Ruby (film 1977)

Da Wikipedia.

C'l artìcul chè 'l è scrit in Miranduléś Emiliàn

Ruby

La Piper Laurie in na figùra dal film
id.
1977
Regìa: Curtis Harrington
Scritōr: George Edwards
Steve Krantz • Barry Schneider
Atōr: Piper LaurieStuart WhitmanRoger Davis
Janit BaldwinCrystin SinclaireLen Lesser
Jack PerkinsEddy DonnoSal Vecchio
Müsica: Don Ellis
Léngua: Ingléś
Dürä dal film: 85 minüt
Nasiōṅ: Stat Unî


«
La PIPER LAURIE spavintóśa in "Carrie". Adès terificànta in dla part dla "RUBY".»
(Tagline dal film)


Ruby (id.) 'l è 'n film ad scarésa dramàtic americàṅ dal 1977 ad Curtis Harrington.

La pelìcula l'è custàda siesènt-mila dòlar ma la 'n à fat sù sédas migliòṅ.

Sunt

Flòrida, 1935. La Ruby (Piper Laurie) l'è la „ruba-cōr“ dla banda criminàla dal boss Jake Miller (Fred Kohler Jr.). Ólt'r a lò, l'à fat inamuràr anc Vince Kemper (Stuart Whitman) e 'l nóṿ arivâ Nicky Rocco (Sal Vecchio). Quànd Jake al vîṅ a savēr ch'la sò dóna la gh'à mis i còran cun Nicky, e ch'la spèta anc un putèṅ da lò, al decìd ad masàr al sò rivàl. Insém a i sò óm al và in dal padól in du la còpia la s éra lugàda par far dal purcarìi insém e pò 'l al cópa, un cōlp ad pistòla in dal grugn da part ad tut. Al cadàv'r al finìs in dl'àqua.

Séd'ś an dòp, finî i tèmp dal cuntrabànd, al ròbi i s èṅ misi mâł par la banda 'd Jake Miller, soquànt i èṅ finî in parśòṅ, di àt'r in daśgràsia. Sōl la Ruby Claire, èx stéla dal cìnema, la s è arfàta na puśisiòṅ esénd ch'la gh'à 'n drive-in sèmpar pîṅ. Adès l'à tòlt in cà sua Jake, ch'in cal méntar 'l è dvintâ òrub e custrét a vìvar su na scrana a rudèli, e la gh'à da mantgnìr la fiōla abùda da Nicky, la Leslie (Janit Baldwin), sórda e muta. Par lē i lavór'n anc di èx mémbar dla banda cuma Vince ch'al vénd i bijét, Jess Littinger (Eddy Donno), ch'al fà andàr al pelìculi durànt al prujesiòṅ e 'l barìsta Louie (Paul Kent), ch'al vrév gusàr-as na putàna ciamàda Lila June (Crystin Sinclaire) ch'la pénsa sōl a i bèsi e ch'l'è lè tut al siri cun di cliènt difarènt.

Quànd Jess e Louie i vìnan catâ mòrt masâ, la Ruby e Vince i tàc'n a pinsàr ch'a sia òpra 'd Nicky ch'al vōl vindicàr-as su chi al 'l à masâ. Vince al ciàma in ajùt 'l avucàt e prufesōr Paul Keller (Roger Davis) ch'al diś 'd avēr di putēr paranurmài e ch'l è bòṅ ad sintìr i spìrit di mòrt.

Culegamènt estéran