Vai al contenuto

Mena Suvari

Da Wikipedia.

C'l artìcul chè 'l è scrit in Miranduléś Emiliàn

La Mena Suvari tòlta śò in dal 2012


La Mena Alexandra Suvari (Newport, 13 ad Favràr dal 1979, a s lèś [ˈmiːnə səˈvɑːri] in ingléś) l'è n'atōra, prudutōra e mudèla americàna cun di urìgini èstuni (par part ad pàdar) e gréchi (par part ad màdar). L'è arcurdàda p'r al rōl dla ragasōla ch'la fà pèrdar la tèsta a 'l madûr Kevin Spacey in American Beauty (1999).

Dòp avēr girâ soquànt telefìlm (Crescere che fatica, Tutti a casa di Ron e E.R. - Medici in prima linea) l'à fat al sò debùt a 'l cìnema in dal 1997 cun Ecstasy Generation ad Gregg Araki. In séguit l'à recitâ in dal thriller Il collezionista, a fiànc ad Morgan Freeman e dl'Ashley Judd, e in dla cumèdia dramàtica L'altra faccia di Beverly Hills (1998), insém a la Natasha Lyonne, a Alan Arkin e a la Marisa Tomei.

In dal 1999 a l'ém vista in dal film ad scarésa Carrie 2 - La furia, séguit ad Carrie, lo sguardo di Satana, in dla cumèdia spurcaciòna American Pie, faghénd la muróśa 'd Chris Klein, e in dal drama American Beauty in di pagn dna śuvnòta ch'la dvènta 'l ugèt dal deśidèri dal pàdar bèla spuśâ dla sò amìga Thora Birch. Par cla part chè, in du la s véd in un sógn cavàda śò e quaciàda sōl cun di pètai 'd róśi rósi, l'è stada candidàda a i Prèmi BAFTA.

In di an Dumìla l'à catâ spasi in dla cumèdia Le insolite sospette - Sugar & Spice (2001), in dla part dna cheerleader piutòst arvèrsa, in American Pie 2 (2001), in dua la cuntìnua la sò relasiòṅ cun Chris Klein anc se da 'l èstar, in d'l aventuróś D'Artagnan (2001), in dla part dla ragàsa ch'la fà pèrdar la tèsta a D'Artagnan (Justin Chambers), in dal noir Spun (2002), a fiànc ad Mickey Rourke e dla Brittany Murphy, in dal drama Sonny (2002), in còpia cun James Franco, in dal thriller Trauma (2004), in dla part dna ragàsa cun la fubìa p'r i ragn ch'la dà in afìt na cambra a Colin Firth, in dal drama Edmond (2005), cun prutagunìsta William H. Macy mént'r al sò rōl 'l è qvél dna rója, in dla cumèdia sentimentàla Vizi di famiglia (2005), cun la còpia Jennifer Aniston/Kevin Costner, in dal biugràfic Factory Girl (2006), cun Guy Pearce in di pagn 'd Andy Warhol, e in dla pelìcula 'd scarésa Day of the Dead (2008), arfacimènt 'd Il giorno degli zombi ad George A. Romero.

Fra i sò ùltim lavōr a psém nutàr al thriller dramàtic Non dirlo a nessuno (2020), in dla part dla màdar malàda 'd Fionn Whitehead e 'd Jack Dylan Grazer, e 'l biugràfic Reagan - Un presidente sotto i riflettori (2024) cun lē ch'l'à fat la part dl'atōra Jane Wyman.

Filmugrafìa

Belésa americàna (1999)
Tràuma (2004)
Cafeìna (2006)

Culegamènt estéran

Àtar prugèt

Estratto da "https://eml.wikipedia.org/w/index.php?title=Mena_Suvari&oldid=168618"