Mille peccati... nessuna virtù

Da Wikipedia.

C'l artìcul chè 'l è scrit in Miranduléś Emiliàn

Mille peccati... nessuna virtù

Cōrs ad sedusiòṅ par raśdóri
Mila pcâ... gnanc na virtù
1969
Regìa: Sergio Martino
Scritōr: Sergio Martino
Atōr: Vóś: Riccardo Cucciolla
Müsica: Peppino De Luca
Léngua: Itagliàn
Dürä dal film: 91 minüt
Nasiōṅ: Itàglia


«
'L óm dal dè 'd incō, dasfrutànd al pcâ, gh guadàgna'l dabòṅ?»


Mille peccati... nessuna virtù (Mila pcâ... gnanc na virtù) 'l è 'n film ducumentàri dal gènar “mónd” 1969 ad Sergio Martino cuntâ par Riccardo Cucciolla.

Sunt

In Germàgna a gh'è 'n trêṅ ciamâ “trêṅ ròśa” in dua dal còpi ad sès difarènt, un masć e na fémna ch'i n s cgnósan briśa, i pōlan giràr a mità prèsi in di fiṅ 'd stmana psénd anc far dal purcarìi durànt al viàś, a gh'è sōl da dir ch'al dóni bruti fighi i pèrd'n al trêṅ parchè i n càtan ninsòṅ ch'a vaga sèg. A Francfòrt a gh'è na dita ch'la śibìs a pagamènt dal dóni a i óm 'd afâr ad pasàǵ. In Śvèsia, un paéś ch'l è 'l as ad brìscula in fat ad pcâ e i al sànan tut, al dóni puti i pōlan tōr in afìt di óm par far-ag cumpagnìa. In Danimàrca i pènsan che prima 'd dar adòs a i śōvan ch'i tōśan 'l LSD a gh sarév da pruàr-al e 'n giurnàl 'l al dà a gràtis cumprànd-al.

Sèmp'r in Śvèsia a gh'è na léǵ ch'la pruibìs a 'l màdar ad dar di scupasòṅ a i sò putèṅ ma cuma pōl'n-i vgnir sù bèṅ chi baghét lè s'al sità i èṅ pîni 'd negòsi ch'i śibìs'n al pòran in vedrìna? Pò a gh'è anc di śōvan ch'i s fànan pagàr par far di film spurcaciòṅ gusànd davànti a 'l telecàmri, gh'è-la dla difarènsa fra cal mistēr lè e qvél dal putàni? A-j-ém pruâ a far-ag dal dmandi ma a sintìr-i a vîṅ al lat a i śnòć.

In Germàgna i śōvan i s èṅ mis a vìvar tut insém in pòst ciamâ “cumùni”, sparténd-as, in mèś a 'l rusc e a la spurcìsia, tut i sò avēr ma anc marè, mujér e fiōi. La Chiquita la spèta 'n fiōl da Karl ma l'è inamuràda 'd Peter ma l'à decìś listés ad spuśàr Karl parchè acsè la pōl ciapàr i tri-mila marc ch'al stat al dà a 'l màdar spuśàdi che lē la gh'à intensiòṅ ad druàr p'r un viàś in Àśia cun Peter. A s sém ardùt acsè, ma a cal pòvar putèṅ lè ch'i gh inségna a star a 'l mónd?

Lóndra l'è pîna 'd negòsi ch'i véndan dal scuri e 'd dóni ch'i s śibìs'n ad ciapàr-i. La gint la s lasa 'ndàr a 'l visi dl'ingurdìśia e pò la và in palèstra par tiràr via la pansa, a s fà par dir. Adès i aṅ anc fat di salòṅ ad belésa p'r óm, invéci ad barba e cavìi, ganàsi e òć, ma in du sém-j-a drē a finìr?! In Śvèsia a gh'è dal camaréri ch'in di bar i sarvìsan c'n al téti 'd fora e pò i balan su i tàvui cuma di robot ad carna mént'r a Berlîṅ a gh'è na dóna ciamàda Beate Uhse ch'l'à fat i bèsi vindénd di śuglèṅ eròtic e dal bàmbuli dal sès. In Śvèsia invéci i aṅ invintâ la dóna 'd plàstica, la cósta utànta-mila franc méntar par cumpràr di pès ad dóna i èṅ abàsta vint-mila franc pò s'ta t cuntènt dla vóś dla dóna in amōr at pâg incóra méno, ma s'i óm i vdìsan la sò ghigna...

