Palàs d'Accursio

C'l artìcul chè 'l è scrit in Miranduléś

Al Palàs d'Accursio (Palazzo d'Accursio o Palazzo Comunale in itagliàṅ, Palâz e basta in bulgnéś) 'l è 'n palàs stòric ad Bulógna ad tri piàṅ, sēd dal cumùn bèla da i tèmp d'l Ēṿ Mèdi.

Al s cata in Piâza Mażåur, in dal sèntar stòrig dla sità, e 'l è stâ tirâ sù in mumènt difarènt fra 'l XIII e 'l XVI sécul, cun dal mudìfichi e di arfacimènt in fiṅ a 'l XXI sécul. Al gh'à na superfìsi 'd 15.000 mq.

Stòria

Al cumùn in dal 1287 'l iva cumprâ da Francesco d'Accorso, fiōl dal famóś giurìsta Accursio, la cà 'd famìja e in séguit anc tut chi atri custrusiòṅ lè atàc, par pò butàr śò incòsa, a part la tór, e far 'n edifìsi nóṿ, ciamâ in alóra Palàs dla Biàva p'r fat che lè dènt'r a s mitìva via 'l magnàr p'r al bèsti. In dal 1336 al palàs al càmbia destinasiòṅ parchè lè i gh vìn'n a star di magistrâ impurtànt, i Cónsui Ansiàṅ, che prima i ér'n invéci in dal Palàs Rè Éns.

Quànd Bulógna la pasa sóta 'l Stat dla Céśa, al cardinàł Anglico de Grimoard al gh fà far di àtar lavōr faghénd-al dvintàr na furtésa, cun na fòsa davànti e 'n mur dimóndi élt tut 'd intóran.

Al 15 ad Setémbar dal 1425 la banda a nòrd dal palàs la ciàpa fōg e acsè a s decìd ad giustàr-al, ślargànd e alvànd un pôc la part ruinàda, su 'n prugèt d'l architét Fioravante Fioravanti, miténd-ag 'n arlói pùblic e na campàna c'n un diamétar ad 136 cm. Di àtar lavōr i èṅ stâ fat anc in dal 1508 par vlēr dal papa Giùli II mént'r in dal 1568 'l impurtànt butànig Ulisse Aldrovandi al mét 'n òrt in dal curtìl in dua adès a gh'è la Sala dla Bursa.

Al palàs 'l à pò patî di dan impurtànt durànt i an ad Napulèòṅ, c'n i sò suldâ ch'i aṅ purtâ via dal ròbi e śbragâ dal statṿi, e a séguit di bumbardamènt durànt la secónda guèra mundiàla. In dal 1920 di squadrìsta fasìsta i aṅ fat un masèl chè dèntar durànt la prima sedùda dal cunsìli dal sìndag, al sucialìsta Enio Gnudi, cauśànd la mòrt ad déś parsòni e frénd-an sinquànt'òt.

Culegamènt estéran

(IT) La sò schéda su 'l sit dla Stòria e Memòria 'd Bulógna

Àtar prugèt

Wikimedia Commons contiene file multimediali su Palàs d'Accursio