Occhi nella notte (film 1942)
|
C'l artìcul chè 'l è scrit in
Miranduléś |
 Eyes in the Night | ||
| Occhi nella notte | ||
.png) La Reed e Edward Arnold in na figùra dal film | ||
| Òć in dla nòt 1942 | ||
|---|---|---|
| Regìa: Fred Zinnemann | ||
| Scritōr: Guy Trosper Howard Emmett Rogers • Baynard Kendrick | ||
| Atōr: Edward Arnold • Ann Harding • Donna Reed Stephen McNally • Katherine Emery • Allen Jenkins Stanley Ridges • Reginald Denny • John Emery Rosemary DeCamp • Erik Rolf • Barry Nelson | ||
| Müsica: Lennie Hayton | ||
| Léngua: Ingléś | ||
| Dürä dal film: 80 minüt | ||
| Nasiōṅ: Stat Unî | ||
Occhi nella notte (Òć in dla nòt) 'l è 'n śal americàṅ dal 1942 ad Fred Zinnemann, girâ in biànc e négar, trat da 'l rumànś Parfùm ad vióli ad Baynard Kendrick. Al gh'à abû 'n séguit in dal 1945 da 'l tìtul The Hidden Eye, sèmpar cun Edward Arnold prutagunìsta.
La pelìcula l'à fat sù dagnóra un migliòṅ ad dòlar dòp ès'r-an custàda a la Metro Goldwyn Mayer quatarsènt-trentatrimìla.
Sunt
Durànt la secónda guèra mundiàla al detective privâ òrub Duncan Maclain (Edward Arnold) al cuntìnua a far al sò mistēr cun bravitù e usta anc par via d'l ajùt ch'i gh daṅ al sò caṅ lóv Vernardè, al sò majurdòm ad culōr Alistair (Mantan Moreland) e 'l sò asistènt piutòst imbranâ Matteo (Allen Jenkins).
Un dè a riva a cà sua p'r un cunsìli la Norma (Ann Harding), n'èx atōra e sò amìga da dimóndi an ch'la gh'à 'n prubléma cun la fiōla 'd prim lèt d'l óm ch'l'à spuśâ, 'l inśgnēr Stefano Lawry (Reginald Denny). La ragàsa, ch'la gh'à darsèt an e la s ciàma Barbara (Donna Reed), la gh'à 'n caràt'r arvèrs e cuciû e la n la vōl minga in cà. Adès la s è misa cun 'n atōr dimóndi più grand ad lē, Paolo Gerente (John Emery), ch'l'à cgnusû durànt al próvi dal rèciti ch'la fà a teàtar dirèta par la scritōra Clelia (Katherine Emery). La Norma l'è in pinsēr parchè la sà che chi lò 'l è 'n pôc ad bòṅ, esénd stâ anc al sò muróś soquànt an prima.
La Barbara, ch'la frequénta 'l óm anc par far un dispèt a la sò madrìggna, la decìd na sira ad dar-'s apuntamènt cun Paolo diretamènt a cà sua. Quànd la śōvna la vèra 'l us dal sò apartamènt la 'l cata mòrt darènt a 'l camèṅ e subìt dòp a salta fóra la Norma ch'la gh diś 'd èar vgnuda lè par cunvìnsar 'l óm a lasàr pèrdar. La Barbara la n créd minga a la stòria dla Norma e la gh diś 'd andàr via 'd cà o sinò lē la cuntarà incòsa a la pulisìa, ch'l'à l'à vista in cà ad Gerente subìt dòp al masamènt.
La Norma la dmanda ajùt a Duncan ch'al bèca su 'l fat al sasèṅ ch'l è un sèrt Gabriele (Horace McNally), al marè dla camaréra ch'la lavóra p'r i Lawry, la Vera (Rosemary DeCamp). I dū i fànan part dn'urganiśasiòṅ ad spìi furastéri ch'la vōl fargàr di segrét militàr che Stefano 'l à péna sperimentâ cun sucès par cònt dal guèr'n americàṅ. A cap dla misiòṅ a gh'è la Clelia in parsòna cun 'l ajùt dal majurdòm di Lawry, Hansen (Stanley Ridges). Al grup a riva in dla cà dla Norma par purtàr via i scrit c'n al fórmuli, tgnudi dacàt in casafòrt. La Norma e Duncan, rivâ lè par jutàr-la faghénd finta 'd ès'r un sò sîṅ, i èṅ in perìcul.