Nunavut

C'l artìcul chè 'l è scrit in Miranduléś

Al Nunavut (in inuktitut: ᓄᓇᕗᑦ) 'l è 'n teritóri dal nòrd dal Cànada nâ al 1 'd Avrìl dal 1999 dvidénd in dū al Teritóri dal Nòrd-Òvest in manéra 'd arcgnósar na tèra p'r al pòpul di natìṿ americàṅ di Inuit.

Al Nunavut 'l è grand 2.093.190 km² par trénta-siemìla abitànt. Al cunfìna c'n i Teritóri dal Nòrd-Òvest a òvest, c'n al Manitòba a sud, c'n al Saskatchewan in un punt sōl a sud-òvest e cun Tèranóva e Làbrador a sud-èst su l'ìśula 'd Killiniq. C'n al pruìnsi dal Quebec e d'l Untàri al gh'à di cunfîṅ marìtim.

Al sò caplōg 'l è Iqaluit. Al sò clima 'l è pulàr parchè 'l è darènt a 'l pôl nòrd e parchè luntàṅ da 'l mâr. In dla stagiòṅ fréda a s riva anc a sinquànta grâd sóta śèr, cun nóṿ méś 'd Invèran e sōl tri 'd Istâ.

Al Nunavut al gh'à 'n rapreśentànt a la cambra e òṅ a 'l senàt dal Cànada.

Sót-tèra a gh'è na furtùna in minerài e risórsi: òr, fèr, śinc, diamànt, petròli e gas. Soquànt Inuit i cuntìnuan a campàr cuma na vòlta, laurànd in dal camp dla casa e dla pésca cuma da tradisiòṅ.

Culegamènt estéran

(EN) (FR) Al sit ufisiàł