Robert Smith

C'l artìcul chè 'l è scrit in Miranduléś

«

So savage with red desperation I clench my hands, you draw your claws, a hidden rage consumes my heart, fueled by years of wasted time, I close my eyes and tense myself and screaming throw myself in fury over the edge and into your blood, tear at flesh and rip at skin and smash at doubt, I have to break you.»

(EN)(Doubt, 1981)

«

Acsè salvàdag e rós par la disperasiòṅ a stric al maṅ, tè at tîr fóra 'l grifi, n'arlìa lugàda la m frusta 'l cōr, carsùda in dal tèmp dòp di an butâ via, a sèr i mè òć e a ténd i mùscui e sigànd a m fic incòst in dla fùria fóra cuntról e in dal tò sànguv, sbrandlàr la carna e sćiancàr la pèl e schisàr al dubi, a gh'ò da far-'t a pès.»

(MUD)

Robert Smith (Blackpool, 21 'd Avrìl dal 1959) l'è 'n cantànt e sunadōr ingléś, leader di The Cure, ùnic mémbar dal grup ch'al gh'è stâ sèmpar e aṿtōr praticamènt ad tut i tèst e 'd tut al mùśichi. 'L è bòṅ ad sunàr dimóndi strumènt anc s'in di cuncèrt 'l è impgnâ cun la chitàra. 'L à dâ la vōś a tut i pès dla banda a part la cover ad Foxy Lady dal disc post-punk dal 1979 Three Imaginary Boys cantàda p'r al basìsta Michael Dempsey.

'L è cgnusû anc par la sò manéra 'd preśentàr-as piutòst uriginàla: rusét śbavśâ a i làbar, cavìi cutunâ tut daspatnâ, òć piturâ, camìśi larghi e négri e scarpi 'd ginàstica a i pē. Al regìsta itagliàṅ Paolo Sorrentino 'l à tòlt ispirasiòṅ da 'l sò look p'r al persunàǵ dal cantànt dark Cheyenne fat par Sean Penn in dal film This Must Be the Place. Anc Tim Burton 'l à pinsâ a lò quànd 'l à girâ Edward mani di forbice cun prutagunìsta Johnny Depp.

'L è spuśâ sénsa fiōi cun na ragàsa cgnusùda a i tèmp dla scóla, la Mary Poole, ch'la cumparìs anc in dal vìddeo ad Just Like Heaven, òṅ di pès più cgnusû dal grup.

Fra 'l 1982 e 'l 1984 'l à sunâ cuma chitarìsta anc in dal grup di Siouxsie and the Banshees tulénd al pòst ad John McKay ch'al s 'n éra andâ a 'l impruvìś. Insém a Steven Severin, basìsta ad cla banda chè, 'l à dâ vita a 'l prugèt The Glove in dal 1983 faghénd vgnir fóra anc un disc.