Rabbit Hole

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Rabbit Hole
Rabbit Hole
Rabbit Hole.png
Aaron Eckhart e la Nicole Kidman in na figùra dal film
La tana dal cunèṅ
2010
Regia: John Cameron Mitchell
Scritùr: David Lindsay-Abaire
Atùr: Nicole KidmanAaron EckhartDianne Wiest
Sandra OhMiles TellerTammy Blanchard
Jon TenneyGiancarlo EspositoStephen Mailer
Müsica: Anton Sanko
Lengua: Ingléś
Dürä dal film: 90 minüt
Nasiòṅ: Stat Unî


«
L'ùnica manéra ad saltàr-'g-an fóra 'l è pasàr-'g in mèś.»
(Tagline dal film)


Rabbit Hole (La tana dal cunèṅ) 'l è 'n film dramàtic americàṅ dal 2010 ad John Cameron Mitchell trat da 'n lavōr teatràł ad David Lindsay-Abaire ch'al gh'à frutâ al Prèmi Pulitzer.

Custâ sinc migliòṅ ad dòlar, al film al 'n à pò muciâ sù àtar tant.

Sunt

Howie Corbett (Aaron Eckhart) e sò mujér Rebecca dita Becca (Nicole Kidman) i aṅ patî una dal più bruti daśgràsi ch'a sa gh sia a 'l mónd: al sò putèṅ ad quàt'r an, Danny (Phoenix List), tgnénd adrē a 'l sò caṅ mént'r al curìva in giardèṅ, 'l è finî in strada sóta na màchina guidàda da 'n studènt prònt p'r iscrìv'r-as a 'l culéǵ, Jason (Miles Teller), murénd schisâ. Dòp òt méś al dulōr 'l è sèmpar cumpàgn ma i dū spóś i próan a tgnir bòta e a tiràr avànti in na manéra difarènta. La Rebecca la s è misa a tgnir adrē a 'l òrt e a far dal tórti ma la n s cumpatìs gnint ch'a gh faga 'rcurdàr sò fiōl, cuma di śōg o dal foto, tant ch'l'à anc śbulugnâ 'l caṅ a sò màdar Nat (Dianne Wiest) e la vrév véndar la cà. Inóltar la n và più fóra la sira cun gl'amìg dgénd ad nò quànd i la ciàman parchè «la gh'à sèmpar quèl da far» a sò dita. Howie invéci al gh'à biśógn a tgnir-'s-al sèmpar bèṅ in mènt e al véd da spés di sò filmâ ch'al gh'à in dal telefunèṅ ad quànd la famìja l'éra cuntènta tut insém. Al ròbi fra i dū i vànan dimóndi mâł, la Rebecca la n gh'à più vója 'd śnum e 'd afèt, figurém-as ad far 'l amōr, mént'r a lò a gh piaśrév avér 'n àtar fiōl.

L’Izzy (Tammy Blanchard), la surèla dla Rebecca ch'i s bècan sèmpar, la diś ch'la gh'à 'd avér fiōl c'n un muróś nóṿ cgnusû da pôchi stmani e ch'al fà 'l muśicìsta, Auggie (Giancarlo Esposito). Par lē la vita l'è drē a fiurìr minga par la Rebecca ch'la gh pòrta i vistî dal sò putèṅ tut lavâ e stirâ ma ch'l'atra la n in vōl briśa parchè sò fiōl al n è minga Danny e pò a n s sà gnanc s'a sarà 'n masć o na fémna. A la Rebecca a n gh armàgn àtar da far che śbat'r incòsa in dal casunét dal rusc. La Nat la próa a tiràr-la sù dascurénd ad Dio e dla fēd ch'la l'à jutàda quànd 'l à pardû sò fiōl ma la Rebecca la s arlìa sèg parchè par lē Dio, s'anc al gh fus, 'l è 'n sàdig bastàrd e pò lē la n gh'à gnanc da parmét'r-as ad paragunàr la mòrt ad sò fradèl, ch'l iva bèla pasâ i trénta e 'l éra anc un drugâ pódag, cun qvéla 'd sò fiōl. La màdar la gh diś pò che dòp tant tèmp al magòṅ al n pasa minga ma ta gh pó far i cònt: 'l è cuma na préda in bisàca, dal vòlti ta t daśméntag che ta gh l'à ma pò at mét al maṅ dèntar e la préda l'è sèmpar lè, a 'l sò pòst.

Par cuntintàr Howie la và sèg a di incóntar in dua i s càtan di genitōr ch'i aṅ patî di dulōr cumpàgn a i lōr par dal terapìi 'd grup. In mèś a tuta cla gint là a gh'è anc la Gabby (Sandra Oh) cun sò marè ch'i gh vànan da nóṿ an ad fila tant che la Rebecca la i cumpatìs dimóndi p'r a n dir ad pèś. Quànd chi lē la sènt òṅ ch'al diś ch'al s insùnia sò fiōla da spés e ch'al cata cunfòrt pinsànd che Dio al l'à vluda sèg parchè al gh'iva biśógn d'n àt'r angiulèṅ darènt a lò, la Rebecca la n in pōl piò, la s tōś sù e la và via. A sucéd pò che lì lē la cata Jason in bibliutéca e la taca a dascórar sèg in un parc, la n gh dà mia la cólpa parchè l'è stada na daśgràsia, piutòst la vrév lèś'r un sò fumét ch'l à pinsâ e disgnâ tut da par lò ch'al s ciàma “Rabbit Hole”. Al dascór 'd un ragàs ch'al fà di viàś in di univèrs paraléi, a gh'è 'l caś ch'i gh sìan di mónd in dua a gh'è dal versiòṅ ad nuàtar ch'i s sumìlian ma ch'i n èṅ briśa cumpàgni, ch'i gh'aṅ abû dal viti difarènti da 'l nòstri, la siénsa la 'l diś, tut 'l è pusìbil. A la Rebecca a s impìsa na luś in dal cōr. Howie, da 'l cant suo, al taca a 'ndàr fóra, giùst cuma amìg, cun la Gabby ch'in cal méntar l'è stada mulàda da sò marè dònca la sarév anc libra 'd tacàr na vita nóva par spasàr via tut i daśpiaśēr.

Culegamènt estéran