Rupert Everett

C'l artìcul chè 'l è scrit in Miranduléś

Rupert James Hector Everett (Norwich, 29 ad Maǵ dal 1959, a s lèś [ˈɹuːpət ˈɛvəɹɪt] in ingléś), 'l è 'n atōr britànig, candidâ par dó vòlti a i Golden Globe p'r al cumèdi sentimentàli Il matrimonio del mio migliore amico (1996) e Un marito ideale (1999). 'L è bòṅ ad dascórar asâ bèṅ in itagliàṅ.

Biugrafìa

Nâ da na famìja cun di bèsi, sò pàdar Anthony Michael 'l éra 'n óm 'd afâr e magiōr d'l eśèrcit britànig, Rupert al taca a lauràr cuma atōr a 'l inìsi di an Utànta, prima a teàtar e pò in televiśiòṅ.

In dal 1984 al cata 'l sucès faghénd 'l agìnt ch'al fà 'l dópi śōg in Another Country - La scelta in còpia cun Colin Firth. 'L an dòp al rècita insém a la Miranda Richardson in dal film biugràfic Ballando con uno sconosciuto e pò incóra in dal drama trat da 'n rumànś ad Gabriel García Márquez Cronaca di una morte annunciata ad Francesco Rosi in un cast ch'al mitìva insém l'Ornella Muti, Gian Maria Volonté, l'Irene Papas e la Lucia Bosè. Sèmp'r in c'l an lè al gira 'n film ambintâ a Frara durànt i an dal fasìśum, Gli occhiali d'oro, laurànd insém a Philippe Noiret, la Stefania Sandrelli, la Valeria Golino e Luca Zingaretti.

In dal 1990 in còpia cun Christopher Walken 'l è prutagunìsta dal thriller eròtic Cortesie per gli ospiti, àtar film itagliàṅ prudót p'r Angelo Rizzoli insém a gl'ingléś. Quàt'r an dòp 'l è 'l becamòrt Francesco Dellamorte ch'al s gusa l'Anna Falchi in dal film ad scarésa Dellamorte Dellamore, pò 'l è in dal cast dla cumèdia Prêt-à-Porter ad Robert Altman e in qvél dal stòric La pazzia di Re Giorgio in di pagn dal prìnsip dal Gàles.

In séguit 'l è andâ a lauràr a Hollywood par tōr part cun dimóndi sucès a la cumèdia Il matrimonio del mio migliore amico (1997) in dua 'l fà 'l amìg gay dla Julia Roberts ch'la vōl mandàr a gambi p'r ària al matrimòni dla Cameron Diaz c'n al sò èx muróś Dermot Mulroney. In dal 1998 al gira 'l pulisiésc B. Monkey - Una donna da salvare in còpia cun l'Asia Argento méntar 'l an dòp a 'l ém vist cun Joseph Fiennes e la Gwyneth Paltrow in Shakespeare in Love. In dal 1999 'l è stâ prutagunìsta 'd Un marito ideale a fiànc ad Jeremy Northam, la Cate Blanchett e la Julianne Moore, dal film trat da n'òvra 'd William Shakespeare Sogno di una notte di mezza estate, fat in còpia cun la Michelle Pfeiffer, e dla cumèdia L'Ispettore Gadget in dla part dal dutōr Grifa.

A 'l inìsi di an Dumìla al tōś part faghénd la part 'd un persunàǵ gay in dó cumèdi ch'i n èṅ minga tant piaśùdi a i crìtic: Sai che c'è di nuovo? cun la Madonna e Insieme per caso cun la Kathy Bates. In dal 2001 al tórna in Itàglia par giràr South Kensington a fiànc dl'Elle Macpherson e 'd Enrico Brignano méntar 'l an dòp 'l incróśa incóra Colin Firth in L'importanza di chiamarsi Ernest trat da 'n lavōr 'd Oscar Wilde.

In dal 2004 al rècita in dal film in custùm Stage Beauty faghénd la part dal rè Càral II. Tri an dòp 'l è Secundus in dal film fantàstic Stardust, pelìcula cun prutagunìsta Charlie Cox e la Claire Danes.

In dal 2018 'l à fat la part 'd Oscar Wilde in dal film da lò dirèt The Happy Prince - L'ultimo ritratto di Oscar Wilde.

In televiśiòṅ a 'l ém vist recitàr in soquànti série televiśìvi cuma L'ora di Agatha Christie, La principessa Daisy, Boston Legal, Il nome della rosa, The Serpent Queen e Funny Woman - Una reginetta in TV. Cuma ardupiadōr 'l à dâ la sò vōś a 'l Prìnsip Celèst in Shrek 2 e in Shrek terzo.

