Vai al contenuto

Samuel L. Jackson

Da Wikipedia.

C'l artìcul chè 'l è scrit in Miranduléś Emiliàn

Jackson tòlt śò in dal 2008


Samuel Leroy Jackson (Washington, 21 ad Dicémbar dal 1948, a s lèś [ˈsæmjuəl ˈliːˌɹɔɪ ˈd͡ʒæksən] in ingléś) 'l è 'n atōr, ardupiadōr e prudutōr americàṅ, vinsidōr 'd un Prèmi Òscar a la caréra in dal 2022 dòp na candidadùra in dal 1995 par Pulp Fiction ad Quentin Tarantino ch'al 'l à dirèt anc in Jackie Brown (1997), Kill Bill: Volume 2 (2004), Django Unchained (2012), The Hateful Eight (2015) e Bastardi senza gloria (2009, chè sōl cuma vōś). 'N àtar regìsta ch'al 'l à dirèt da spés, siē vòlti, 'l è stâ Spike Lee.

'L à tacâ la sò caréra da atōr a 'l inìsi di an Utànta laurànd a teàtar cun di cupiòṅ ad Bertolt Brecht e 'd Charles Fuller e pò catànd spasi in film cuma Exterminator e Ragtime ad Miloš Forman.

Fra i sò lavōr più impurtànt, a part qvéi cun Tarantino, a 'rcurdém la cumèdia dramàtica Fa' la cosa giusta (1989), cun Danny Aiello e John Turturro, al thriller Seduzione pericolosa (1989), cun prutagunìsta Al Pacino e l'Ellen Barkin, Mo' Better Blues (1990), insém a Denzel Washington, al biugràfic Quei bravi ragazzi (1990), cun Ray Liotta in di pagn 'd Henry Hill, al fantasientìfic Jurassic Park (1993) ad Steven Spielberg, al pulisiésc Die Hard - Duri a morire (1995), in còpia cun Bruce Willis, e Star Wars - Episodio I - La minaccia fantasma (1999), cun Ewan McGregor.

Lò insém a Chris Evans (2014)

Da a an Dumìla in avànti a 'l ém vist in dal thriller Unbreakable - Il predestinato (2000), in dal drama Ipotesi di reato (2002), in dua 'l rècita cun Ben Affleck, in dal film 'd asiòṅ xXx (2002), a fiànc ad Vin Diesel e dl'Asia Argento, in dal thriller Basic (2003), cun John Travolta, in dal drama Il colore del crimine (2006), cun la Julianne Moore, in dal thriller 'd asiòṅ Snakes on a Plane (2006), in du al gh'iva da far frònt a 'n aparéć impinî ad sarpènt, in di film trat di fumét dla Marvel Comics Iron Man 2 (2010), The Avengers (2012) e Captain America: The Winter Soldier (2014), in di pagn ad Nick Fury, e in dla cumèdia Kingsman: Secret Service (2015), in còpia cun Colin Firth.

Samuel L. Jackson al gh'à na stéla in dla Hollywood Walk of Fame e quàtar nomination a i Golden Globe. Da 'l 2019 in avànti 'l è 'l atōr che c'n i sò film 'l à fat muciàr sù più bèsi ad tut, davànti a Harrison Ford.

Laureâ in art dramàtichi a 'l Morehouse College 'd Atlànta e sustenidōr dal partî demucràtic, Samuel al s è spuśâ in dal 1980 cun l'atōra LaTanya Richardson. Insém i gh'aṅ na fiōla ciamàda Zoe.

Filmugrafìa

[mudéfica la surzéia]
La parśòṅ (1994)
Ipòteśi 'd reàt (2002)
Al culōr dal crìmin (2006)
Pulidōr (2007)

Culegamènt estéran

[mudéfica la surzéia]

Àtar prugèt

[mudéfica la surzéia]
Estratto da "https://eml.wikipedia.org/w/index.php?title=Samuel_L._Jackson&oldid=166577"