Rossano Brazzi

C'l artìcul chè 'l è scrit in Miranduléś

Rossano Brazzi (Vila Funtàna, 18 ad Setémbar dal 1916 - Róma, 24 ad Dicémbar dal 1994, a s lèś [rosˈsaːno ˈbrattsi] in itagliàṅ) 'l è stâ 'n atōr e regìsta itagliàṅ, uriginàri dla pruìnsa 'd Bulógna.

Biugrafìa

Rossano 'l à fat al sò debùt a 'l cìnema in dal 1938 tulénd part a la cumèdia Il destino in tasca cun Enrico Viarisio e la Clara Calamai. Dòp avēr girâ soquànti atri pelìculi, sèmpar cun dal parti piculìni, 'l à catâ un rōl da prutagunìsta faghénd Edmund Kean in dal drama stòrig Kean (1940). In chi an lè 'l à laurâ dimóndi anc a teàtar cuma in La cena delle beffe ad Sem Benelli.

In séguit 'l à catâ 'l sucès tulénd part a di film dal perìud "fasìsta" cuma Noi vivi e Addio Kira!, a fianc dl'Alida Valli, e Aquila nera (1946), in còpia c'n al bulgnéś Gino Cervi. Soquànt an dòp 'l à tacâ a lauràr anc a Hollywood, cuma in dal film Piccole donne (1949), cun la June Allyson e l'Elizabeth Taylor, e pò cun dal part da „latin lover“ prima in Tre soldi nella fontana (1954), insém a la Jean Peters e a Louis Jourdan, e pò in Tempo d'estate (1955), in còpia cun la Katharine Hepburn.

'L à pò laurâ cun l'Ava Gardner e Humphrey Bogart in La contessa scalza (1954), cun la Joan Crawford in La storia di Esther Costello (1957), cun John Wayne e la Sophia Loren in Timbuctù (1957), cun la Joan Fontaine in Un certo sorriso (1958), cun la Deborah Kerr in Il marito latino (1959), e cun Peter Sellers in Il magnifico Bobo (1967), da spés in di pagn d'l antagunìsta e d'l óm itagliàṅ ch'l instriàva al dóni furastéri.

Da 'l 1966 in avànti 'l à anc tintâ la strada dla regìa, tacànd da Il Natale che quasi non fu, cun Alberto Rabagliati in di pagn ad Pàdar Nadâł, sénsa però catàr al sucès. In dal 1969 'l à tòlt part a 'l film catastròfic intenasiunàł Krakatoa, est di Giava. In cal perìud lè Brazzi al s è davśinâ anc a 'l mónd dla televiśiòṅ tulénd part a série cuma Melissa e Coralba.

In di an Stanta a 'l arcurdém par la cumèdia spurcaciòna Racconti proibiti... di niente vestiti (1972), cun la Janet Agren e la Barbara Bouchet, p'r al film ad scarésa Terror! Il castello delle donne maledette (1974), in dla part dal cònt Frankenstein, e par la cumèdia Il cav. Costante Nicosia demoniaco ovvero: Dracula in Brianza (1975), a fiànc ad Lando Buzzanca e dla Sylva Koscina.

Dòp la cumèdia dramàtica Io e Caterina (1980), cun Alberto Sordi, l'Edwige Fenech e la Catherine Spaak, a 'l ém vist in di film ad scarésa Conflitto finale (1981), in dla part 'd un mònag ch'al gh'à da far fóra 'l Anticrìst Damien Thorn (Sam Neill), 7, Hyden Park - La casa maledetta, par la regìa 'd Alberto De Martino, e Fatal Frames - Fotogrammi mortali (1996), vgnû fóra dòp la sò mòrt a stant'òt an.

Fra i sò ùltim lavōr a psém nutàr anc la cumèdia Il paramedico, in dla part dal banchēr masòṅ Augusto Pinna, e 'l pulisiésc Paura su Manhattan girâ cun Tom Berenger e la Melanie Griffith.