River Phoenix

C'l artìcul chè 'l è scrit in Miranduléś

River Jude Bottom, cgnusû méj cuma River Phoenix (Madras, 23 'd Agóst dal 1970 - West Hollywood, 31 'd Utóbar dal 1993, a s lèś [ˌɹɪvəɹ ˈfiː.nɪks] in ingléś) 'l è stâ 'n atōr, muśicìsta e ativìsta americàṅ, candidâ a i Prèmi Òscar e a i Golden Globe dal 1989 p'r al drama Vivere in fuga par la part ad Danny Pope, un ragàs ad talènt ch'al sòna 'l piàṅ cun di genitōr cun di prubléma cun 'l FBI.

In dla sò caréra, ch'l'è tacàda prèst a dód'ś an c'n al telefìlm Sette spose per sette fratelli, 'l è stâ bòṅ ad vìnsar la cópa Volpi a 'l 48^śum Fèstival ad Venèsia p'r al drama Belli e dannati in dua lò al fava 'n gigolò c'n un prubléma 'd indurmersamènt fàcil, a fiànc dal sò amìg Keanu Reeves.

Biugrafìa

River al nas in un paiśèṅ d'l Òregun da na còpia hippy americàna. Sò pàdar John Lee Bottom 'l è 'n catòlig dla Califòrgna méntar sò màdar Arlyn Sharon Dunetz l'è n'ebrèja dal Bronx cun di urìgini rusi e ungheréśi. 'L è 'l prim ad sinc fiōi, tri atōr cuma lò: la Rain (1972), Joaquin (1974) e la Summer (1978), ólt'r a la Liberty (1976).

'L à fat al sò debùt a 'l cìnema in dal 1985 c'n al film ad fantasiénsa Explorers in còpia cun Ethan Hawke. 'L an dòp a 'l ém vist in dal drama Stand by Me - Ricordo di un'estate, trat da 'l racònt „Al còrp“ ad Stephen King, e in d'l aventuróś Mosquito Coast cun prutagunìsta Harrison Ford. In dal 1988 'l à recitâ c'n al rōl prinsipàł ad Jimmy Reardon in dla cumèdia sentimentàla Le ragazze di Jimmy, in dal film ad spiunàǵ Nikita - Spie senza volto, in dla part 'd un śōvan ch'al vîṅ a savēr ch'i sò genitōr i èṅ dal spii dal KGB, e in dal drama Vivere in fuga ch'al gh fruta na candidadùra a i Academy Award. 'L an dòp 'l à catâ spasi in dal film 'd asiòṅ Indiana Jones e l'ultima crociata a fiànc 'd Harrison Ford e ad Sean Connery.

In di an Nuànta al lavóra cun Lawrence Kasdan in dla cumèdia négra Ti amerò... fino ad ammazzarti, cun prutagunìsta Kevin Kline, cun la Nancy Savoca in dal drama Dogfight - Una storia d'amore, in còpia cun la Lili Taylor, e cun Gus Van Sant in Belli e dannati e in Cowgirl - Il nuovo sesso, in dua 'l à fat un camèo incruśànd l'Uma Thurman, l'Angie Dickinson, Keanu Reeves, John Hurt e sò surèla Rain.

'L è mòrt la nòt 'd Halloween dal 1993 par n'overdose ad speedball (un cocktail ad dròghi ch'al misćiàva insém eruìna e cucaìna) ch'al gh'iva sōl vint-a-tri an. Al film minga finî ch'l éra drē a giràr in alóra, al thriller Dark Blood cun Jonathan Pryce e la Karen Black, 'l è vgnû fóra sōl in dal 2012, diretamènt su YouTube parchè al regìsta George Sluizer al n à minga catâ di distributōr.

River 'l éra 'n sustenidōr di dirìt dal bèsti e 'l éra vegàṅ.

Filmugrafìa

1985 - Explorers, regìa ad Joe Dante
1985 - Patto di amore e di morte (Surviving: A Family in Crisis), regìa ad Waris Hussein – Film TV
1986 - Circle of Violence: A Family Drama, regìa ad David Greene – Film TV
1986 - Stand by Me - Ricordo di un'estate (Stand by Me), regìa ad Rob Reiner
1986 - Mosquito Coast (The Mosquito Coast), regìa ad Peter Weir
1988 - Le ragazze di Jimmy (A Night in the Life of Jimmy Reardon), regìa ad William Richert
1988 - Nikita - Spie senza volto (Little Nikita''), regìa ad Richard Benjamin
1988 - Vivere in fuga (Running on Empty), regìa ad Sidney Lumet
1989 - Indiana Jones e l'ultima crociata (Indiana Jones and the Last Crusade), regìa ad Steven Spielberg
1990 - Ti amerò... fino ad ammazzarti (I Love You to Death), regìa ad Lawrence Kasdan
1991 - Belli e dannati (My Own Private Idaho), regìa ad Gus Van Sant
1991 - Dogfight - Una storia d'amore (Dogfight), regìa dla Nancy Savoca
1992 - I signori della truffa (Sneakers), regìa ad Phil Alden Robinson
1993 - Quella cosa chiamata amore (The Thing Called Love), regìa ad Peter Bogdanovich
1993 - Cowgirl - Il nuovo sesso (Even Cowgirls Get the Blues), regìa ad Gus Van Sant
1993 - Silent Tongue, regìa ad Sam Shepard
2012 - Dark Blood, regìa ad George Sluizer

Culegamènt estéran

Àtar prugèt

Wikimedia Commons contiene file multimediali su River Phoenix