Robert Kerman

C'l artìcul chè 'l è scrit in Miranduléś

Robert Charles Kerman, cgnusû anc cuma Richard Bolla (New York, 16 ad Dicémbar dal 1947 - New York, 27 ad Dicémbar dal 2018), 'l è stâ 'n atōr americàṅ, ad film p'r al cìnema ma anc dimóndi ad qvéi pòran. Ad qvi lè al 'n à fat sènt-stantasèt fra i an Stanta e Utànta, tacànd da Quella viziosa di mia moglie dal 1975 e vinsénd anc un prèmi in dal 1982 par la sò part in Outlaw Ladies, pelìcula finìda pò in dla XRCO Hall of Fame.

Sèmp'r in chi an lè 'l à girâ soquànt film dal cìnema tradisiunàł, specialmènt qvéi dal gènar scarésa. Fra 'l sò pelìculi più impurtànti, in gènar giràdi in Itàglia, a 'rcurdém al dramàtic Concorde Affaire '79 (1979), cun prutagunìsta James Franciscus e la Mimsy Farmer, al catastròfic Airport '80 (1979), insém a Alain Delon, e i tri film su i canìbai: Cannibal Holocaust (1980), a fiànc ad Luca Barbareschi, Mangiati vivi! (1980), cun la Janet Agren e la Paola Senatore, e Cannibal Ferox (1981) par la regìa 'd Umberto Lenzi.

In séguit a 'l ém vist in dal śal L'ora che uccide (1982), in dal film ad scarésa Dimensione terrore (1986), e in dal thriller Senza via di scampo (1987) in dua 'l à catâ Kevin Costner, Gene Hackman e la Sean Young. Al sò ùltim film 'l è stâ Spider-Man (2002) ad Sam Raimi cun lò in di pagn dal capitàṅ 'd un rimurchiadōr e Tobey Maguire in qvéi ad Spider-Man.

Prima 'd murìr ad diabēt a stant'un an, Kerman 'l à recitâ anc in soquànti série televiśìvi cuma Hill Street giorno e notte, Simon & Simon, Hunter e New York New York.