Miguel Bosé

C'l artìcul chè 'l è scrit in Miranduléś

«

Se tu non torni non tornerà neanche l'estate e resteremo qui io e mia madre a guardare la pioggia, se tu non torni non torneranno neanche le rondini e resteremo qui io e mio padre a guardare il cielo.»

(IT)(Se non torni, 1993)

«

S'ta n tórn minga a n turnarà gnanc l'istâ e a 'rmagnrém chè mè e mè màd'r a guardàr la piōva, s'ta n tórn minga i n turnaràṅ gnanc al rundanìni e a 'rmagnrém chè mè e mè pàd'r a guardàr al cēl.»

(MUD)

Luis Miguel Luchino González Dominguín, cgnusû méj c'n al pseudònim ad Miguel Bosé (Pànama, 3 'd Avrìl dal 1956), 'l è 'n cantànt, atōr, balarèṅ e persunàǵ televiśìṿ itagliàṅ, spagnōl e panaméś, fiōl dal turēr spagnōl Luis Miguel Dominguín e dl'atōra milanéśa Lucia Bosè.

In dla sò caréra 'l à vindû da piò ad trénta migliòṅ ad disc in tut al mónd e recitâ in pelìculi ad sucès ad Dario Argento, Pedro Almodóvar e 'd Patrice Chéreau.

Al gh'à abû na relasiòṅ cun l'atōra e cundutōra Ana Obregón. Al gh'à quàtar fiōi: Diego, Tadeo, Ivo e Telmo. In dal 2021 'l à fat dal dichiarasiòṅ cónt'r al COVID-19, dgénd ch'l éra tut un cumplòt 'd un cartèl ad migliardàri psicupàtig dal Forum ecunòmic mundiàł fat par tgnir schisa la gint e par vénd'r i vacîṅ.

Biugrafìa

Carsû in 'n ambînt artìstic, fra 'l pitōr Pablo Picasso, al scritōr Ernest Hemingway e 'l regìsta Luchino Visconti ch'al 'l à tgnû a Batéś, 'l à cgnusû i sò prim sucès in di an Stanta quànd 'l à fat vgnir fóra soquànt sìngui cuma Soy, Anna e Super Superman. 'L à anc tòlt part a soquànt film ad Duccio Tessari e 'd Eriprando Visconti par pò far la part dal balarèṅ Mark in Suspiria 'd Dario Argento.

In di an Utànta 'l à vins par dū vòlti al Festivalbar: in dal 1980 cun Olympic Games, scrit insém a Toto Cutugno, e in dal 1982 cun Bravi ragazzi. In dal 1983 a véd la luś 'l àlbum Milano-Madrid cun dènt'r i sìngui Non siamo soli e Angeli caduti e na cupertìna disgnàda p'r Andy Warhol. Dū an dòp al firma par la Warner Music publicànd 'l àlbum Salamandra, dagnóra tut cantâ in ingléś e c'n al braṅ Indio ch'al vénd dimóndi. In dal 1988 'l à preśentâ 'l Fèstival 'd Sanremo insém a la Gabriella Carlucci.

In di an Nuànta al vins incóra 'l Festivalbar c'n al pès Se tu non torni. A 'l cìnema 'l è prutagunìsta 'd Tacchi a spillo, in du 'l canta Un anno d'amore dla Mina, d'La regina Margot, faghénd la part dal duca 'd Guìśa, e 'd Peccato che sia femmina. Al lavóra anc in dū film ad Vicente Aranda.