Paura nella notte
|
C'l artìcul chè 'l è scrit in
Miranduléś |
 Fear in the Night | ||
| Paura nella notte | ||
 La Judy Geeson e Ralph Bates in na figùra dal film | ||
| Paùra in dla nòt 1972 | ||
|---|---|---|
| Regìa: Jimmy Sangster | ||
| Scritōr: Jimmy Sangster • Michael Syson | ||
| Atōr: Judy Geeson • Ralph Bates • Joan Collins Peter Cushing • James Cossins • Gillian Lind Brian Grellis • John Bown • Jimmy Gardner | ||
| Müsica: John McCabe | ||
| Léngua: Ingléś | ||
| Dürä dal film: 94 minüt | ||
| Nasiōṅ: Régn Unî | ||
Paura nella notte (Paùra in dla nòt) 'l è 'n thriller britànic dal 1972 ad Jimmy Sangster, trat da 'l racònt Nightmare dal scritōr americàṅ Cornell Woolrich.
Prudót par la Hammer Film Productions, 'l à fat sù da piò 'd utsènt-mila sterlìni a frònt 'd un cóst ad sènt-quarant'òṅ.
Sunt
Dòp avēr prestâ servìsi in dla cà dla sgnōra Beamish (Gillian Lind) a Lóndra, la Peggy (Judy Geeson) la và a star cun sò marè Robert Heller (Ralph Bates), spuśâ da pôc, in dla campàggna ingléśa parchè lò 'l à catâ lavōr lè cuma insgnànt in d'l istitùt 'd un prèsid sò amìg, Michael Carmichael (Peter Cushing), spuśâ cun na dóna dimóndi più śōvna, la Molly (Joan Collins). Prima 'd partìr, 'n óm c'n un na pròteśi ad légn a 'l bras al salta adòs a la dóna par strusàr-la ma chi lē la la fà franca, pardénd però i sèns. La Peggy la cònta incòsa a Robert che però al créd ch'a sia frut dna sugestiòṅ.
Rivâ a la scóla, la còpia la và a star in un chalet lè darènt. Al dè dòp, méntar Robert 'l è via, la Peggy la và a védar 'l istitùt ad dèntar, sinténd di ragàs dascórar ma pò, quànd la vèra 'l us, in d'l àula la n cata ninsòṅ. Turnàda a cà la cata incóra 'l manìag c'n al bras ad légn ch'al próa a cupàr-la ma anc 'sta vòlta al n gh la cava mia. La ragàsa la vrév ciamàr la pulisìa ma Robert al la cunvìns ad spétar la matìna dòp par védar s'l'è incóra ad c'l avìś lè.
In séguit la Peggy la fà a mènt ch'al prèsid al gh'à 'n bras ad légn e la taca a 'vēr paùra. Quànd chi lò al vîṅ dènt'r a cà quànd lē l'è da par lē, la Peggy la gh spara c'n al sćiòp ch'al gh'iva lasâ sò marè. Quànd chi lò al tórna a cà, Michael 'l è sparî, lasànd dal trasi ad sànguv in gir. Robert al créd chè sò mujēr la 'l àppia masâ ma chi lē la giùra 'd nò. Al cadàvar però al n salta minga fóra.