Muśèo-monumèint a 'l deportê polìtic e rasiêl

Da Wikipedia.
Jump to navigation Jump to search

C'l artìcol chè 'l è scrit in Carpśàn Emiliàn

El stéli dal Muśèo-monumèint a 'l deportê, dàint'r in dal Castêl ed Chêrp.

Al Muśèo-monumèint a 'l deportê polìtic e rasiêl 'l è 'n muśèo ed Chêrp, avèrt in dl an 1973, in sìm'a 'l argumèint dla deportasiòun tedèsca di perśunér edl'ùltma Guèra.
Al muśèo al s cata in soquànti sèli dla pert a meśdè dal pian 'd tèra dal castêl. La só progetasiòun l'à vist anca di nòm mìa cìc, c'ma quī di pitōr Cagli, Guttuso, Léger, Longoni, Picasso, Steiner, ch'i àn cmandê ala Coperadìva di Muradōr ed Chêrp c'm'a gh'éra da fèr el perti in cimèint, śgrafièdi e colorèdi 'd ròs, négher e bordò, per dèr dla monumentalitê a 'l muśèo. Acsè, in dal só curtîl ed meśdè, i àn tirê sù 16 stéli élti retangolèri 'd cimèint ch'i gh'àn scrìt in sìma 60 nòm ed sitê indû i naśìsta i avìven custruî i camp ed consentramèint.
Ded sòt'a cal bruti stéli lè però, i gh'àn piantê dal rōśi, ch'i gh'àn da fèr pinsèr a 'n naser incòr n'ètra volta.
In dal só 13 sèli 'd cimèint fàcia vìsta, in sìm'ai mùr, dôp che soquànti pitùri modèrni grafièdi e colorèdi sōl ed négher e ròs, a gh'è sèimper scrìt soquànti frêś che i perśunér i avìven inviê in dal só lettri a cà ai parèint.
In dl'ùltma sèla, la Sèla di Nòm, in sìm'ai mùr a s lēś i nòm ed 15.000 deportê, tùt grafiê tùt intór'n in dal cimèint anca in dal vólti e in dal sufìt.
Incō cal muśèo chè 'l è tgnû drē dala Fundasiòun Fòsel, ch'la tìn adrē anc a quel ch'a gh armàgn dal Camp ed deportasiòun ed Fòsel.

Soquànt grafît in dal mùr, dal Corrado Cagli e dl Alberto Longoni.

Soquànti só foto

Dagli ètri foto tolti śò da Paolo Monti in dal 1973

Vóś lighèdi

Èter progêt

Colegamèint estèren

Noti e referèinsi