Putèṅ
|
C'l artìcul chè 'l è scrit in
Miranduléś |
Un putèṅ (p'r al fémni putìna) 'l è 'n ès'r umàṅ ch'al n è minga rivâ a i an dla pubertà o ch'al n à incóra cumpiû ùnd'ś an, mumènt in dua da ragasōl (o ragasōla p'r al fémni) 'l è prònt p'r andàr a 'l scōli mèdi. Quànd i nàsan, i putèṅ i s tàcan dimóndi a 'l inìsi a sò màdar, pò i s lìg'n anc cun i àtar parènt cuma fradèi e nunòṅ.
Un putèṅ péna nâ in mèdia al péśa tri chilo e 'l è lung mèś métar. I prim dènt i tàc'n a vgnir fóra a siē méś.
Quànd un putèṅ al gh'à 'n an in gènar al taca a pruàr a dascórar, a far di diśégn e a far di śōg da par lò (almànc in fiṅ a i quàt'r an). Da i nóṿ méś ad vita a 'n an e mèś al taca anc a giràr da par lò.