Nancy Allen

C'l artìcul chè 'l è scrit in Miranduléś

La Nancy Anne Allen (New York, 24 ad Śugn dal 1950, a s lèś [ˈnænsi ˈælən] in ingléś), l'è n'atōra americàna.

L'è cgnusùda specialmènt par soquànt film girâ par Brian De Palma, ch'l è stâ sò marè da 'l 1979 a 'l 1984, e par la trilugìa ad Robocop.

Biugrafìa

Fiōla 'd un tenènt dal Dipartimènt ad Pulisìa 'd New York, da śōvna la Allen l'à tintâ na caréra cuma balarìna, faghénd di cōrs a la High School of Performing Arts e a la Jose Quintano's School for Young Professionals. Dòp èsar pasàda a far di lavōr in televiśiòṅ e avēr far al sò debùt a 'l cìnema in dla 1973 in dal cumèdia dramàtica L'ultima corvé cun Jack Nicholson, la cgnós al regìsta Brian De Palma ch'la gh fà far la part dla muróśa 'd John Travolta in Carrie, lo sguardo di Satana (1976) in dua la strulga na sfilaràda 'd cativèri cóntar la pòvra Sissy Spacek.

Dòp cal film chè la lavóra cun Robert Zemeckis in dla cumèdia 1964 - Allarme a N.Y. arrivano i Beatles! (1978) e cun Steven Spielberg in dal film 'd asiòṅ 1941 - Allarme a Hollywood (1979) insém a John Belushi e a Mickey Rourke.

La tórna a recitàr par De Palma in tri di sò film: in Home Movies - Vizietti familiari (1979) la fà na śuvnòta misa a diéta da 'l sò ragàs, in dal thriller Vestito per uccidere (1980) la fà na putàna testimòni dal masamènt dl'Angie Dickinson in asinsōr mént'r in dal śal Blow Out (1981) la fà la part dla Sally a fiànc ad John Travolta.

In dal 1984 l'è in dal cast dal film fantàstic Philadelphia Experiment, girâ in còpia cun Michael Paré, pò la vîṅ sarnìda da Paul Verhoeven p'r al film 'd asiòṅ RoboCop in di pagn dl'agìnta Anne Lewis. La Allen la turnarà a far cal rōl lè anc in di séguit RoboCop 2 (1990) e RoboCop 3 (1993) dirèt però da di regìsta difarènt.

Dòp avēr tòlt part a 'l film ad scarésa Poltergeist III - Ci risiamo (1988), tèrs epiśòdi dla série tacàda da Poltergeist - Demoniache presenze ad Tobe Hooper, la Allen l'à tacâ a recitàr da spés in prudusiòṅ televiśìvi cuma Il tocco di un angelo, Oltre i limiti, Il commissario Scali e Law & Order - I due volti della giustizia.

Fra i sò ùltim film girâ a 'l cìnema a 'rcurdém la cumèdia noir Out of Sight, a fiànc ad George Clooney e dla Jennifer Lopez, e la pelìcula ad scarésa Children of the Corn 666 - Il ritorno di Isaac, trata da 'n racònt ad Stephen King.