Porl Thompson
|
C'l artìcul chè 'l è scrit in
Miranduléś |
.jpg)
Paul Stephen Thompson, cgnusû méj cuma Porl Thompson o cuma Pearl Thompson (Surrey, 8 ad Nuvémbar dal 1957) 'l è 'n artìsta, chitarìsta, saxufunìsta e tasterìsta ingléś, mémbar di The Cure da 'l 1983 a 'l 1993 e da 'l 2005 a 'l 2011.
Biugrafìa
Dòp avēr pasâ la sò infànsia prima a Lóndra e pò a Crawley, Paul al cgnós Robert Smith, Michael Dempsey e Lol Tolhurst a scōla. Al taca a sunàr sèg in un grup ciamâ Easy Cure, cambiànd al sò nóm in Porl p'r a n èsar minga cunfùś cun Paul Thompson di Roxy Music. Quànd chi àtar tri i regìstr'n al prim disc Three Imaginary Boys in dal 1979, lò al n è minga dènt'r a 'l prugèt parchè la sò manéra 'd sunàr la chitàra la n éra minga adàta a 'l stîł post-punk dal grup.
Porl al taca a studiàr art e pò al śibìs dal sò cupertìni a i Cure p'r i sò disc cuma qvéli p'r al sìngul Primary o p'r al disc Faith dal 1981. In dal 1983, ciamâ da Robert Smith in parsòna, al sòna 'l saxòfun par 'l àlbum The Top ch'al vadrà la luś 'l an dòp, entrànd acsè in furmasiòṅ. C'n al grup ad sò cugnâ Robert Smith, esénd ch'l è stâ spuśâ cun sò surèla Janet in fiṅ a 'l 2000, 'l à registrâ siē àlbum ('l ùltim 'l è 4:13 Dream dal 2008), quàtar disc da 'l viṿ e quàtar racòlti.
In séguit al s è tòlt dal tèmp par lò par dedicaràr-'s a la sò pasiòṅ, qvéla 'd dipìnśar, e p'r armàgnar c'n i sò putèṅ. In dal 1994 'l è andâ in tour cun Jimmy Page e Robert Plant. C'n al cantànt di Led Zeppelin 'l à sunâ pò la chitàra in dal sò disc sulìsta dal 2002 Dreamland. Porl in dla sò caréra 'l à culaburâ anc cun di àtar grup cuma i Babacar e i Presence.
Da la fiṅ di an Nuànta 'l à tacâ a far dal móstri in gir p'r al mónd di sò quàdar.
Discugrafìa
Àlbum c'n i The Cure
- 1984 - The Top
- 1985 - The Head on the Door
- 1987 - Kiss Me Kiss Me Kiss Me
- 1989 - Disintegration
- 1992 - Wish
- 2008 - 4:13 Dream
Àlbum cun Robert Plant
- 2002 - Dreamland