Natalie Portman

C'l artìcul chè 'l è scrit in Miranduléś

La Neta-Lee Hershlag (נטע-לי הֵרְשְׁלַג in ebràic)‎, cgnusùda méj cuma Natalie Portman (Geruśalèm, 9 ad Śugn dal 1981, a s lèś [ˈnætəli ˈpɔɹtmən] in ingléś), l'è n'atōra e prudutōra iśraegliàna cun sitadinànsa americàna.

In dla sò caréra, tacàda in dal 1994 c'n al film Léon faghénd la part dla baghéta amìga dal prutagunìsta Jean Reno, l'è stada candidàda par quàtar vòlti a i Prèmi Òscar, in dal 2005 par Closer, drama cun la Julia Roberts, Jude Law e Clive Owen, in dal 2011 p'r al thriller Il cigno nero, in dua l'à vins la statṿa cuma atōra prutagunìsta, in dal 2017 p'r al biugràfic Jackie, in di pagn dla Jacqueline Kennedy, e in dal 2026 p'r al film 'd animasiòṅ Arco - Un'amicizia per salvare il futuro da lē prudót. L'à vins anc dū Golden Globe e 'n Prèmi BAFTA.

Par la sò bravitù, fiṅ da 'l inìsi l'à catâ spasi in film impurtànt cuma 'l pulisiésc Heat - La sfida (1995), cun prutagunìsta Al Pacino e Robert De Niro, la cumèdia dramàtica Beautiful Girls (1996), a fiànc ad Timothy Hutton, Matt Dillon, la Mira Sorvino, l'Uma Thurman e David Arquette, in dal film sentimentàł Tutti dicono I Love You (1996), cun la Julia Roberts e Woody Allen, e in dal grutésc Mars Attacks! (1996), in dla part dla fiōla 'd Jack Nicholson presidènt di Stat Unî.

In séguit George Lucas al la sarnìs par far-ag far la part dla Padmé Amidala in di film Star Wars - Episodio I - La minaccia fantasma (1999), Star Wars - Episodio II - L'attacco dei cloni (2002) e Star Wars - Episodio III - La vendetta dei Sith (2005). In chi an lè a l'ém vista anc in dal western Ritorno a Cold Mountain, insém a Jude Law, la Nicole Kidman e a la Renée Zellweger, in dal thriller 'd asiòṅ V per Vendetta (2005), in dua la s unìs a Hugo Weaving p'r arbaltàr al regìm tutalitàri ch'a gh'è in dal Régn Unî, e in dal film ad guèra Brothers (2009), a fiànc ad Tobey Maguire e Jake Gyllenhaal.

Su 'l set dal film dal 2010 Il cigno nero, ch'al gh fruta 'n Academy Award anc par via dal sò lavōr pēś ch'l'iva fat cun l'insgnànta Georgina Parkinson d'l American Ballet Theatre p'r imparàr bèṅ al balét clàsic, l'à cgnusû al balarèṅ Benjamin Millepied ch'l'à pò spuśâ dū an dòp, armagnénd sèg in fiṅ a 'l 2023 e divursiànd pò in dal 2024. In séguit l'à fat la part dla Jane Foster in soquànt film trat da i fumét dla Marvel Comics cuma Thor (2011), Thor: The Dark World (2013), Avengers: Endgame (2019) e Thor: Love and Thunder (2022).

A l'arcurdém anc p'r al pelìculi Amici, amanti e... (2011), in còpia cun Ashton Kutcher, par Sognare è vivere (2015), drama stòrig ch'l è anc al sò debùt da regìsta, e p'r i dū film girâ cun Terrence Malick: Knight of Cups (2015), in dua l'à incruśâ Christian Bale e la Cate Blanchett, Song to Song (2017), cun Michael Fassbender e Ryan Gosling, e Annientamento (2018), film ad fantasiénsa in dua l'à fat la part dna bióluga. Al sò ùltim lavōr a 'l cìnema 'l è 'l aventuróś Fountain of Youth - L'eterna giovinezza (2025).

A teàtar l'à recitâ a Broadway faghénd Al diàri dl'Anna Frank e pò anc Al gabiàṅ 'd Anton Čechov par la regìa ad Mike Nichols.

Sustenidōra dal partî demucràtic e vegàna, l'à fat dal batàj p'r i dirìt dal bèsti. L'è bòna 'd dascórar in ingléś, ebràic, francéś, tedésc, giapunéś e àrab.

