Niagara (film)
|
C'l artìcul chè 'l è scrit in
Miranduléś |
 Niagara | ||
.png) La Marilyn Monroe in na figùra dal film | ||
| Niagàra 1953 | ||
|---|---|---|
| Regìa: Henry Hathaway | ||
| Scritōr: Charles Brackett Walter Reisch • Richard L. Breen | ||
| Atōr: Marilyn Monroe • Joseph Cotten • Jean Peters Max Showalter • Denis O'Dea • Richard Allan Don Wilson • Lurene Tuttle • Russell Collins Will Wright • Leon Alton • Harry Carey Jr. | ||
| Müsica: Sol Kaplan | ||
| Léngua: Ingléś | ||
| Dürä dal film: 92 minüt | ||
| Nasiōṅ: Stat Unî | ||
Niagara (Niagàra) 'l è 'n thriller dal 1953 'd Henry Hathaway. Par la part dal marè dla Marilyn Monroe, ch'in dal film la canta braṅ Kiss, al regìsta 'l arév vlû James Mason méntar p'r al rōl dla Molly (Polly in uriginàł) la prudusiòṅ l'à sarnî la Jean Peters.
'L à muciâ sù dū migliòṅ e mèś ad dòlar dòp ès'r-an custâ òṅ e sèt.
Sunt
[mudéfica la surzéia]Ray Cutler (Max Showalter) e sò mujēr Molly (Jean Peters) i èṅ in viàś ad nòsi in Cànada in du i aṅ prenutâ 'n chalet in dla strutùra dal sgnōr Qua (Russell Collins) cun vista su 'l cascàdi dal Niagàra. Quànd i rìvan però la sò cambra l'è incóra impgnàda da na còpia ch'la gh'iva da partìr cla matìna lè, i Loomis. La dóna, ciamàda Rose (Marilyn Monroe), la dmanda pardòṅ dgénd che sò marè George (Joseph Cotten) al n è minga tant in bóla. Qua al cata n'atra sistemasiòṅ p'r i Cutler, in dal méntar ch'al spèta ch'i Loomis i vàgan via.
La Rose l'è na biónda pîna 'd vita, bèla, śōvna, ch'a gh piàś andàr in gir tuta scalvìda cun di vistidèṅ culurâ e stric méntar sò marè 'l è più vèć, vilî, stuf, c'n un pasâ da suldâ in dla guèra 'd Curèa e sénsa bèsi dòp al falimènt dal sò alevamènt ad péguri. Al vōl dimóndi bèṅ a sò mujēr e 'l è gelóś anc parchè chi lē l'è piutòst dastacàda sèg. Cal dè lè, durànt na scapàda turìstica a 'l cascàdi insém a sò marè, la Molly la bèca sénsa èsar vista la Rose baśàr-as c'n un śōvan, Ted Patrick (Richard Allan), al sò amànt. Al tradimènt però al n è minga 'l aspèt più brut dla vicénda parché i dū i aṅ strulgâ 'n piàṅ par far fóra George, faghénd-al pasàr par na daśgràsia.
Quànd George al n tórna minga a 'l chalet, la Rose la fà finta 'd ès'r in pinsēr parchè i gh'ìvan da partìr par turnàr a Chicago insém. Quànd la pulisìa la cata 'l còrp d'n óm in di àqui dal lâg Untàri, la Rose la vîṅ ciamàda p'r arcgnós'r al cadàvar ma, quànd la 'l véd, la gh'à 'n tarabaciòṅ pardénd i séns. Al còrp al n è minga qvél ad sò marè ma 'l è qvél ad Ted.