Montgomery Clift

C'l artìcul chè 'l è scrit in Miranduléś

Montgomery Clift in na fóto di an Quarànta

Edward Montgomery Clift (Omaha, 17 'd Utóbar dal 1920 - New York, 23 ad Luj dal 1966, a s lèś [ˈɛdwɚd mɒntˈɡʌməri klɪft] in ingléś) 'l è stâ 'n atōr americàṅ. Al gh'à na stéla in dla Hollywood Walk of Fame.

Biugrafìa

Uriginàri dal Nebràska, al taca a recitàr da ragasōl in di teàt'r ad Broadway fra i an Trénta e Quarànta faghénd al sò debùt a 'l cìnema in dal 1946 c'n al film Il fiume rosso a fiànc ad John Wayne. Clift al gh mét pôc a far-as strada a Hollywood dasfrutànd la sò bravitù e la sò recitasiòṅ mudèrna e sensìbla.

In dal gir ad sinc an al vîṅ numinâ par tri vòlti a i Prèmi Òscar: in dal 1949 p'r al drama Odissea tragica ad Fred Zinnemann, in dal 1952 p'r Un posto al sole, in còpia cun la sò amìga Elizabeth Taylor, e in dal 1954 p'r al drama biugràfic Da qui all'eternità, girâ insém a Burt Lancaster, la Deborah Kerr, Frank Sinatra e la Donna Reed. Sèmp'r in chi an lè al lavóra cun Alfred Hitchcock in Io confesso in dua 'l fà 'n prevòstar che, durànt na cunfesiòṅ, al sènt 'n óm ch'al gh diś 'd avēr cupâ 'n avucàt durànt un furt ma purtròp al gh'à da taśēr par via dal segrét dal sacramènt.

In dal 1956, quànd la sò caréra l'éra a 'l màsim, al fà 'n brut incidènt in màchina armagnénd uféś in ghigna, cun di castròṅ e na scavśadùra dla ganàsa. Anc se cun di prubléma al và avànti listés, tulénd part a di film cuma I giovani leoni (1958), cun Marlon Brando, Improvvisamente, l'estate scorsa (1959), drama cun l'Elizabeth Taylor e la Katharine Hepburn, e Gli spostati (1961), pelìcula “maladìda” cun la Marilyn Monroe e Clark Gable.

In dal 1962 par la quàrta vòlta al ricév na nomination p'r i Academy Award par la part ad Rudolph Petersen in Vincitori e vinti, filmòṅ cun Spencer Tracy, Burt Lancaster, la Marlene Dietrich e la Judy Garland, armagnénd però incóra na vòlta a bèc sut.

Mis mâł ad salùt, cun di prubléma 'd dipendénsa p'r al madśìni e da spés ciùc, Montgomery al mōr śōvan par 'n infàrt ch'al gh'iva quarànta-sinc an.

Filmugrafìa

1948 - Il fiume rosso (Red River), regìa 'd Howard Hawks
1948 - Odissea tragica (The Search), regìa ad Fred Zinnemann
1949 - L'ereditiera (The Heiress), regìa ad William Wyler
1950 - La città assediata (The Big Lift), regìa ad George Seaton
1951 - Un posto al sole (A Place in the Sun), regìa ad George Stevens
1953 - Io confesso (I Confess), regìa 'd Alfred Hitchcock
1953 - Stazione Termini, regìa ad Vittorio De Sica
1953 - Da qui all'eternità (From Here to Eternity), regìa ad Fred Zinnemann
1957 - L'albero della vita (Raintree County), regìa 'd Edward Dmytryk
1958 - Non desiderare la donna d'altri (Lonelyhearts), regìa ad Vincent J. Donehue
1958 - I giovani leoni (The Young Lions), regìa 'd Edward Dmytryk
1959 - Improvvisamente, l'estate scorsa (Suddenly, Last Summer), regìa ad Joseph L. Mankiewicz
1960 - Fango sulle stelle (Wild River), regìa 'd Elia Kazan
1961 - Gli spostati (The Misfits), regìa ad John Huston
1961 - Vincitori e vinti (Judgment at Nuremberg), regìa ad Stanley Kramer
1962 - Freud, passioni segrete (Freud: The Secret Passion), regìa ad John Huston
1966 - L'affare Goshenko (L'éspion), regìa ad Raoul Lévy

Culegamènt estéran

Àtar prugèt

Wikiquote contiene citazioni di o su Montgomery Clift
Wikimedia Commons contiene file multimediali su Montgomery Clift