Rob Roy (film)
|
C'l artìcul chè 'l è scrit in
Miranduléś |
 Rob Roy | ||
.png) Roth, Hurt, Cox e Neeson in na figùra dal film | ||
| id. 1995 | ||
|---|---|---|
| Regìa: Michael Caton-Jones | ||
| Scritōr: Alan Sharp | ||
| Atōr: Liam Neeson • Jessica Lange • John Hurt Tim Roth • Eric Stoltz • Andrew Keir Brian Cox • Brian McCardie • Gilly Gilchrist Vicki Masson • Jason Flemyng • Ewan Stewart | ||
| Müsica: Carter Burwell | ||
| Léngua: Ingléś | ||
| Dürä dal film: 139 minüt | ||
| Nasiōṅ: Régn Unî • Stat Unî | ||
Rob Roy (id.) 'l è 'n film biugràfic e aventuróś britànig e americàṅ dal 1995 ad Michael Caton-Jones ch'al cònta la vita ad Rob Roy MacGregor, brigànt scuséś dal XVIII sécul. 'L atōr Tim Roth, ch'in dla pelìcula al fà la part 'd Archibald Cunningham, 'l è stâ candidâ a 'l Prèmi Òscar cuma atōr minga prutagunìsta.
Custâ vint-i-òt migliòṅ ad dòlar, al film al 'n à pò muciâ sù dagnóra sinquànta-nóṿ.
Sunt
[mudéfica la surzéia]Robert Roy McGregor, dit Rob Roy (Liam Neeson), 'l è 'n brigànt scuséś ch'al fà fadìga a tiràr avànti insém a i óm dal sò clan, a sò fradèl Alasdair (Brian McCardie), a sò mujēr Mary (Jessica Lange) e a i sò fiōi pìcui in un vilàǵ spardû in di Highland. Par vìvar, e par dar da magnàr a la sò gint, na quàlc vòlta al pòrta via dal vachi a 'l marchéś ad Montrose, James Graham (John Hurt), che dòp 'l At 'd Ugnòṅ (1707) e i tèmp dla glurióśa rivulusiòṅ al gh'à 'l cuntròl su cal tèri lè.
Par cumbàtar la miśèria dal sò clan, Roy al decìd ad dmandàr in prèst a 'l marchéś mila sterlìni, in manéra 'd avēr di bèsi abàsta par cumpràr dal bistiàm, par pò védar-'l a 'n prèsi più élt faghénd di frut, dand in garansìa la sò tèra, quatarsènt biólchi a 'l incìrca, e un quìnt di prufìt. Rob al manda al sò amìg Alan MacDonald (Eric Stoltz) a tōr-i da 'l cuntàbil dal marchéś, Killearn (Brian Cox), sénsa savēr che chi lò, 'd acòrd c'n al delinquènt ingléś Archibald Cunningham (Tim Roth) ch'al s éra śibî ad lauràr par cònt ad Graham, al gh'à intensiòṅ ad fargàr-al.
Méntar Alan 'l è drē a turnàr a 'l vilàǵ, Archibald al gh tira na trapla, masànd-'l in un bòsc e purtànd-ag via i bèsi. Dòp avēr lugâ 'l cadàvar, 'l ingléś al s tîṅ incòsa par lò, sénsa dir gnint a 'l marchéś ch'al créd che Alan al sia scapâ via in Amèrica c'n al sò prèst. Graham al fà ciamàr Rob par dascórar ad cal fat lè, śibénd-ag pò 'n pat: par srar 'n òć al vōl na sò testimuniànsa falsa su 'l fat ch'al duca 'd Argyll (Andrew Keir), sò nemìg, al sia 'n jacubìta, a dir un sustenidōr ad Jàcum Fransésc Eduàrd Stuart, fiōl d'l ùltim rè catòlig Jàcum II 'd Inghiltèra, in cal méntar spudestâ, e dla Marìa ad Mòdna.
Dòp che Rob al gh diś ad nò, par na questiòṅ 'd unōr, al marchéś ad dà 'l órd'n a Cunningham ad far-'g-la pagàr.