da mét'r-ag na préda insìma. In séguit al s cumpàgna cun na scritōra ciamàda Norah (Kay Johnson) ch'la gh vōl bèṅ dabòṅ.
Un dè, turnàd a cà, al véd la Mildred ch'la gh diś che Miller al l'à mulàda, esénd anc che na famìja al gh l'iva bèla, ch'adès la spéta 'n putèṅ e ch'la n sà cuma far. Philip al gh dà di bèsi p'r andàr avànti, pò quànd a nas la putìna al decìd ad turnàr sèg. Ma la Mildred la n à minga pardû 'l visi e la 'l tradìs a la prima ucaśiòṅ c'n un sò amìg dl'università, Griffiths (Reginald Denny).
Philip al s mét al cōr in paś e durànt un sò tirusìni a 'l uśdàł al cgnós un pasiènt un po' strâṅ, Athelny (Reginald Owen), ch'al gh'à na fiōla puta dimóndi a mōd, la Sally (Frances Dee), dal tut difarènta da la dunàsa ch'al gh'iva prima. I dū i s fàn'n amìg, e fórsi anc quèl da piò, ma a 'l impruvìś a tórna a far-as viva la Mildred che dòp la fîṅ dla sò stòria cun Griffiths adès l'è da par lē cun la putìna e in buléta sparàda.
La dóna la dmanda a Philip ad pardunàr-la e lò, ch'l è 'n galantóm, al śibìs na cambra in du star ma 'l ròbi i èṅ cambiàdi. La dóna la próa a far-'s avànti sèg in sotvésta, avénd-al vist fréd in di sò cunfrònt, ma lò al la para via. A cal punt lè la Mildred la gh in diś ad tut i culōr, gumitànd-'g adòs un muć ad cativèri e ch'la 'l à sèmpar dasfrutâ e ridû 'd lò insém a chi àt'r óm. Al dè dòp la gh taja i quàdar ch'l iva fat a Parì, ch'a gh tgniva dimóndi, e pò, prima 'd lasàr 'l apartamènt, la gh bruśa i bòṅ che sò sîṅ al gh'iva dâ par studiàr.
In séguit 'n amìg ad Philip (Charles Coleman) al gh diś che la Mildred l'è dimóndi malàda e lò al decìd 'd andàr-la a catàr. La dóna, ch'l'à tacâ a far la putàna par vìvar, la s è bcada un brut mâł e la fà fadìga a tiràr fiâ méntar la sò putìna l'è mòrta. Philip al gh dà di bèsi, pò al gh fà na ricèta par tōr dal madśìni ma par lē l'è tròp tard.
Philip al gh la cava a finìr i sò studi da mèdag, dòp la mòrt ad sò sîṅ ch'al gh'à lasâ l'eredità, mént'r al sò prufesōr, al dutōr Jacobs (Desmond Roberts), al gh la cava a curèś'r al difèt a 'l pē. Philip al pōl finalmènt tacàr na stòria 'd amōr cun la Sally.