Prêt-à-Porter (film)
|
C'l artìcul chè 'l è scrit in
Miranduléś |
 Prêt-à-Porter | ||
.png) La Kim Basinger in na figùra dal film | ||
| id. 1994 | ||
|---|---|---|
| Regìa: Robert Altman | ||
| Scritōr: Barbara Shulgasser • Robert Altman | ||
| Atōr: Marcello Mastroianni • Jean-Pierre Cassel Tim Robbins • Sophia Loren • Kim Basinger Julia Roberts • Lauren Bacall • Stephen Rea Rupert Everett • Rossy de Palma • Lili Taylor Forest Whitaker • Tracey Ullman • Danny Aiello François Cluzet • Anouk Aimée • Anne Canovas Chiara Mastroianni • Cher • Richard E. Grant Linda Hunt • Teri Garr • Jean Rochefort Harry Belafonte • Jean-Paul Gaultier • Björk Carla Bruni • Naomi Campbell • Claudia Schiffer | ||
| Müsica: Michel Legrand | ||
| Léngua: Ingléś • Francéś • Itagliàṅ • Rus • Spagnōl | ||
| Dürä dal film: 133 minüt | ||
| Nasiōṅ: Stat Unî | ||
Prêt-à-Porter (id.) l'è na cumèdia dal 1994 ad Robert Altman ch'al l'à scrita insém a la Barbara Shulgasser. La pelìcula la gh'à abû di cóst stimâ ad daśdòt migliòṅ ad dòlar ma pò la 'n à fat sù dagnóra quarànta-sèt.
In dla culòna sunóra dal film i s pōlan sintìr i braṅ Here Comes the Hotstepper 'd Ini Kamoze, Here We Come di Salt-N-Pepa, Natural Thing di M People, 70's Love Groove dla Janet Jackson, Jump on Top of Me di The Rolling Stones, Pretty di The Cranberries, Supermodel Sandwich ad Terence Trent D'Arby, Lemon di U2, I'm Too Sexy di Right Said Fred, Ruby Baby dla Björk, Twiggy Twiggy di Pizzicato Five, Addicted to Love ad Robert Palmer, How Long Dub di Soul II Soul, Violent and Funky di Infectious Grooves e The Poor People of Paris e L'Accordéoniste dl'Édith Piaf, cun la Grace Jones ch'l'à arfàt chè la sò La Vie en Rose.
Sunt
[mudéfica la surzéia]A sém a la vigìglia dla stmana dal sfilàdi a Parì. Turnànd da 'l aeropòrt in du 'l éra andâ a incuntràr al sart rus Sergei Oblomov (Marcello Mastroianni), al presidènt dla Cambra nasiunàla dla mòda Olivier De La Fontaine (Jean-Pierre Cassel) al mōr c'n un sandwich a 'l parsùt ch'al gh'è andâ 'd travèrs, tulénd-'g al fiâ. Traumatiśâ da la séna ch'l à vist in màchina e tménd 'd ès'r arestâ da la pulisìa, fra 'l àtar gl'ispetōr Tantpis (Jean Rochefort) e Forget (Michel Blanc) i crédan dabòṅ ch'a sia stâ 'n masamènt, Sergei al scapa via, andànd pò a pascàr la védva, na vòlta sò amànta, in d'l albêrg in du la s cata. La dóna, ciamàda Isabelle (Sophia Loren), a dir-la tuta la n s cumpatìva piò sò marè, acsè cuma dagnóra tut i sò culéga stilìsta e uperadōr dal setōr dla mòda.
In dal stés albêrg a gh'è anc na còpia 'd giurnalìsta americàṅ ch'i èṅ lè par far di servìsi da mandàr in di Stat Unî via fax, Joe Flynn (Tim Robbins) e lʼAnne Eisenhower (Julia Roberts). Esénd custrét a spartìr na cambra sōla, i dū i in prufìtan par gusàr, gurdànd al nutìsi dal sfilàdi in televiśiòṅ, in dua i èṅ prutagunìsta al stilìsta istèric Cort Romney (Richard E. Grant) e 'l sò rivàł e amànt Cy Bianco (Forest Whitaker) ch'al dróa sōl dal mudèli ad culōr cuma lò.
L'amànta 'd Olivier, la Simone Lowenthal (Anouk Aimée), l'è in pinsēr parchè sò fiōl Jack (Rupert Everett) 'l è drē a véndar incòsa a 'n industriàł texàṅ. In cal méntar la giurnalìsta televiśìva Kitty Potter (Kim Basinger) l'intervìsta di persunàǵ famóś cuma la Cher e 'l futógrafar Milo O'Brannigan (Stephen Rea) al tira śò ad nascòst tré dal più impurtànti redadōri ad rivìsti ad mòda, la Nina Scant (Tracey Ullman), la Sissy Wanamaker (Sally Kellerman) e la Regina Krumm (Linda Hunt).