Restless (film 2003)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Inquiétudes
Restless
Restless (film 2003).png
La Brigitte Catillon in na figùra dal film
Agitâ
2003
Regìa: Gilles Bourdos
Scritōr: Ruth Rendell
Gilles Bourdos • Michel Spinosa
Atōr: Grégoire ColinJulie OrdonCarlo Brandt
Brigitte CatillonLaurent GrévillEtienne Chicot
Frédéric PierrotMathieu AmalricHervé Briaux
Müsica: Alexandre Desplat
Léngua: Francéś
Dürä dal film: 137 minüt
Nasiōṅ: Frància


«
A gh'ém tut quèl da lugàr.»
(Tagline dal film)


Restless (Agitâ) 'l è 'n thriller dramàtic francéś dal 2003 ad Gilles Bourdos trat da 'n rumànś dla Ruth Rendell da 'l tìtul „A Sight for Sore Eyes“.

Sunt

Da quànd 'l éra pìcul (François Fugagnoli), Bruno Keller (Grégoire Colin) 'l è carsû in na famìja ch'la s quistiunàva sèmpar e la bviva anc, cun sò pàdar (Bernard Bloch) ch'al dava dla rója a sò màdar (Lucrèce La Chenardière) ch'la sigàva sèmpar. Lò, par difénd'r-as, al tulìva sèg al sò stramàs p'r andàr a durmìr da n'atra banda p'r a n sintìr briśa al litgàdi. Adès ch'l è 'n śuvnòt e ch'i sò genitōr i n gh'èṅ piò al viṿ in d'l apartamènt ad sò sîṅ (Etienne Chicot) che però 'l al trata mâł in mèś a na bvuda e cl'atra. Bruno al stùddia a la facultà dal Bèli Arti e 'l à mis sù n'usesiòṅ p'r al biànc, tant ch'al vōl pituràr tut i mur ad cal culōr lè. Un dè al decìd ad śgar via tut i mòbii 'd cà e 'd śmartlàr par śbragàr-i, parchè vèć e brut a sò dita, e faghénd acsè al s litga 'd brut cun sò sîṅ parchè al gh tgniva dimóndi esénd stâ fat a maṅ da di artigiàṅ e cumprâ cun di sacrifìsi da sò pàdar. Bruno, ch'l è dvintâ 'n sociopàtig, al decìd ad cupàr-al mént'r al pònsa su 'l divàṅ par pò lugàr al cadàvar da drē da 'n mur.

L’Elise Gardet (Julie Ordon) l'è na ragàsa 'd daśdòt, fiōla 'd 'n óm burghéś ciamâ Richard (Laurent Grévill). Quànd la gh'iva sèt an (Mathilde Blache) l'è stada testimòni dal masamènt ad sò màdar Béatrice da part 'd un furastēr anc s'a 'l inìsi al suspetâ par la pulisìa 'l éra sò pàdar, anc p'r al fat ch'al sò matrimòni 'l éra in criśi. Adès Richard al s è arfàt na vita spuśànd la psico-terapéuta Anne (Brigitte Catillon), na dóna ch'la stà sèmp'r adòs a l’Elise e la cuntròla tut qvél ch'la fà. Un dè la ragàsa la cgnós Bruno a na móstra 'd art e i dū i s inamóran, faghénd ustiàr dimóndi l’Anne ch'la n è minga prònta a 'l fat che lē la n sia piò na putìna. Inóltar cal ragàs lè, che lē la créd ch'al s ciàma Serge Navoni, al n gh piàś pròpria par gnint e, quànd la véd la sò màchina rósa in gir, la gh la riga cun la ciàṿ.

La Dominique Verdier (Bérangère Bonvoisin) l'è la respunsàbila di lavōr in na vila cumpràda in dal sud dla Frància da di itagliàṅ ch'i gh stànan sōl dū méś a 'l an. La dóna la dà 'l incàr'g a Bruno ad tiràr sù 'n mur in fónd a 'n andavèṅ par far un tanabùś. Al ragàs al decìd 'd aprufitàr dal fat ch'la vila la sia vōda par lugàr-'g al cadàv'r ad sò sîṅ. Ad nòt al carga 'l còrp su la màchina e 'l al pòrta dènt'r a la vila ma 'l gh'à na buta surpréśa quànd 'l è là. Al cata la Dominique ch'la spetàva 'l sò amànt Kamel (Marc Jarousseau), al sò séruv sadumàś, par far sès. Avēnd la sgnōra dâ 'n uciàda a 'l cadàvar, Bruno 'l è custrét a masàr-la, lugànd pò i dū mòrt in un pusòt là 'd fóra.

In cal méntar la Dominique la cata 'l còrp sénsa vita 'd David Lamblin (Frédéric Pierrot), amìg ad famìja, ch'al s è masâ dòp avēr cunfesâ a sò mujēr 'd èsar stâ lò al sasèṅ dla Béatrice, esénd in alóra 'l sò amànt. La dóna la fà fadìga a supurtàr al fat e la taca a bévar, pò la sira la sèra dèntar l’Elise ch'la gh'iva apuntamènt cun Bruno. La ragàsa la fà però in tèmp a ciamàr c'n al telefunèṅ al sò muróś ch'al riva c'n un cusèṅ in maṅ.

Culegamènt estéran