Filmugrafìa

cuma atōra

1994 - Léon, regìa ad Luc Besson
1995 - Heat - La sfida (Heat), regìa ad Michael Mann
1996 - Beautiful Girls, regìa ad Ted Demme
1996 - Tutti dicono I Love You (Everyone Says I Love You), regìa ad Woody Allen
1996 - Mars Attacks!, regìa ad Tim Burton
1999 - Star Wars - Episodio I - La minaccia fantasma (Star Wars: Episode I - The Phantom Menace), regìa ad George Lucas
1999 - La mia adorabile nemica (Anywhere but Here), regìa ad Wayne Wang
2000 - Qui dove batte il cuore (Where the Heart Is), regìa ad Matt Williams
2001 - Zoolander, regìa ad Ben Stiller
2002 - Star Wars - Episodio II - L'attacco dei cloni (Star Wars: Episode II - Attack of the Clones), regìa ad George Lucas
2003 - Ritorno a Cold Mountain (Cold Mountain), regìa 'd Anthony Minghella
2004 - La mia vita a Garden State (Garden State), regìa ad Zach Braff
2004 - Closer, regìa ad Mike Nichols
2005 - Free Zone, regìa 'd Amos Gitai
2005 - Star Wars - Episodio III - La vendetta dei Sith (Star Wars: Episode III - Revenge of the Sith), regìa ad George Lucas
2005 - V per Vendetta (V for Vendetta), regìa ad James McTeigue
2005 - Domino One, regìa ad Nick Louvel
2005 - Paris, je t'aime, regìa ad Tom Tykwer
2006 - L'ultimo inquisitore (Goya's Ghosts), regìa ad Miloš Forman
2007 - Un bacio romantico - My Blueberry Nights (My Blueberry Nights), regìa ad Wong Kar-wai
2007 - Il treno per il Darjeeling (The Darjeeling Limited), regìa ad Wes Anderson
2007 - Mr. Magorium e la bottega delle meraviglie (Mr. Magorium's Wonder Emporium), regìa ad Zach Helm
2008 - L'altra donna del re (The Other Boleyn Girl), regìa ad Justin Chadwick
2009 - L'amore e altri luoghi impossibili (Love and Other Impossible Pursuits), regìa ad Don Roos
2009 - Brothers, regìa ad Jim Sheridan
2009 - New York, I Love You, regìa ad regìsta difarènt
2010 - Il cigno nero (Black Swan), regìa ad Darren Aronofsky
2010 - Joaquin Phoenix - Io sono qui! (I'm Still Here), regìa ad Casey Affleck
2010 - Hesher è stato qui (Hesher), regìa ad Spencer Susser
2011 - Sua Maestà (Your Highness), regìa ad David Gordon Green
2011 - Amici, amanti e... (No Strings Attached), regìa 'd Ivan Reitman
2011 - Thor, regìa ad Kenneth Branagh
2013 - Thor: The Dark World, regìa 'd Alan Taylor
2015 - Knight of Cups, regìa ad Terrence Malick
2015 - Sognare è vivere (A Tale of Love and Darkness), regìa dla Natalie Portman
2015 - Bastardi insensibili (The Heyday of the Insensitive Bastards), regìa ad regìsta difarènt
2016 - Jane Got a Gun, regìa ad Gavin O'Connor
2016 - Jackie, regìa ad Pablo Larraín
2016 - Planetarium, regìa dla Rebecca Zlotowski
2017 - Song to Song, regìa ad Terrence Malick
2018 - Annientamento (Annihilation), regìa 'd Alex Garland
2018 - Vox Lux, regìa ad Brady Corbet
2018 - La mia vita con John F. Donovan (The Death and Life of John F. Donovan), regìa ad Xavier Dolan
2019 - Lucy in the Sky, regìa ad Noah Hawley
2019 - Avengers: Endgame, regìa 'd Anthony e Joe Russo
2022 - Thor: Love and Thunder, regìa ad Taika Waititi
2023 - May December, regìa ad Todd Haynes
2025 - Fountain of Youth - L'eterna giovinezza (Fountain of Youth), regìa ad Guy Ritchie

cuma regìsta

2009 - New York, I Love You, epiśòdi Natalie Portman
2015 - Sognare è vivere (A Tale of Love and Darkness)

Culegamènt estéran

Àtar prugèt

Wikiquote contiene citazioni di o su Natalie Portman
Wikimedia Commons contiene file multimediali su Natalie Portman