Sandra Bullock

C'l artìcul chè 'l è scrit in Miranduléś

La Sandra Annette Bullock (Arlington, 26 ad Luj dal 1964, a s lèś [ˈsændɹə ˈbʊlək] in ingléś), l'è n'atōra e prudutōra americàna, vinsidōra in dal 2010 'd un Prèmi Òscar e 'd un Golden Globe p'r al film biugràfic The Blind Side, in dua lē l'iva fat la part dla màd'r adutìva dal campiòṅ ad football americàṅ Michael Oher, interpretâ par Quinton Aaron. L'è stada numinàda a i Academy Award anc quàt'r an dòp par la pelìcula 'd fantasiénsa Gravity in di pagn dl'inśgnēra Ryan Stone, a fiànc ad George Clooney. La gh'à na stéla in dla Hollywood Walk of Fame.

Cunsideràda in dal 2015 la dóna più bèla dal mónd par la rivìsta People, la Bullock l'à da spés fat la part dla prutagunìsta in di sò film, esénd anc l'atōra più pagàda in di an fra 'l 2010 e 'l 2011.

Biugrafìa

Nada in Virgìgna darènt a Washington ma carsùda in Germàgna, paéś ad sò màdar Helga D. Meyer cantànta lìrica, la Sandra l'à fat al sò debùt a 'l cìnema in dal 1987 c'n al thriller 'd asiòṅ Hangmen. In dal 1993 insém a Jeff Bridges e a Kiefer Sutherland l'è stada pò prutagunìsta dal thriller The Vanishing - Scomparsa e pò dal film 'd asiòṅ Demolition Man in còpia cun Sylvester Stallone. 'L an dòp in dla part dlʼautìsta 'd bus Annie Porter l'à fat al bòt girànd insém a Keanu Reeves al thriller 'd asiòṅ Speed, film ch'l è stâ bòṅ ad muciàr sù da piò ad tarśènt-sinquànta migliòṅ ad dòlar.

In séguit la s è fata nutàr faghénd n'impiegàda dna metrupulitàna in dla cumèdia rumàntica Un amore tutto suo, in dua la s inamóra dal ric Bill Pullman, e dn'espèrta infurmàtica in dal thriller The Net - Intrappolata nella rete.

In dal 1996 a l'ém vista in dal drama Il momento di uccidere ad Joel Schumacher, filmòṅ trat da 'n rumànś ad John Grisham cun Matthew McConaughey, Kevin Spacey, Samuel L. Jackson, Kiefer Sutherland, Donald Sutherland e l'Ashley Judd, e pò in dal biugràfic Amare per sempre cun Chris O'Donnell in di pagn 'd Ernest Hemingway e lē in qvéi dl'Agnes von Kurowsky, al sò prim amōr. 'L an dòp la gira Speed 2 - Senza limiti, cun Jason Patric a 'l pòst ad Keanu Reeves, ma 'l film par la crìtica 'l è lòfi e giùst par purtàr a cà un Razzie Award cuma sequel più trist.

A la fiṅ di an Nuànta la gira 'l drama rumàntic Ricominciare a vivere cun la Gena Rowlands e 'l cumèdi Amori & incantesimi, a fiànc dla sò amìga Nicole Kidman, e Piovuta dal cielo in còpia cun Ben Affleck.

In dal 2000 la fà na puòsa in dal drama 28 giorni, a fiànc ad Viggo Mortensen, e l'agìnta dl'FBI sóta quaciadùra Gracie Hart in dla cumèdia ad sucès Miss Detective, in dua la vîṅ anc candidàda a i Golden Globe. Dū an dòp la tórna a 'l thriller psiculògic in Formula per un delitto, fat insém a Ryan Gosling e a Michael Pitt pò l'incróśa Hugh Grant in dla cumèdia rumàntica Two Weeks Notice - Due settimane per innamorarsi.

In dal 2004 la gira al drama su 'l rasìśum candidâ a siē Prèmi Òscar Crash - Contatto fisico a fiànc ad Brendan Fraser, Don Cheadle, Matt Dillon, Ryan Phillippe e Thandie Newton, méntar 'l an dòp la tórna a far la part dla Gracie Hart in Miss F.B.I. - Infiltrata speciale. In dal 2006 insém a Keanu Reeves la tōś part a 'l film rumàntic La casa sul lago del tempo e pò a 'l biugràfic Infamous - Una pessima reputazione ispirâ a la vita 'd Truman Capote, a fiànc ad Toby Jones, Daniel Craig, Jeff Daniels, la Sigourney Weaver e la Gwyneth Paltrow.

