Ripple effect
|
C'l artìcul chè 'l è scrit in
Miranduléś |
 Ripple Effect | ||
 Forest Whitaker in na figùra dal film | ||
| Efèt a cadéna 2007 | ||
|---|---|---|
| Regìa: Philippe Caland | ||
| Scritōr: Philippe Caland | ||
| Atōr: Philippe Caland • Minnie Driver • Kali Rocha Virginia Madsen • Forest Whitaker • Kip Pardue John Billingsley • Joanna Krupa • Orlando Seale | ||
| Müsica: Anthony Marinelli | ||
| Léngua: Ingléś | ||
| Dürä dal film: 87 minüt | ||
| Nasiōṅ: Stat Unî | ||
Ripple Effect (Efèt a cadéna) 'l è 'n film dramàtic americàṅ dal 2007 scrit, dirèt e prudót par Philippe Caland ch'l à anc fat la part dal prutagunìsta.
La pelìcula, giràda c'n un budget stimâ ad dódas migliòṅ ad dòlar, la 'n à pò fat sù quatórdas-mila in di cìnema dal Nòrd-Amèrica.
Sunt
Amer Atrash (Philippe Caland) 'l è 'n stilìsta libanéś ch'l à fat sucès in di Stat Unî in du 'l è andâ a star da śōvan e in du 'l à spuśâ la Sherry (Virginia Madsen) ch'la gh'à dâ na fiōla pìcula ciamàda Charley (Charley Mae Caland). A 'l impruvìś però la sò vita la và a rótui quànd un sò afàr al và a muć, lasànd-'l in un mâr ad dèbit.
'L óm al próa a dmandàr ajùt a 'n sò vèć amìg, Brad (John Billingsley), un tisi pîṅ 'd bèsi piutòst permalóś che però al s tira indrē a 'l ùltim minùt e i sò culaburadōr, ch'i n vìnan minga pagâ, i èṅ custrét a pascàr lavōr da di atri bandi. Anc in cà al ròbi i n vànan minga bèṅ parchè Amer al n gh'è mai e, quànd al gh'è, al pénsa sèmp'r a i sò prubléma o a 'l lavōr, tant ch'la Sherry la s laménta sèg e cun la sò amìga Alex (Kali Rocha) ad cal fat chè e che lò al n pasa mai dal tèmp cun la putìna ch'la patìs dimóndi la situasiòṅ.
In criśi cun sò mujēr, Amer al taca a pinsàr a 'n fat sucès quìnd'ś an prima ch'l al turménta tròp. Na nòt in màchina 'l iva mis sóta 'n óm ch'al curìva in strada, Philip (Forest Whitaker), sénsa pò dar-ag sucōrs. D'in alóra chi lò 'l è stâ custrét a vìvar su na scrana a rudèli, jutâ da la sò muróśa Kitty (Minnie Driver) ch'la canta e la sòna in lucài cic par ciapàr quèl.
P'r ès'r in paś cun la sò cusînsa, Amer al vrév andàr a dmandàr pardòṅ a Philip, cuntànd-'g incòsa. Na sira Amer al và a cà cun la Kitty e Philip, cgnusû in un bar, cun la dóna ch'la cardìva che Amer al vlis far sès sèg, un quèl che 'l sò óm al gh pirmitìva par via dal sò cundisiòṅ. Quànd Amer però al s tira indrē, la dóna la 'l para via uféśa. In séguit al stilìsta al gh la cava finalmènt a dascórar da par lò cun Philip, vudànd al sac, cun lò ch'al la tōś bèṅ pardunànd-al. A dir-la tuta anc Philip al gh'à 'n segrét mai cuntâ rispèt a la nòt d'l incidènt.