Nella morsa
|
C'l artìcul chè 'l è scrit in
Miranduléś |
 Caught | ||
| Nella morsa | ||
 La Bel Geddes e Robert Ryan in na figùra dal film | ||
| In dla mòrsa 1949 | ||
|---|---|---|
| Regìa: Max Ophüls | ||
| Scritōr: Arthur Laurents • Libbie Block | ||
| Atōr: James Mason • Barbara Bel Geddes Robert Ryan • Frank Ferguson • Curt Bois Ruth Brady • Natalie Schafer • Art Smith Leon Alton • Frank Baker • Barbara Billingsley | ||
| Müsica: Frederik Holländer | ||
| Léngua: Ingléś | ||
| Dürä dal film: 88 minüt | ||
| Nasiōṅ: Stat Unî | ||
Nella morsa (In dla mòrsa), cgnusû in Itàglia anc cuma Presi nella morsa, 'l è 'n film dramàtic americàṅ dal 1949 ad Max Ophüls girâ in biànc e négar.
Tgénd adrē a la Metro Goldwyn Mayer, la pelìcula l'à fat sù dagnóra utsènt-mila dòlar in alóra.
Sunt
La Leonora Eames (Barbara Bel Geddes) l'è na ragàsa ch'la spartìs 'n apartamènt in afìt cun la sò amìga Dorothy Dale (Natalie Schafer) anc parchè i bèsi i èṅ pôc. Al sò sógn 'l è qvél ad spuśàr 'n óm ric e sistemàr-as, la decìd dònca ad far un cōrs p'r imparàr al bòni manéri e 'l mistēr ad mudèla, pò la taca a lauràr in 'n atelier.
Na sira, méntar la và a na fèsta par cgnós'r un quàlc pès grôs, 'l incróśa 'n migliardàri ciamâ Smith Ohlrig (Robert Ryan) ch'al l'invìda a far un gir in màchina sèg e pò anc a pasàr la nòt in cà sua ma chi lē a 'l ùltim la s tira indrē esénd che prima la 'l vrév cgnósar méj par tacàr na stòria 'd amōr méntar lò al vōl sōl purtàr-'s-la a lèt e basta. In séguit però Smith, ch'l è 'n put cunvìnt ch'al pénsa sōl a 'l lavōr e a 'l sucès, al càmbia idéa ma più che àtar p'r a n dar-la minga vinta a 'l sò psichiàtra (Art Smith) ch'al gh'iva dit ciàr e tónd ch'al n è briśa bòṅ ad vlēr bèṅ a ninsòṅ e dònca al n sa spuśarà mai.
Ohlrig 'l urganìśa in présia 'l matrimòni cun la Leonora e chi lē la và a vìv'r in dla sò vila in dua però la pasa più tèmp c'n al culaburadōr dal marè Franzi Kartos (Curt Bois) invéci che c'n al sò spóś ch'l è sèmpar via e ch'al fà pròpria véd'r ad fargàr-'s ad lē par via dal sò caràtar da megalòman ch'al vōl sèmpar cmandàr su tut. Dòp na litgàda, la Leonora la decìd ad lasàr-al p'r andàr a vìvar da par lē. La cata da lauràr da segretària in un studi mèdag, a 'l servìsi di dutōr Larry Quinada (James Mason) e Hoffman (Frank Ferguson).
C'n al tèmp la ragàsa la s inamóra ad Larry ma i gh'èṅ dū prubléma par lē: Ohlrig al n à minga mandâ śò al fat 'd èsar stâ mulâ e 'l risć 'd èsar custrét a pagàr dimóndi p'r un pusìbil divòrsi e pò la Leonora la vîṅ a savēr ad spetàr un putèṅ pròpria da lò.