Rivelazione finale
|
C'l artìcul chè 'l è scrit in
Miranduléś |
 Full Disclosure | ||
| Rivelazione finale | ||
 La Madsen e Ward in na figùra dal film | ||
| Rivelasiòṅ finàla 2001 | ||
|---|---|---|
| Regìa: John Bradshaw | ||
| Scritōr: Tony Johnston | ||
| Atōr: Fred Ward • Rachel Ticotin • Virginia Madsen Christopher Plummer • Penelope Ann Miller Kim Coates • Kevin Jubinville • Nicholas Campbell Dan Lauria • Roberta Maxwell • Patrick Gallagher Yanna McIntosh • Elisa Moolecherry • Balázs Koós Yan Feldman • Will Corno • A. Frank Ruffo | ||
| Müsica: Claude Desjardins • Eric N. Robertson | ||
| Léngua: Ingléś | ||
| Dürä dal film: 97 minüt | ||
| Nasiōṅ: Cànada | ||
Rivelazione finale (Rivelasiòṅ finàla) 'l è 'n thriller canadéś dal 2001 ad John Bradshaw girâ in Untàri.
'L è stâ fat in dal 1999 ma al gh'à abû di prubléma 'd distribusiòṅ, vgnénd pò fóra dū an dòp diretamènt p'r al marcâ d'l home video.
Sunt
[mudéfica la surzéia]Frank Sommer (A. Frank Ruffo) 'l è 'n prufesōr 'd università americàṅ ch'al s bat par la paś fra palestinéś e iśraegliàṅ. Anc s'l è spuśâ cun tri fiōi, al gh'à 'l “visiét” esénd ch'al gh cata gust a far sès cun di sò studènt masć in dla sò limousine mandànd al sò autìsta Larry Quinn (Patrick Gallagher) a far-'s un gir in cal méntar. Un dè però, méntar 'l è insém a dū àrab śōvan, Ankash Barezai (Yan Feldman) e Syed Rakha (Will Corno), chi lōr dū i al stròsan méntar Larry al vîṅ dstraviâ da na dóna lè darènt ch'la fà finta 'd avēr un prubléma cun la sò màchina.
La capa dla redasiòṅ dal giurnàł New York Daily Herald, la Brenda Hopkins (Virginia Madsen), la vōl scrìv'r un pès su cal fat lè ma la n è minga sicûra se dar 'l incàr'g a John McWhirter (Fred Ward), ch'al gh'à di prubléma cun la butìglia, o a 'l sò culéga più śōvan e piutòst stròns Carl Smythe (Kevin Jubinville), anc s'al sò culéghi, la Jean (Elisa Moolecherry) e la Penny (Yanna McIntosh), i èṅ da la banda dal prim. John però al gh'à 'n as in dla mandga: 'n agìnt dla CIA, Clive Carter (Dan Lauria), p'r un quàlc mutìṿ al gh ślunga di infurmasiòṅ riservàdi su 'l caś.
Na sira, turnànd in dal sò apartamènt, John al gh cata dèntar dū sò vèć amìg radicài da i tèmp dl'università, Simon Brauman (Nicholas Campbell) e la Sarah Archer (Roberta Maxwell). Chi lōr dū, ch'i aṅ di rapòrt anc cun Sendero Luminoso, i s èṅ purtâ sèg na sèrta Rosa (Rachel Ticotin) e i dmàndan a 'l giurnalìsta ad tgnir-la a cà sua par soquànt dè par lugàr-la. John 'l è in dèbit sèg parchè trént'an prima chi lōr, insém a la sò èx muróśa e a 'l fradèl dla Sarah, Randy (James Bulliard), i ìvan pinsâ 'd far 'n atintâ cun na bómba a la stasiòṅ radiufòniga dl'università in dua però la ragàsa 'd John l'iva pardû la vita quànd al bómba la gh'è scupiàda in maṅ. In parśòṅ i èṅ finî sōl Simon e la Sarah ch'i s èṅ fat soquànt an sénsa mai far al nóm ad John par prutèś'r-al. Qvél ch'i n sànan minga 'l è ch'invéci John 'l iva fat i sò nóm a la pulisìa par salvàr-as. Da cal mumènt lè lò 'l è dvintâ 'n infurmadōr dla CIA tant che Carter al gh pasa dal nutìsi segréti dal vòlti, cum anc al fóto di sasèṅ ad Sommer e dla sgnōra ch'la i à jutâ. A s trata pròpria dla dóna ch'al gh'à in cà e ch'la n s ciàma minga Rosa ma Armiti Khalq (Rachel Ticotin) e l'è na libanéśa ch'l'à studiâ in Califòrgna.
Al masamènt ad Sommer 'l è stâ urganiśâ da i servìsi segrét dl'Algerìa, adès che però i nóm di sasèṅ i èṅ finî su 'l giurnàł, p'r al servìsi 'd John, i mémbar dl'ambasiàda in di Stat Unî dal paéś àrab, Marek (Damon D'Oliveira) e Hosni (Hrant Alianak), i gh'aṅ da mét'r a taśēr incòsa. Inóltar gl'agìnt d'l FBI Robert Lecker (Christopher Plummer) e Dave Lewis (Kim Coates) i gh'èṅ bèla adòs. Cun 'l ajùt dla Michelle (Penelope Ann Miller), na dóna 'd un catìṿ mai vist e ch'la turtùra anc par far-as dar di nóm, chi lōr i urganìś'n al masamènt ad Simon, Ankash e Syed, pò l'è la vòlta dla Sarah. Adès in perìcul a gh'è la vita 'd John ch'al gh'à in cà lʼArmiti, n'atra mémbra dal grup ch'la gh'à da murìr.