Non ci sarà domani
|
C'l artìcul chè 'l è scrit in
Miranduléś |
 Kiss Tomorrow Goodbye | ||
| Non ci sarà domani | ||
 La Barbara Payton e Cagney in na figùra dal film | ||
| ʼN admàṅ a n gh sarà briśa 1950 | ||
|---|---|---|
| Regìa: Gordon Douglas | ||
| Scritōr: Horace McCoy • Harry Brown | ||
| Atōr: James Cagney • Barbara Payton Helena Carter • Ward Bond • Barton MacLane Luther Adler • Steve Brodie • Rhys Williams Herbert Heyes • John Litel • William Frawley | ||
| Müsica: Carmen Dragon | ||
| Léngua: Ingléś | ||
| Dürä dal film: 102 minüt | ||
| Nasiōṅ: Stat Unî | ||
Non ci sarà domani (ʼN admàṅ a n gh sarà briśa) 'l è 'n noir dramàtic dal 1950 ad Gordon Douglas girâ in biànc e négar da 'n rumànś 'd Horace McCoy.
Al prudutōr dal film, William Cagney, 'l è 'l fradèl più pìcul d'l atōr prutagunìsta, James Cagney. La pelìcula, pruibìda in Ohio par via dla manéra daśgustóśa, sàdiga e sénsa muràł ad figuràr di brut fat, l'à fat sù un migliòṅ e sèt ad dòlar in alóra.
Sunt
[mudéfica la surzéia]Ralph Cotter (James Cagney) 'l è 'n delinquènt finî dèntar par dal rubarìi a maṅ armàda ma 'l à strulgâ 'n piàṅ p'r èsar lìbar. In dal méntar ch'l è a lauràr in di camp insém a di àtar parśunēr, tgnû 'd òc da 'l guàrdi, al fà finta 'd star mâł e 'd avēr-ag la févra, 'd acòrd c'n al sò amìg Carleton (Neville Brand), vśèṅ 'd lèt. Un pulisiòt al gh parmét acsè 'd andàr a bév'r in un fiùm lè darènt. In dl'àqua però a gh'è na guma prònta cun dèntar na pistòla che lò 'l ciàpa par scapàr via esénd che da 'd là da 'l camp a gh'è la surèla 'd Carleton, na puta ciamàda Holiday (Barbara Payton), e 'n cumpunènt dla sò banda, Jinx Raynor (Steve Brodie), prònt cun na màchina impìsa tòlta in prèst da 'n mecànig sò amìg, Vic Mason (Rhys Williams).
Mént'r i dū óm i cùran via, Carleton 'l armàgn frî da 'n cōlp di pulisiòt ch'i vlìvan farmàr-i. Esénd dvintâ sōl un pēś par lò, Ralph 'l al masa sparànd-'g in dla tèsta. In séguit Ralph al s và a lugàr in d'l apartamènt che la Holiday l'iva preparâ par sò fradèl. Fra i dū a taca na relasiòṅ e 'l óm al gh diś ch'adès la n sarà piò da par lē. La dóna, da sèmp'r unèsta, la decìd 'd armàgnar sèg p'r amōr.
Ralph al vōl turnàr a rubàr e c'n al ricàt al custrìnś dū pulisiòt curót, 'l ispetōr Charles Weber (Ward Bond) e 'l tenènt John Reece (Barton MacLane), a lauràr insém a lò, avénd lò registrâ na cunversasiòṅ in du a s capìs che chi lōr dū i èṅ mars patóc in dl'anma. In cal méntar, par quaciàr-as davànti a la léǵ e p'r avēr di cunsìli bòṅ, al decìd ad tiràr dènt'r anc 'n avucàt, Keith Mandon dit “Cherokee” (Luther Adler), ch'al n s fà minga di prubléma a star da la banda di criminài.
Dòp un cōlp in un supermarcâ e avēr dâ na lesiòṅ a Mason ch'al 'l iva tradî, Ralph al decìd ad spuśàr-'s in segrét cun la Margaret Dobson (Helena Carter), la fiōla d'l industriàł migliàrdàri dla sità Ezra (Herbert Heyes), che lò 'l iva cgnusû par caś a na funsiòṅ filuśòfica e religióśa in du lē la dava via di vulantèṅ. Al matrimòni 'l è stâ fat sénsa che lē la saìs quèl dla Holiday. Quànd al pàdar dla Margaret al la cata a lèt cun c'l óm lè, ch'al n sà gnanc chi al sia, al s dà da far par scanślàr al matrimòni, pasànd-ag 'n aségn p'r avēr la sò firma su 'l at ad rinùnsia ma Ralph 'l al lasa lè a n vlénd minga di bèsi p'r un lavōr dal gènar, firmànd pò listés.
Dòp 'n àtar cōlp bèl grôs, a 'n servìsi ad scumési, Ralph al tórna a cà par festegiàr insém a la Holiday c'n un butigliòṅ ad champagne. Prim' incóra 'd psēr druàr al tirabusòṅ e far un brìndaś a riva Mandon dgénd-ag ch'l è in di guàj e ch'al gh'à d'andàr subìt da Ezra. 'L óm al partìs lasànd da par lē la sò muróśa.
Rivâ a cà dal migliardàri, Ezra al gh diś ch'in cal méntar 'l à cambiâ idéa esénd ch'l è cuntènt che la Margaret la sia cuntènta sèg e ch'a gh'è piaśû al fat che lò al n l'is minga spuśàda p'r i bèsi e ch'l al vōl cuma śéndar esénd ch'l à sćiancâ 'l anulamènt.
Davànti a 'n futûr da óm ric, dòp avēr dascōrs cun la Margaret, al decìd ad turnàr a cà par srar i cònt cun la Holiday, ciapàr i sò quèi e far-la finìda sèg. Ma la ragàsa la n è minga tant 'd acòrd. Tradìda da 'l óm ch'al dgiva 'd vlēr-ag bèṅ, la tira fóra na pistòla parchè adès la sà ch'a cupàr sò fradèl 'l è stâ lò, la pulisìa la gh'à fat avēr al prujètil catâ in cò ch'l è pròpria qvél dla pistòla che lē la gh'à in maṅ e che Ralph al gh'iva dit ad śbàtar via.