Metro Goldwyn Mayer
|
C'l artìcul chè 'l è scrit in
Miranduléś |
La Metro Goldwyn Mayer (da spés scurtàda in MGM, èx Metro-Goldwyn-Mayer Pictures e Metro-Goldwyn-Mayer Corporation) 'l è òṅ di studi cinematugràfic americàṅ più impurtànt a 'l mónd. 'L è stâ fundâ in dal 1924 miténd insém la Metro Pictures, la Goldwyn Pictures e la Louis B. Mayer Pictures ad Louis B. Mayer (da chè al nóm). Al sò sìmbul stòric 'l è 'n lèòṅ ciamâ Leo ch'al rugìs.
Da 'l 2022 cal studi chè al fà part dla Amazon MGM Studios, cumpagnìa dal grup Amazon. Al sò catàlug 'l è 'l più grand a 'l mónd esénd ch'al pōl cuntàr su quatarmìla-e-sènt film e pasa e 'd 10.400 epiśòdi 'd série televiśìvi.
La sò sēd la s cata in Califòrgna a Beverly Hills. In tut la MGM, ch'la cuntròla anc la MGM Television, la United Artists, la Orion Pictures e la American International Pictures, 'l à purtâ a cà da piò ad duśènt Prèmi Òscar.
Fra i film ch'l'à prudót a 'rcurém Via col vento (1939), Il mago di Oz (1939), Scandalo a Filadelfia (1940), Cantando sotto la pioggia (1952), Intrigo internazionale (1959), Il dottor Živago (1965), 2001: Odissea nello spazio (1968), Rocky (1976), Halloween, la notte delle streghe (1978), Hardcore (1979) e Il colore viola (1985). Fra i cartòṅ animâ, la sò prudusiòṅ più famóśa l'è qvéla 'd Tom & Jerry.