Pol Pot
|
C'l artìcul chè 'l è scrit in
Miranduléś |
Pol Pot (ប៉ុល ពត in cambugiàṅ), pseudónim ad Saloth Sâr (សាឡុត ស) (Prek Sbauv, 19 ad Maǵ dal 1925 – Anlong Veng, 15 'd Avrìl dal 1998), 'l è stâ 'n rivulusiunàri, pulìtic e generàł cambugiàṅ, cap di cumbatènt cumunìsta dla Cambògia, ciamâ khmer rós. Da 'l 1976 a 'l 1979 'l è stâ furmalmènt al prim minìstar dal paéś ch'al s ciamàva Kampuchea Demucràtica, in fiṅ tant ch'la sò ditatùra l'è stada arbaltàda da 'l eśèrcit dal Viétnam durànt la guèra cambugiàna-vietnamìda.
'L è stâ 'l respunsàbil dal turtùri e dal masàcar stimâ 'd un migliòṅ e mèś ad parsòni, dimóndi mòrt durànt i lavōr fursâ o par malnutrisiòṅ, un quàrt dal sò pòpul in tut. Dòp l'invaśiòṅ dla Cambògia da part dal Viétnam, Pol Pot e i sò khmer rós i aṅ mis in pē un muimènt armâ in dal 1979 par cumbàt'r i vietnamîd e i suviètig, cun 'l apòǵ di Stat Unî, dla Cina e dla Tailàndia.