Michael Fassbender

C'l artìcul chè 'l è scrit in Miranduléś

Michael Fassbender (Heidelberg, 2 'd Avrìl dal 1977, a s lèś [ˈmɪçaʔeːl ˈfasbɛndɐ] in tedésc) 'l è 'n atōr e prudutōr tedésc cun sitadinànsa irlandéśa, candidâ a i Prèmi Òscar in dal 2014 p'r al drama biugràfic 12 anni schiavo e in dal 2016 par Steve Jobs cun lò in di pagn dal fundadōr dla Apple. 'L è anc stâ numinâ par tré vòlti a i Golden Globe.

Biugrafìa

Michael al nas in dla regiòṅ dal Baden-Württemberg in Germàgna Òvest da Josef Fassbender, cōg ad mistēr, e da lʼAdele, anvōda dal pulìtig irlandéś Michael Collins. A dū an al và a star c'n i suo a Killarney in Irlànda in du i vèr'n un risturànt e i al tìran sù da cristiàṅ faghénd-ag far al chirichét. Da śōvan al sòna in un grup metal dal pòst par pò tacàr a far di cōrs ad recitasiòṅ.

I sò prim rōi da atōr i rìv'n a 'l inìsi di an Dumìla quànd al tōś part a soquànti série televiśìvi cuma Hearts and Bones, stòria 'd un grup ad ragàs ad Coventry ch'i vàn'n a star a Lóndra, e Band of Brothers - Fratelli al fronte, telefìlm ambintâ a i tèmp dla secónda guèra mundiàla.

Al fà 'l sò debùt a 'l cìnema in dal 2006 quànd Zack Snyder al gh fà far la part dal spartàṅ Stelios in dal kolossal 300 a fiànc ad Gerard Butler, catànd pò al sucès 'l an dòp girànd Angel - La vita, il romanzo, cun la Romola Garai, Sam Neill e la Charlotte Rampling, e incóra da piò in dal 2008 quànd 'l è prutagunìsta dal drama biugràfic Hunger in di pagn dal mémbar d'l IRA Bobby Sands, mòrt ad fam in na parśòṅ dal Régn Unî.

Dòp al thriller Eden Lake, Fassbender al gira 'l aventuróś Bastardi senza gloria, cun prutagunìsta Brad Pitt, e pò al drama sentimentàł dal 2011 Jane Eyre faghénd còpia cun la Mia Wasikowska. Sèmp'r in c'l an lè al fà la part ad Magneto in dal film X-Men - L'inizio, trat da i persunàǵ mutànt di fumét dla Marvel Comics, qvéla dal psicanalìsta e filòśuf Carl Gustav Jung in A Dangerous Method, pelìcula cun Viggo Mortensen e Vincent Cassel, 'n agìnt segrét britànig in Knockout - Resa dei conti e 'n purcùs malâ 'd sès in Shame, rōl ch'al gh fruta la Cópa Volpi a 'l 68^śum Fèstival ad Venèsia.

In dal 2012 a 'l ém vist in dal film ad fantasiénsa Prometheus, cun la Noomi Rapace, Guy Pearce e la Charlize Theron, méntar 'l an dòp 'l à laurâ in dal thriller The Counselor - Il procuratore insém a la Cameron Diaz, a la Penélope Cruz, a Javier Bardem e a Brad Pitt. In séguit 'l è turnâ a far la part dal rè dal magnetìśum in X-Men - Giorni di un futuro passato (2014), X-Men - Apocalisse (2016) e X-Men: Dark Phoenix (2019).

Fra i sò àtar film a 'rcurdém al drama Macbeth (2015), in dla part ad Macbeth e la Marion Cotillard in qvéla dla Lady Macbeth, 'l aventuróś Assassin's Creed (2016), sèmp'r in còpia cun la Cotillard e cun Jeremy Irons, al film ad scarésa Alien: Covenant (2017), a fiànc dla Katherine Waterston, e 'l śal L'uomo di neve (2017), cun la Charlotte Gainsbourg, Val Kilmer e J. K. Simmons.

Filmugrafìa

2007 - 300, regìa ad Zack Snyder
2007 - Angel - La vita, il romanzo (Angel), regìa ad François Ozon
2008 - Hunger, regìa ad Steve McQueen
2008 - Eden Lake, regìa ad James Watkins
2009 - Blood Creek, regìa ad Joel Schumacher
2009 - Fish Tank, regìa 'd Andrea Arnold
2009 - Bastardi senza gloria (Inglourious Basterds), regìa ad Quentin Tarantino
2010 - Centurion, regìa ad Neil Marshall
2010 - Jonah Hex, regìa ad Jimmy Hayward
2011 - Jane Eyre, regìa ad Cary Fukunaga
2011 - X-Men - L'inizio (X-Men: First Class), regìa ad Matthew Vaughn
2011 - A Dangerous Method, regìa ad David Cronenberg
2011 - Knockout - Resa dei conti (Haywire), regìa ad Steven Soderbergh
2011 - Shame, regìa ad Steve McQueen
2012 - Prometheus, regìa ad Ridley Scott
2013 - The Counselor - Il procuratore (The Counselor), regìa ad Ridley Scott
2013 - 12 anni schiavo (12 Years a Slave), regìa ad Steve McQueen
2014 - Frank, regìa ad Lenny Abrahamson
2014 - X-Men - Giorni di un futuro passato (X-Men: Days of Future Past), regìa ad Bryan Singer
2015 - Slow West, regìa ad John Maclean
2015 - Macbeth, regìa ad Justin Kurzel
2015 - Steve Jobs, regìa ad Danny Boyle
2016 - X-Men - Apocalisse (X-Men: Apocalypse), regìa ad Bryan Singer
2016 - La luce sugli oceani (The Light Between Oceans), regìa ad Derek Cianfrance
2016 - Codice criminale (Trespass Against Us), regìa 'd Adam Smith
2016 - Assassin's Creed, regìa ad Justin Kurzel
2017 - Alien: Covenant, regìa ad Ridley Scott
2017 - Song to Song, regìa ad Terrence Malick
2017 - L'uomo di neve (The Snowman), regìa ad Tomas Alfredson
2019 - X-Men: Dark Phoenix (Dark Phoenix), regìa ad Simon Kinberg
2023 - Chi segna vince (Next Goal Wins), regìa ad Taika Waititi
2023 - The Killer, regìa ad David Fincher
2025 - Black Bag - Doppio gioco (Black Bag), regìa ad Steven Soderbergh
2025 - Kneecap, regìa ad Rich Peppiatt

Culegamènt estéran

Àtar prugèt

Wikimedia Commons contiene file multimediali su Michael Fassbender