A Lóndra a gh'è òṅ ch'al persuàd cun l'ipnutìśum di óm spauróś dal sès 'd èsar di as ad brìscula cun cal dóni, pò al gh fà catàr na ragàsa p'r andàr-'g a fónd. A Àmsterdam i véndan dal mudandi śbuśìdi, di regipèt malnét e di vistidèṅ sexy che na vòlta i sarvìvan sōl p'r inturtàr di marinàr imbariàg, adès anc al sgnōri a mōd, al burghéśi, i i còmpran sénsa vargógna. A Parì al dóni ch'i gh'aṅ paùra 'd pèrd'r i marè i vaṅ a scóla 'd sedusiòṅ da na dóna ch'la gh fà védar cum a s fà a cavàr-as śò.

Al tedésc Kurt al fà 'l pitōr ma al n dróa minga di pnèi par dipìnśar ma i còrp nûd 'd 'n óm e dna dóna che faghénd 'l amōr i sa strùsian su i quàdar méntar lò al gh buta adòs dal culōr. A Berlîṅ pò a gh'è 'n risturànt in du i gh pōl'n andàr sōl i óm cumpagnâ da dal dóni che però i èṅ di trans. A Parì invéci a sucéd al cuntràri: fèsti 'd cumpleàn par dóni e basta, quànd a finìs la tórta lè lōr i tàc'n a balàr insém cuntinuànd un visi ch'l è vèć cuma 'l mónd, mâi in dal còrp e in dal spìrit fat davànti a tut sénsa vargógna. A Àmsterdam un prēt spretâ 'l unìs in matrimòni dū óm. I “spōś”, a dmandém pardòṅ s'i i ciamém acsè, i vènan fóra da la céśa tgnénd-'s al maṅ par partìr p'r al viàś ad nòsi, ma parchè la sò daśgràsia gh'à-la pò d'uféndar tut nuàtar? Anc i prēt in Ulànda adès i s vōlan spuśàr.

A Lóndra al ragàsi puti i vōl'n avér di fiōi sénsa marè e i péscan di masć miténd di anùnsi su i giurnài. A s pōl anc dar che che lōr i sìan cuntènti ma a i putèṅ sénsa pàdar chi gh'è ch'a gh pènsa? A Parì 'l à catâ spasi 'l cult d'l umbrìgul, gint nûda ch'la s cata p'r andàr in èstaśi pinsànd a cla part dal còrp lè, pò a gh'è i drugâ ch'i s divertìs'n a tōr dla murfìna. In Finlàndia da dimóndi tèmp al dóni in età da marè a Nadâł i s càvan śò e pò i s cur'n adrē in mèś a la néṿ insuniànd-as 'l óm di sò sógn dòp ch'i n in pōlan piò da la fadìga. Al mecanìśum 'l è cumpàgn a qvél di drugâ, insuniàr-as di quèi da 'd là da i fat véra.

A Stucólma 'l cumùn al mét di manifèst a i mur p'r insgnàr a la gint a star atènti a i mâi purtâ da 'l sès, a vōl dir che anc chi śvedéś lè, ch'i aṅ sèmp'r alvâ in élt la bandéra dal sès cuma sìmbul dla libertà, adès i capìs'n i sò śbali parchè un pòpul lìbar al n pōl minga ès'r un pòpul ad malâ. I prutestànt i èṅ però drē a far-'s avànti, ad nòt i quàć'n al vedrìni cun dal culōr par lugàr al rivìsti pòran mustràdi a tut sénsa vargógna. 'L è 'l ségn che dimóndi śōv'n i n gh càscan piò parchè la libertà a n è minga mustràr al purcarìi in na manéra acsè franca, acsè l'è sōl na carnevalàda. E a Mònag 'd Bavéra, durànt al carnevàł, óm e dóni i pèrdan la tèsta, i s làs'n andàr, i faṅ i purcùs, i s càvan śò in un delìri 'd cuntintésa minga umàna tant ch'i putèṅ, par far 'n eśèmpi, i gh'aṅ da guardàr gl'imbròj di travestî. A Lóndra a gh'è dal famìji hippy ch'i s fànan di canòṅ davànti a i sò fiōi cic e pò i gh pàs'n al cichi. La màdar, se màdar a s pōl ciamàr-la, la gh'à in bras 'l ùltim putèṅ ch'al téta. Lōr i crédan 'd èsar cuntènt acsè, ad giràr lung la strada vèrs al futûr ma i n s réndan briśa cònt ch'al futûr par lōr a n gh'è minga.

I persunàǵ e i fat descrìt in cal film chè i èṅ tut véra.

Culegamènt estéran