Piercing (film)
|
C'l artìcul chè 'l è scrit in
Miranduléś |
 Piercing | ||
.png) La Mia Wasikowska in na figùra dal film | ||
| id. 2018 | ||
|---|---|---|
| Regìa: Nicolas Pesce | ||
| Scritōr: Ryū Murakami • Nicolas Pesce | ||
| Atōr: Christopher Abbott • Mia Wasikowska Laia Costa • Marin Ireland • Maria Dizzia Will Brill • Paul Nazak • Wendell Pierce | ||
| Müsica: Claudio Simonetti • Massimo Morante Fabio Pignatelli • Stelvio Cipriani • Goblin Bruno Nicolai • Piero Piccioni | ||
| Léngua: Ingléś | ||
| Dürä dal film: 81 minüt | ||
| Nasiōṅ: Stat Unî | ||
Piercing (id.) 'l è 'n thriller psiculògic dal 2018 ad Nicolas Pesce ch'al 'l à anc scrit tulénd spunt da 'n rumànś ad Ryū Murakami. Preśentâ a 'l Sundance Film Festival, al film 'l à fat sù dagnógna sènt-sinquantamìla dòlar a 'l cìnema.
In dla culòna sunóra dal film i s càtan dimóndi braṅ trat da śai e thriller itagliàṅ di an Stanta e Utànta cuma Profondo rosso, Tentacoli, La dama rossa uccide sette volte, Camille 2000 e Tenebre.
Sunt
[mudéfica la surzéia]Reed (Christopher Abbott) 'l è 'n śōvan dvintâ pàdar dna putìna da pôc. Sò mujēr, la Mona (Laia Costa), l'è piutòst pēśa e la gh stà sèmp'r adòs, c'n i sò “a t vój bèṅ” e “ciàma-'m quànd at vō” dit ad cuntìnuv. Qvést chè però 'l è 'l ùltim di sò prubléma parchè al sènt na vōś dèntar ch'la gh diś ad masàr qualchidòṅ, un quèl ch'al gh'à da far dabòṅ parchè par lò l'è dvintàda n'usesiòṅ.
Un dè al decìd ad tōr na cambra in 'n hutèl dgénd a la sò spóśa 'd èsar via par lavōr, ciamàr na putàna faghénd finta 'd far di śuglèṅ sadumàś sèg e pò cupàr-la druànd un śbraga-giàs. A 'l apuntamènt a s preśénta na biónda ciamàda Jackie (Mia Wasikowska) che prima 'd andàr a lèt la gh admànda 'd far-as na dócia. Quànd l'è in bagn però la s fà dal fridi da par lē, scurtlànd-'s in dla còsa dèstra cun na fórbis.
'L óm al la pòrta a 'l prònt sucōrs e durànt al viàś in màchina la rója la gh diś che lē la sà cuś al vōl far sèg. Rivâ a 'l uśdàł Reed al n vōl minga andàr dèntar p'r a n far-as védar da ninsòṅ. Mént'r un dutōr (Wendell Pierce) al la vìśita miténd-ag na fasōla a la gamba, Reed al pénsa a 'l cumpurtamènt strâṅ dla Jackie, pò al decìd ad purtàr-la a cà, andànd sù sèg.
La ragàsa la gh prepàra na séna e subìt dòp Reed al pèrd i sèns, avēnd lē mis dla śdòrmia in dal sò magnàr. Cun 'l óm par tèra, ch'al n è più bòṅ ad far gnint, la Jackie la taca a far-ag di taj, pò la lèś al sò diàri in du lò al s éra scrit i sò piàṅ par masàr na parsòna basta ch'a sia.