Dòp na candidadùra a i Academy Award (par Gravity) e 'n Òscar par The Blind Side, in dal 2018 la Bullock la rècita insém a la Cate Blanchett e a la Rihanna in Ocean's 8, film prudót da lē, e in dal film ad scarésa Bird Box, pò la cata spasi in dal drama cun Vincent D'Onofrio The Unforgivable (2021).

Filmugrafìa

1987 - Hangmen, regìa ad J. Christian Ingvordsen
1989 - Scontro bionico (Bionic Showdown: The Six Million Dollar Man and the Bionic Woman), regìa 'd Alan J. Levi – Film TV
1989 - Delitto al Central Park (The Preppie Murder), regìa ad John Herzfeld – Film TV
1989 - Who Shot Patakango?, regìa ad Robert Brooks
1989 - Religion, Inc., regìa ad Daniel Adams
1992 - Pozione d'amore (Love Potion No. 9), regìa ad Dale Launer
1993 - The Vanishing - Scomparsa (The Vanishing), regìa ad George Sluizer
1993 - Party di capodanno (When the Party's Over), regìa ad Matthew Irmas
1993 - Quella cosa chiamata amore (The Thing Called Love), regìa ad Peter Bogdanovich
1993 - Fiamme sull'Amazzonia (Fire on the Amazon), regìa ad Luis Llosa
1993 - Demolition Man, regìa ad Marco Brambilla
1993 - Ricordando Hemingway (Wrestling Ernest Hemingway), regìa dla Randa Haines
1994 - Speed, regìa ad Jan de Bont
1994 - Who do I Gotta Kill, regìa ad Frank Rainone
1995 - Un amore tutto suo (While You Were Sleeping), regìa ad Jon Turteltaub
1995 - The Net - Intrappolata nella rete (The Net), regìa 'd Irwin Winkler
1996 - Ladri per amore (Two If by Sea), regìa ad Bill Bennet
1996 - Il momento di uccidere (A Time to Kill), regìa ad Joel Schumacher
1996 - Amare per sempre (In Love and War), regìa ad Richard Attenborough
1997 - Speed 2 - Senza limiti (Speed 2: Cruise Control), regìa ad Jan de Bont
1998 - Ricominciare a vivere (Hope Floats), regìa ad Forest Whitaker
1998 - Amori & incantesimi (Practical Magic), regìa ad Griffin Dunne
1999 - Piovuta dal cielo (Forces of Nature), regìa ad Bronwen Hughes
2000 - Gun Shy - Un revolver in analisi (Gun Shy), regìa 'd Eric Blakeney
2000 - 28 giorni (28 Days), regìa dla Betty Thomas
2000 - Famous - Lisa Picard Is Famous, regìa ad Griffin Dunne
2000 - Miss Detective (Miss Congeniality), regìa ad Donald Petrie
2002 - Formula per un delitto (Murder by Numbers), regìa ad Barbet Schroeder
2002 - I sublimi segreti delle Ya-Ya sisters (Divine Secrets of the Ya-Ya Sisterhood), regìa dla Callie Khouri
2002 - Two Weeks Notice - Due settimane per innamorarsi (Two Weeks Notice), regìa ad Marc Lawrence
2004 - Crash - Contatto fisico (Crash), regìa ad Paul Haggis
2005 - Loverboy, regìa ad Kevin Bacon
2005 - Miss F.B.I. - Infiltrata speciale (Miss Congeniality 2: Armed and Fabulous), regìa ad John Pasquin
2006 - La casa sul lago del tempo (The Lake House), regìa 'd Alejandro Agresti
2006 - Infamous - Una pessima reputazione (Infamous), regìa ad Douglas McGrath
2007 - Premonition, regìa ad Mennan Yapo
2009 - Ricatto d'amore (The Proposal), regìa dl'Anne Fletcher
2009 - A proposito di Steve (All About Steve), regìa ad Phil Traill
2009 - The Blind Side, regìa ad John Lee Hancock
2011 - Molto forte, incredibilmente vicino (Extremely Loud and Incredibly Close), regìa ad Stephen Daldry
2013 - Corpi da reato (The Heat), regìa ad Paul Feig
2013 - Gravity, regìa 'd Alfonso Cuarón
2015 - All'ultimo voto (Our Brand is Crisis), regìa ad David Gordon Green
2018 - Ocean's 8, regìa ad Gary Ross
2018 - Bird Box, regìa dla Susanne Bier
2021 - The Unforgivable, regìa dla Nora Fingscheidt
2022 - The Lost City, regìa 'd Aaron e Adam Nee
2022 - Bullet Train, regìa ad David Leitch

Culegamènt estéran

Àtar prugèt

Wikiquote contiene citazioni di o su Sandra Bullock
Wikimedia Commons contiene file multimediali su Sandra Bullock