Al gh'à abû dal stòri cun la Susan Sarandon, l'Uma Thurman, la Béatrice Dalle e la Paula Yates anc s'l è omosesuàł dichiarâ.

Filmugrafìa

1984 - Il bugiardo innamorato (Real Life), regìa ad Francis Megahy
1984 - Another Country - La scelta (Another Country), regìa ad Marek Kanievska
1985 - La spada di Merlino (Arthur the King), regìa ad Clive Donner – Film TV
1985 - Ballando con uno sconosciuto (Dance with a Stranger), regìa ad Mike Newell
1986 - Duet for One, regìa 'd Andrej Končalovskij
1987 - Cronaca di una morte annunciata, regìa ad Francesco Rosi
1987 - Gli occhiali d'oro, regìa ad Giuliano Montaldo
1987 - Specchi del desiderio (The Right Hand Man), regìa ad Di Drew
1987 - Hearts of Fire, regìa ad Richard Marquand
1989 - Tolérance, regìa ad Pierre-Henry Salfati
1990 - Cortesie per gli ospiti (The Comfort of Strangers), regìa ad Paul Schrader
1992 - Inside Monkey Zetterland, regìa ad Jefery Levy
1994 - Dellamorte Dellamore, regìa ad Michele Soavi
1994 - Strelyayushchiye angely, regìa ad Vladimir Shteryanov
1994 - Remembrance of Things Fast: True Stories Visual Lies, regìa ad John Maybury
1994 - Prêt-à-Porter, regìa ad Robert Altman
1994 - La pazzia di Re Giorgio (The Madness of King George), regìa ad Nicholas Hytner
1996 - Dunston - Licenza di ridere (Dunston Checks In), regìa ad Ken Kwapis
1997 - Il matrimonio del mio migliore amico (My Best Friend's Wedding), regìa ad P. J. Hogan
1998 - B. Monkey - Una donna da salvare (B. Monkey), regìa ad Michael Radford
1998 - Shakespeare in Love, regìa ad John Madden
1999 - Un marito ideale (An Ideal Husband), regìa 'd Oliver Parker
1999 - Sogno di una notte di mezza estate (A Midsummer Night's Dream), regìa ad Michael Hoffman
1999 - L'Ispettore Gadget (Inspector Gadget), regìa ad David Kellogg
2000 - Sai che c'è di nuovo? (The Next Best Thing), regìa ad John Schlesinger
2001 - South Kensington, regìa ad Carlo Vanzina
2002 - L'importanza di chiamarsi Ernest (The Importance of Being Earnest), regìa 'd Oliver Parker
2002 - Insieme per caso (Unconditional Love), regìa ad P. J. Hogan
2003 - Mr. Ambassador, regìa ad Victor Levin – Film TV
2003 - Uccidere il re (To Kill a King), regìa ad Mike Barker
2004 - Stage Beauty, regìa ad Richard Eyre
2004 - People, regìa ad Fabien Onteniente
2004 - Codice Homer - A Different Loyalty (A Different Loyalty), regìa ad Marek Kanievska
2004 - Sherlock Holmes ed il caso della calza di seta (Sherlock Holmes and the Case of the Silk Stocking), regìa ad Simon Cellan Jones – Film TV
2005 - Un giorno per sbaglio (Separate Lies), regìa ad Julian Fellowes
2006 - Il Placido Don (Quiet Flows the Don), regìa ad Sergej Fëdorovič Bondarčuk
2007 - Stardust, regìa ad Matthew Vaughn
2007 - St. Trinian's, regìa ad Oliver Parker e Barnaby Thompson
2009 - St.Trinian's 2 - La leggenda del tesoro segreto (St Trinian's 2 - The Legend of Fritton's Gold), regìa 'd Oliver Parker e 'd Barnaby Thompson
2010 - Wild Target, regìa ad Jonathan Lynn
2011 - Hysteria, regìa dla Tanya Wexler
2015 - Una notte con la regina (A Royal Night Out), regìa ad Julian Jarrold
2016 - Miss Peregrine - La casa dei ragazzi speciali (Miss Peregrine's Home for Peculiar Children), regìa ad Tim Burton
2016 - Altamira, regìa ad Hugh Hudson
2018 - The Happy Prince - L'ultimo ritratto di Oscar Wilde (The Happy Prince), regìa ad Rupert Everett
2021 - Warning, regìa dl'Agata Alexander
2021 - She Will, regìa dla Charlotte Colbert
2022 - My Policeman, regìa ad Michael Grandage
2023 - Napoleon, regìa ad Ridley Scott

Culegamènt estéran

Àtar prugèt

Wikimedia Commons contiene file multimediali su Rupert Everett