Nashville
|
C'l artìcul chè 'l è scrit in
Miranduléś |
Nashville (a s lèś [ˈnæʃvɪɫ] in ingléś) l'è na sità di Stat Unî ad 684.410 abitànt (dat dal 2016), capitàla dal stat dal Tennessee, la secónda sò più granda dòp Memphis. La s cata su 'l rivi dal fiùm Cumberland, in dla cuntèa ad Davidson, e l'è stada tiràda sù in dal 1779 da soquànt espluradōr.
Al sò clima 'l è sub-trupicàł ùmid méntar l'è cgnusùda anc c'n al scutmàj ad la sità dla mùśica esénd la sēd dal Grand Ole Opry, un prugràma radiufònig famóś un muć ad mùśica country, ad dimóndi cà discugràfighi e dla Gibson ch'la fà dal chitàri e di bas vindû in tut al mónd. Al regìsta Robert Altman al gh'à girâ chè òṅ di sò film più impurtànt, Nashville, durànt i sinc dè 'd un fèstival ad mùśica country.
Tgnénd adrē a 'l censimènt dal 2010, i sò abitànt i èṅ biànc p'r al 61,4%, ispànig p'r al 9,8%, négar p'r al 27,7% e aśiàtic p'r al 3,0%. La pin-up Bettie Page l'è nada chè.
Da 'n punt ad vista pulìtig, la sità l'è na ròcafòrt dal partî demucràtic anc s'la s cata in òṅ di stat più róś ch'a s a gh sia. Al sò distrét cungresuàł al n è piò stâ vins da i republicàṅ da la fiṅ dla guèra 'd secesiòṅ americàna tant ch'adès la batàja véra la s cumbàt chè fra i demucràtic fra la sò anma radicàla e qvéla dal guèran bòṅ. La sò sìndiga, da 'l 2015, l'è la demucràtica Megan Barry.
In dal 1867 a Nashville a gh'è stâ al prim cungrès dal Ku Klux Klan, muimènt fundâ dū an prima.