Moritz Bleibtreu

C'l artìcul chè 'l è scrit in Miranduléś

Moritz Johann Bleibtreu (Mònag 'd Bavéra, 13 'd Agóst dal 1971, a s lèś [ˈmoːʁɪts ˈjoːhan ˈblaɪptʀɔʏ] in tedésc) 'l è 'n atōr tedésc, vinsidōr par tré vòlti a 'l Fèstival ad Berlîṅ, in dal 1999 cuma prumésa dal cìnema européo, in dal 2002 p'r al thriller psiculògic The Experiment - Cercasi cavie umane e in dal 2006 par Le particelle elementari.

Biugrafìa

Fiōl dna famìja 'd atōr uriginària dl'Àustria, Bleibtreu al nas in Bavéra ma pò al và a star a Ambûrg in dua al taca a lauràr da putèṅ in dal mónd dal spetàcul tulénd part a 'l film TV Ich hatte einen Traum (1980). In séguit al và a star a Parì, cuma ragàs a la para p'r imparàr al francéś, e pò incóra a Róma e a New York par studiàr recitasiòṅ.

Turnâ in Germàgna, Bleibtreu al taca a lauràr in série televiśìvi e a 'l cìnema. A 'l arcurdém a fiànc dla Franka Potente in dal thriller Lola corre (1998), in The Experiment - Cercasi cavie umane (2001), in di pagn 'd un tasìsta che par bèsi al finìs a far la part 'd un parśunēr in 'n esperimènt, e in dal dramàtic A torto o a ragione (2001) cun prutagunìsta Harvey Keitel.

Da i an Dumìla in avànti la fat na sèrta caréra anc a Hollywood tulénd part a 'l drama Verità apparente (2001), a fiànc dla Cameron Diaz, in dal stòrig Munich (2005), c'n al rōl 'd un militànt tedésc dla sinìstra radicàla, in dal film 'd asiòṅ Speed Racer, faghénd al persunàǵ dal Fantàśma Griś, e in dal thriller Passioni e desideri (2011) insém a Anthony Hopkins e a Jude Law.

In chi an lè a 'l ém vist anc in dal film Le particelle elementari (2006), in dla part d'n insgnànt ad létri cun l'usesiòṅ p'r al sès, in thriller dramàtic L'eletto (2006), a fiànc dla Monica Bellucci e dla Catherine Deneuve, in dal drama The Walker (2007), cun la Kristin Scott Thomas e la Lauren Bacall, e in Soul Kitchen (2009), in di pagn 'd un delinquènt ch'l à avèrt un risturànt a Ambûrg.

In Itàglia Bleibtreu 'l à laurâ c'n i fradèi Taviani in La masseria delle allodole (2007), insém a la Paz Vega e a l'Ángela Molina, cun Michele Placido in dal biugràfic Vallanzasca - Gli angeli del male (2010), a fiànc ad Kim Rossi Stuart e 'd Filippo Timi, e cun Roberto Andò in dal thriller Le confessioni (2016), cun prutagunìsta Toni Servillo.

Fra i sò ùltim lavōr a psém nutàr al stòrig Woman in Gold (2015), fat insém a l'Helen Mirren e a Ryan Reynolds, la cumèdia dramàtica Bye Bye Germany (2017), in dla part d'n ebrèj scampâ a i camp ad stermìni naśìsta che finìda la guèra al vrév lasàr la sità 'd Francfòrt p'r andàr a star in di Stat Unî, e in dal thriller psiculògic Cortex (2020), pelìcula in dua 'l à fat anc al sò debùt da regìsta.

Moritz al s è spuśâ in dal 2022 cun na dóna dimóndi più śōvna 'd lò, la Saskia de Tschaschell. Insém i gh'aṅ abû un fiōl ch'a s śònta a 'n àtar nâ in dal 2008 da na vècia relasiòṅ.