Nelle pieghe della carne
|
C'l artìcul chè 'l è scrit in
Miranduléś |
 Nelle pieghe della carne
| ||
 Víctor Alcázar e la Pier Angeli in na figùra dal film | ||
| In dal pighi dla carna 1970 | ||
|---|---|---|
| Regìa: Sergio Bergonzelli | ||
| Scritōr: Mario Cajano Fabio De Agostini • Sergio Bergonzelli | ||
| Atōr: Eleonora Rossi Drago • Luciano Catenacci Pier Angeli • Alfredo Mayo • Víctor Alcázar Fernando Sancho • Emilio Gutiérrez Caba Maria Rosa Sclauzero • Giancarlo Sisti | ||
| Müsica: Jesus Villa Rojo | ||
| Léngua: Itagliàṅ | ||
| Dürä dal film: 90 minüt | ||
| Nasiōṅ: Itàglia • Spaggna | ||
Nelle pieghe della carne (In dal pighi dla carna) 'l è 'n film thriller dal 1970 ad Sergio Bergonzelli. 'L è stâ girâ a Pinēd in di Abrùs e pò distribuî anc a 'l èstar c'n al tìtul 'd “In the folds of the flesh”.
Al dū prutagunìsti, l'Eleonora Rossi Drago e la Pier Angeli, i aṅ pruâ a masàr-as pôc tèmp dòp avér girâ cla pelìcula chè, cun la secónda, ex muróśa ad James Dean, ch'la gh l'à anc cavàda murénd a sōi trénta-nóṿ an.
Sunt
La guernànta Lucille (Eleonora Rossi Drago) la viṿ in un castèl in sal mâr insém a sò anvōd Colin (Emilio Gutiérrez Caba) e a la fiōla dal padròṅ, la Falaise (Pier Angeli). Dimóndi an prima un sasèṅ ch'al s éra lugâ in dal lōr giardèṅ (Fernando Sancho), prima 'd ès'r arestâ par la pulisìa, 'l iva fat in tèmp a védar la Lucille mét'r in mòt na barca a mutōr sénsa ninsòṅ a bōrd e pò saplìr òṅ. Chi lò al prév èsar pròpria 'l padròṅ dla vila, al sgnōr Andrè (Giancarlo Sisti), cardû mòrt in mâr. Invéci l'è stada la Falaise a cupàr-al tajànd-ag la tèsta cun na sabla dòp che lò 'l iva pruâ a viulentàr-la da pìcula. Ma a gh'è quèl ch'a traśa parchè lē la gh'à na pirùca śala in cô quànd invéci i sò cavìi i èṅ scûr cuma qvéi dla fiōla dla guernànta mòrta in 'n incidènt, l’Ester, mént'r in manicòmi a gh'è na biónda ch'la pâr pròpria la Falaise (Maria Rosa Sclauzero). Adès l'è la Lucille ch'la tîṅ adrē a 'l castèl.
Un dè i rìvan lè, cun sèg al sò caṅ lóv, un cuśèṅ 'd Andrè, Michel (Alfredo Mayo), e 'n sò amìg, Alex (Víctor Alcázar). I vènan cupâ tut dū par la Falaise dòp ch'i èṅ andâ a lèt sèg parchè quàla là, ch'l'è na purcùsa 'd prim órdan anc s'al muróś la gh 'l à bèla in Colin, la gh'à sèmp'r in a mènt qvél ch'a gh'éra sucès da pìcula e masàr i óm ch'i gh próan sèg 'l è più fòrt ad lē. Colin al fà fóra anc la bèstia ch'la s éra misa a scavàr in dal giardèṅ in du a gh'éra 'l cadàvar.
I prubléma p'r i tri i n finìsan minga lè parchè in cal mént'r a s fà viṿ al delinquènt ch'in alóra 'l iva vdû la Lucille saplìr Andrè. Par taśēr al vōl un muć ad bèsi. Invéci la guernànta la 'l fà fóra in dla vasca da bagn cun dal cianûr e pò la gh fà di savòṅ avénd-ag tut qvél ch'a gh vōl in cantìna.
Un dè a riva lè 'n óm ch'al diś 'd ès'r Andrè (Alfredo Mayo). Dòp tant an a s fà fadìga a 'rcós'r-al anc parchè in cal méntar al s éra fat far na plàstica a la ghigna.