Natalie Wood

C'l artìcul chè 'l è scrit in Miranduléś

La Natal'ja Nikolaevna Zacharenko, cgnusùda méj cuma Natalie Wood (San Francisco, 20 ad Luj dal 1938 - Ìśula 'd Santa Catalìna, 29 ad Nuvémbar dal 1981, a s lèś [ˈnætəli wʊd] in ingléś), l'è stada n'atōra americàna cun di urìgini ucràini. La gh'à na stéla in dla Hollywood Walk of Fame e anc dū Golden Globe vins (su sèt nomination).

In dla sò caréra l'è stada bòna 'd ricévar tré candidadùri a i Prèmi Òscar: in dal 1956 par la part dla muróśa 'd James Dean in Gioventù bruciata, in dal 1962 p'r al rōl dna ragasa dal Kànsas di an Vint ch'la viṿ 'n amōr turmintâ cun Warren Beatty in Splendore nell'erba e in dal 1964 in di pagn dna śōvna ìtalo-americàna ch'l'armàgn insìnta dòp na nòt ad sès cun Steve McQueen in Strano incontro.

La Wood l'à tacâ a far cìnema bèla da pìcula tulénd part a soquànt film di an Quarànta cuma la cumèdia Non c'è due... senza tre (1946), in dla part dla fiōla dla Barbara Stanwyck e 'd Robert Cummings, la cumèdia Il miracolo della 34ª strada (1947), cun prutagunìsta la Maureen O'Hara, e la cumèdia sentimentàla Il fantasma e la signora Muir (1947), a fiànc dla Gene Tierney e 'd George Sanders.

Fra i sò àtar film più impurtànt a 'rcurdém al drama Vertigine (1958), in còpia cun Gene Kelly, al musical West Side Story (1961), al drama Lo strano mondo di Daisy Clover (1965), in dua l'à laurâ cun Christopher Plummer e Robert Redford, al còmig La grande corsa (1965), insém a Jack Lemmon, Tony Curtis e Peter Falk, al drama Questa ragazza è di tutti (1966), cun Robert Redford e Charles Bronson, e Il candidato (1972), pelìcula giràda incóra cun Robert Redford.

Fra i sò ùltim lavōr a psém nutàr la cumèdia Una valigia piena di dollari (1976), a fiànc ad Michael Caine, al catastròfic Meteor (1979), in dla part dna tradutōra rusa ch'la lavóra a cuntàt cun Sean Connery, e 'l fantasientìfic vgnû fóra dòp la sò mòrt Brainstorm - Generazione elettronica (1983) cun prutagunìsta Christopher Walken.

In televiśiòṅ l'à recitâ in soquànti série televiśìvi cuma General Electric Theater, Switch, Cuore e batticuore e Da qui all'eternità.

La Wood la s è spuśàda par dó vòlti c'n al culéga Robert Wagner, in dal 1957 e in dal 1969, in dal mèś un divòrsi e 'n àtar matrimòni c'n al prudutōr e scritōr Richard Gregson. In dal 1981, quànd la gh'iva quarànta-tri an, l'è mòrta andgàda a 'l larg dl'Ìśula 'd Santa Catalìna in Califòrgna. Cla nòt lè la s catàva insìma a 'n yacht insém a Robert Wagner, a 'l atōr Christopher Walken e a 'l cmandànt Dennis Davern. A séguit dna quistiunàda cun sò marè a pâr ch'l'àppia tòlt un gumòṅ p'r andàr via ad nascòst anc s'a n gh sa vdiva gnint, s'la n saìva minga nudàr e la gh'is paùra dl'àqua. L'è stada catàda mòrta la matìna dòp, cun di nis in di bras, su i pōls e su 'l còl. Par la pulisìa e p'r al coroner Thomas Noguchi dla cuntèa ad Los Angeles, a s è tratâ dna daśgràsia.