Nino Castelnuovo

C'l artìcul chè 'l è scrit in Miranduléś

Francesco Castelnuovo, cgnusû méj cuma Nino Castelnuovo (Léc, 28 'd Utóbar dal 1936 - Róma, 6 ad Setémbar dal 2021, a s lèś [ˈnino kastelˈnwɔvo] in itagliàṅ) 'l è stâ 'n atōr e persunàǵ televiśìṿ itagliàṅ.

'L è arcurdâ anc p'r avēr fat la reclàm ad 'n òli par soquànt an in du al saltàva na stasàda.

Biugrafìa

Secónd ad quàtar fradèi, Nino da śōv'n al fà ginàstica artìstica e balét par pò lauràr cuma śbiangśèṅ, mecànig e agìnt p'r al véndidi. In séguit 'l è andâ a star a Milàṅ par studiàr recitasiòṅ a 'l Teàtar Pìcul ad Giorgio Strehler. Dū an dòp al fà 'l mim in dal prugràma televiśìṿ Zurlì il mago del giovedì ad Cino Tortorella.

'L eśurdìs a 'l cìnema in dal 1956 faghénd na part cica in dla cumèdia Era di venerdì 17, cun prutagunìsta Fernandel, e pò 'n eletricìsta inamurâ dla Claudia Cardinale in Un maledetto imbroglio ad Pietro Germi (1959). 'L an dòp a 'l ém vist in Il gobbo ad Carlo Lizzani e in Rocco e i suoi fratelli ad Luchino Visconti mént'r in dal 1961 'l à fat al marè dla Giorgia Moll in dal drama Laura nuda cun Tomas Milian.

L'ucaśiòṅ ad far-as véd'r anc a 'l èstar par lò la riva in dal 1964 quànd al gira 'l musical francéś Les Parapluies de Cherbourg in còpia cun la Catherine Deneuve e pò al film ad guèra Sette contro la morte a fiànc dla Rosanna Schiaffino, ad John Saxon e 'd Larry Hagman.

Dimóndi impgnâ anc in di senegiâ in televiśiòṅ, Castelnuovo 'l à interpretâ la part ad Renzo Tramaglino in I promessi sposi. In chi an lè 'l à anc fat Le creature (1966), cun la còpia Catherine Deneuve/Michel Piccoli, al western Le colt cantarono la morte e fu... tempo di massacro (1966), insém a Franco Nero e a George Hilton, al còmig La cintura di castità (1967), a fiànc dla Monica Vitti e 'd Tony Curtis, e la cumèdia Certo, certissimo, anzi... probabile (1969), cun la Claudia Cardinale e la Catherine Spaak.

In di an Stanta, ólt'r a soquànt prugràma televiśìṿ cuma Chi? cundót par Pippo Baudo a 'l intèr'n ad Domenica in cun Corrado, 'l è stâ impgnâ in dla cumèdia Il divorzio (1070), cun prutagunìsta Vittorio Gassman, in dal drama Bella di giorno moglie di notte (1971), in dla part dal marè dl'Eva Czemerys, in dal film ad scarésa Il prato macchiato di rosso (1973), cun la Marina Malfatti e Lucio Dalla in dla part d'l imbariagòs, in dal drama sentimèntàł Male d'amore (1974), in còpia cun la Romy Schneider, in d'l eròtig Amore mio spogliati... che poi ti spiego! (1975), cun la Valeria Fabrizi e l'Ilona Staller, e in dal thriller Nude per l'assassino (1975), in dua 'l à incruśâ la Solvi Stübing, l'Edwige Fenech e la Femi Benussi.

In dal 1984 'l à tòlt part a 'l prugràma Giallo sera, quiz in du a gh'éra da indvinàr al sasèṅ fra i cliènt d'n hutèl. Fra i sò ùltim lavōr a psém nutàr al biugràfic campiòṅ 'd incàs Il paziente inglese, cun Ralph Fiennes in di pagn dal cònt László Almásy e lò in qvéi d'l archeòlug itagliàṅ D'Agostino, e 'l pulisiésc Il sottile fascino del peccato (2010).

'L è mòrt a utànta-quàt'r an. 'L éra malâ da dimóndi tèmp e al gh vdiva pôc par via 'd un glaucóma patî quànd al gh'iva trénta-sinc an.