Sabrina (film 1954)
|
C'l artìcul chè 'l è scrit in
Miranduléś |
 Sabrina | ||
.png) William Holden e la Hepburn in na figùra dal film | ||
| id. 1954 | ||
|---|---|---|
| Regìa: Billy Wilder | ||
| Scritōr: Samuel A. Taylor Billy Wilder • Ernest Lehman | ||
| Atōr: Audrey Hepburn • Humphrey Bogart William Holden • Walter Hampden • Joan Vohs John Williams • Martha Hyer • Marcel Dalio Marcel Hillaire • Nella Walker • Ellen Corby | ||
| Müsica: Frederick Hollander | ||
| Léngua: Ingléś • Francéś | ||
| Dürä dal film: 113 minüt | ||
| Nasiōṅ: Stat Unî | ||
Sabrina (id.) l'è na cumèdia sentimentàla americàna in biànc e négar dal 1954 ad Billy Wilder trata da 'l òvra teatràla „Sabrina Fair“ ad Samuel A. Taylor. La pelìcula, giràda c'n un budget ad dū migliòṅ e dū ad dòlar a 'l incìrca, l'è stada candidàda a siē Prèmi Òscar vinsénd però sōl qvél p'r i custùm méntar l'Audrey Hepburn e Billy Wilder i èṅ armàś a bèc sut. In dal 2002 al film 'l è stâ sarnî p'r èsar tgnû dacàt in dal National Film Registry dal Bibliutéca dal Cungrès di Stat Unî.
Par la part dal prutagunìsta masć Linus (Larry in dl'edisiòṅ itagliàna), pò finìda a Humphrey Bogart, Wilder 'l avrév vlû Cary Grant che però 'l éra impgnâ. Al regìsta al gh'à abû di prubléma c'n i senegiadōr, par via dla sò manìa ad cambiàr i cupiòṅ a 'l ùltim, e anc cun Bogart stés ch'l arév vlû recitàr insém a sò mujēr, la Lauren Bacall, e minga cun l'Audrey Hepburn. Ad lē Bogart 'l à dit “La và bèṅ, s'ta n daspiàś minga arfàr al séni dimóndi vòlti”. A sò vòlta Bogart al n s cumpatìva pròpria briśa William Holden, stés quèl anc par lò. Holden 'l iva ciapâ sènt-sinquantamìla dòlar par la part, la mità ad Bogard, méntar a la Hepburn i gh 'n ìvan dâ sōl quìndas-mila.
In dal 1995 Sydney Pollack 'l à girâ 'n arfacimènt ad cla pelìcula chè cun la Julia Ormond in dal rōl dla Sabrina, Harrison Ford in qvél ad Linus e Greg Kinnear in qvél ad David.
Sunt
[mudéfica la surzéia]La Sabrina (Audrey Hepburn) l'è na ragàsa timda e grasióśa, fiōla 'd Thomas Fairchild (John Williams), autìsta dna famìja migliardària 'd Long Island, i Larrabee: Oliver (Walter Hampden) e la Maude (Nella Walker). Da sèmpar l'è inamuràda dal fiōl più śōvan dla còpia, al bèl David (William Holden), un femnàr piutòst bòndagnìnt cun tri matrimòni andâ mâł, che però al fà fadìga anc a far-'g a mènt quànd la pasa da 'l sò bandi.
Vilìda p'r al sò amōr “impusìbil” e c'n al pinsēr 'd èsar custréta a partìr al dè dòp p'r andàr a studiàr da cōga a Parì, la Sabrina la ténta 'l suicìdi in garàǵ c'n i gas ad scàrag dal màchini ad lus di Larrabee ma la vîṅ salvàda a 'l ùltim da Larry (Humphrey Bogart), al fiōl più grand di Larrabee ch'al pasàva 'd lè par caś. Chi lò, a 'l cuntràri 'd sò fradèl, 'l à studiâ dimóndi e 'l è dvintâ 'n industriàł impurtànt in dal camp dal matèri plàstichi.
Dòp dū an pasâ a 'l èstar, la Sabrina la tórna a cà, cun dimóndi vója 'd vìvar e cun dla clas imparàda in Frància, in dal vistìr-as e in dal trucàr-as. A pâr pròpria n'atra parsòna tant che David al n l'arcgnós gnanc quànd al gh dà 'n pasàǵ in màchina vdénd-la in stasiòṅ cun la valìś. Esénd armàś culpî da la sò belésa, 'l óm al l'invìda a 'n ricevimènt a cà sua, in dua a gh sarà anc la sò muróśa Elizabeth Tyson (Martha Hyer), fiōla dna famìja cun di bèsi ch'la gh'à na piantagiòṅ ad cana da sùcar ch'la sarvìs a l'indùstria 'd Larry par far na plàstica nóva.
David al vrév dascargàr lʼElizabeth par la Sabrina a soquànt dè da 'l matrimòni ch'al gh'à cumbinâ sò fradèl e anc sò pàdar, óm a 'l antìga ch'l è dal tut cuntràri a na relasiòṅ ad David cun na puvràsa dla servitù. Durànt la discusiòṅ, a salta sù Larry par difénd'r al puśisiòṅ ad sò fradèl, ma l'è tuta na cumèdia parchè al sò piàṅ 'l è qvél ad mandàr la Sabrina a Parì da par lē par pò selebràr listés al matrimòni.