Mel Ferrer

C'l artìcul chè 'l è scrit in Miranduléś

Melchor Gastón Ferrer, cgnusû méj cuma Mel Ferrer (Elberon, 25 'd Agóst dal 1917 - Santa Bàrbara, 2 ad Śugn dal 2008, a s lèś [mɛl fəˈrɛər] in ingléś) 'l è stâ 'n atōr, regìsta e prudutōr americàṅ, famóś p'r al sò aspèt elegànt e malincònig. Al gh'à na stéla in dla Hollywood Walk of Fame.

Fiōl 'd un mèdag cun di urìgini cubàni e dn'ativìsta cun dal raìś irlandéśi, Mel da śōvan al stùddia a l'università 'd Princeton ma dòp dū an al mòla incòsa p'r avēr più tèmp par recitàr a teàtar, faghénd anc al balarèṅ a Broadway. In cal mént'r al lavóra p'r un giurnàl dal Vermònt scrivénd anc un lìbar par putèṅ da 'l tìtul Tito's Hats.

'L à fat al sò debùt a 'l cìnema in dal 1947 tulénd part a 'l drama La croce di fuoco cun prutagunìsta Henry Fonda méntar tri an dòp 'l à recitâ in dla pelìcula La seduttrice cun la Joan Fontaine. In séguit 'l à fat al marchéś de Maynes in Scaramouche (1952), a fiànc dla Janet Leigh, al buratinàr in dal musical Lili (1953), laurànd cun la Leslie Caron e la Zsa Zsa Gábor, rè Artù in dal film in custùm I cavalieri della tavola rotonda (1953), insém a l'Ava Gardner, e 'l prìnsip Andrej Bolkonskij in Guerra e pace (1956), pelìcula in du 'l à incruśâ l'Audrey Hepburn e Henry Fonda. Sèmp'r in c'l an lè al vîṅ sarnî da Jean Renoir par la part d'n aristucràtig, al cònt Henri de Chevincourt, in dla cumèdia Eliana e gli uomini in còpia cun l'Ingrid Bergman. In dal 1960 'l à fat un film cun l'Elsa Martinelli da 'l tìtul Il sangue e la rosa.

In dal 1962 'l è in dal cast dal film ad guèra Il giorno più lungo insém a Robert Mitchum, Richard Todd, John Wayne, Sean Connery, Henry Fonda, Rod Steiger, Richard Burton e Sal Mineo méntar dū an dòp 'l à recitâ in dla cumèdia sentimentàla Insieme a Parigi cun la còpia Audrey Hepburn/William Holden e in Donne, v'insegno come si seduce un uomo cun Tony Curtis, la Natalie Wood, Henry Fonda e la Lauren Bacall.

In di an Stanta 'l à laurâ dimóndi in Itàglia recitànd in dla pelìcula 'd scarésa L'anticristo (1973), in dla part dal pàdar dl'indemuniàda Carla Gravina, in di pulisiésc dal 1975 Morte sospetta di una minorenne e La polizia accusa: il Servizio Segreto uccide, in d'l aventuróś Il Corsaro Nero (1976), in còpia cun Kabir Bedi, in L'avvocato della mala (1977), cun Ray Lovelock e la Lilli Carati, in dal thriller La ragazza dal pigiama giallo (1978), a fiànc ad Ray Milland, la Dalila Di Lazzaro e Michele Placido, in dal drama eròtic L'immoralità (1978) cun prutagunìsta la Lisa Gastoni, e in dū film ad Sergio Martino dal 1979 cun la Barbara Bach: L'isola degli uomini pesce e Il fiume del grande caimano.

Fra i sò ùltim lavōr a 'rcurdém al drama Lili Marleen ad Rainer Werner Fassbinder, in di pagn dal pàd'r ad Giancarlo Giannini, e i film ad scarésa Mangiati vivi!, cun la Janet Agren e Robert Kerman, e Incubo sulla città contaminata.

Cuma prudutōr a 'l ém vist lauràr in dal thriller Gli occhi della notte (1967), interpretâ da l'Audrey Hepburn, sò mujēr da 'l 1954 a 'l 1968. In televiśiòṅ a 'l arcurdém p'r avēr tòlt part a 'l série televiśìvi Alla conquista del West, Dallas, Falcon Crest (in di pagn ad Phillip Erikson) e in Il ritorno di Simon Templar.

'L è mòrt a nuànt'an in dal sò ranch in Califòrgna.