Ned Beatty

C'l artìcul chè 'l è scrit in Miranduléś

Ned Thomas Beatty (Louisville, 6 ad Luj dal 1937 - Los Angeles, 13 ad Śugn dal 2021, a s lèś [ˈnɛd ˈbiːɾi] in ingléś), 'l è stâ 'n atōr americàṅ, specialiśâ in rōi da caraterìsta.

In dla sò caréra, andàda avànti par quarànt'an, 'l à laurâ in sènt-a-ssanta prudusiòṅ fra cìnema e televiśiòṅ, meritànd-as na nomination a i Prèmi Òscar dal 1977 p'r al drama satìrig Quinto potere, in dla part dal padròṅ 'd un network televiśìṿ ch'al fà 'n sò munòlug su 'l “fòrsi primurdiàli” davànti a 'l giurnalìsta Peter Finch.

Biugrafìa

Uriginàri dna famìja dal Kentucky, Ned al taca a lauràr da śōv'n a teàtar. Al sò debùt a 'l cìnema 'l è da paùra: in Un tranquillo weekend di paura (1972) al fà la part 'd un turìsta ch'insém a i sò amìg Burt Reynolds e Jon Voight al gh'à da far i cònt c'n un grup ad muntanàr “hillbilly” a casa e òṅ ad chi lōr al gh al mét anc in cal pòst. In dal 1975 al tōś part a òṅ di film più impurtànt ad Robert Altman, Nashville, insém a la Geraldine Chaplin e a Keith Carradine.

'L an dòp al rècita in 'n àtar filmòṅ 'd Alan J. Pakula su 'l scàndal Watergate, Tutti gli uomini del presidente, a fiànc ad Dustin Hoffman e 'd Robert Redford, e anc in Quinto potere ad Sidney Lumet, pelìcula ch'la gh fruta na candidadùra a i Òscar che però al và a Jason Robards par la part dal giurnalìsta Ben Bradlee fata pròpria in Tutti gli uomini del presidente. In séguit al lavóra in dal film ad scarésa L'esorcista II - L'eretico (1977), cun la Linda Blair e Richard Burton, e in dal fantàstic Superman (1978), in dla part dal pastisòṅ culaburadōr ad Lex Luthor (Gene Hackman).

In di an Utànta a 'l ém vist in Superman II (1980), sèmpar cun Christopher Reeve in di pagn ad Superman e la Margot Kidder in qvéi dla Lois Lane, in dal thriller Big Easy - Brivido seducente (1986), cun la còpia Dennis Quaid/Ellen Barkin, in dal film ad spiunàǵ Quarto protocollo (1987), cun prutagunìsta Michael Caine, e in dla cumèdia Cambio marito (1987), in dla part 'd un prucuradōr distretuàł sénsa scrùpui ch'al vōl cundanàr e mandàr su la scrana lètrica Henry Gibson anc s'al gh'à da far i cònt c'n al lavōr dla giurnalìsta Kathleen Turner e dal sò èx marè Burt Reynolds.

In di an Nuànta 'l à recitâ in dal còmig Riposseduta (1990), parudìa ad L'esorcista, in dla cumèdia rumàntica Doppia anima (1992), faghénd al pàdar mèdag dla Meg Ryan inamuràda 'd Alec Baldwin, in dal drama spurtìṿ He Got Game (1998), cun Denzel Washington e la Milla Jovovich, e in dla cumèdia śala La fortuna di Cookie (1999), insém a la Glenn Close, la Julianne Moore, la Liv Tyler e Chris O'Donnell.

Fra i sò ùltim lavōr a psém nutàr al drama The Walker (2007), in dla part 'd un śugadōr ad canàsta e óm ad putēr a Washington, al thriller Shooter (2007), cun prutagunìsta Mark Wahlberg, e 'l thriller The Killer Inside Me (2010), insém a Casey Affleck, la Kate Hudson e la Jessica Alba.

Fra i telefìlm e 'l minisérie da lò fat a 'rcurdém Szysznyk, Le strade di San Francisco, Una donna di nome Golda, La signora in giallo, Alfred Hitchcock presenta, Autostop per il cielo, Homicide (par trénta-tri epiśòdi), CSI - Scena del crimine e Law & Order - I due volti della giustizia.