Roscoe Arbuckle

C'l artìcul chè 'l è scrit in Miranduléś

Roscoe Conkling Arbuckle, cgnusû da spés anc cuma Fatty Arbuckle (Arbuckle al ciciòṅ) par via dal sò pēś (Smith Center, 24 ad Mars dal 1887 - New York, 29 ad Śugn dal 1933, a s lèś ['rɑːskoʊ ˈɑːrbʌkəl] in ingléś), 'l è stâ 'n atōr, prudutōr e regìsta americàṅ in di tèmp dal cìnema mut e dal gènar “slapstick” in particulàr. Al gh'à na stéla in dla Hollywood Walk of Fame.

Specialiśâ in rōi còmig, 'l à catâ 'l sucès specialmènt in di an Déś dal XX sécul, cun pelìculi cuma Il garzone di macelleria, debùt fra 'l àt'r ad Buster Keaton sò grand amìg, Coney Island, La sua notte di nozze, Buonanotte, infermiera, in di pagn ad dn'infarméra, e Fatty e i suoi milioni. In chi an lè 'l éra òṅ di artìsta più pagâ in alóra, cun la Paramount Pictures ch'in dal 1919 la gh'iva fat firmàr un cuntràt dand-ag sinc-mila dòlar a la stmana, e 'l éra secónd in fat ad sucès sōl a Charlie Chaplin.

In dal 1921 al sò stipéndi 'l éra carsû rivànd a 'n migliòṅ ad dòlar 'l an. Par festegiàr cal fat lè, Fatty 'l iva urganiśâ un party a 'l St. Francis Hotel ad San Francisco par la fèsta dal lavōr, ciamànd di sò amìg e anc di atōri śōvni cuma la Virginia Rappe dla 20th Century Fox, na sinquantìna 'd parsòni in tut. Vèrs tré óri dla basōra, Arbuckle 'l éra andâ in dla sò cambra cun la Rappe ch'l'éra ciùca par via dal bévar ch'a gh'éra a fiùm. Subìt dòp la ragàsa, mèśa cavàda śò, l'à tacâ a sigàr dgénd a la gint ch'l'éra rivàda lè a jutàr-la: «A mōr... a mōr... al m à fat mâł». Purtàda a 'l uśdàł cun di dulōr fòrt a la pansa, la Rappe l'è mòrta quàtar dè dòp.

Arbuckle 'l è andâ a prucès par tré vòlti, c'n i sò film ch'i èṅ stâ ritirâ, vgnénd asòlt al 12 'd avrìl dal 1922. La sò caréra a Hollywood l'éra però praticamènt finìda. 'L à pruâ a turnàr da regìsta druànd prima 'l pseudònim ad Will B. Good (ch'a sòna cuma A farò 'l brâṿ) e pò cuma William Goodrich, sénsa però turnàr a 'l sucès.

'L è mòrt a quarànta-siē an 'd infàrt mént'r al durmìva.

Culegamènt estéran

Àtar prugèt

Wikiquote contiene citazioni di o su Roscoe Arbuckle
Wikimedia Commons contiene file multimediali su Roscoe Arbuckle